Profet Maeka 2 - Buka Blahi Ka Cheke Holo

Lordginauna paradi iheire te goigonidi naikno te kuma

¹ Kokhoni ghami fara ghotilo iheire te edi unha gaoghatho te diꞌa kate thuru teu ka sape na! Eghuteuna hamerane na, ghotilo edi fabrahu nomi gaoghatho te diꞌa tuare, theo kaisei naikno te lhoti ghami ghotilo na.

² Kate magnahagheni nogna glose keha mae na, ghotilo tei atha kolho. Eghuteuna kate magnahagheni nogna suga keha mae na, ghotilo jaola tei atha. Ka puhi igne, ghotilo blaudi kolho nodi glepo naiknore, eghuteuna keha fatare ghotilo jaola blaudi tharaknadi mare re.

³ Nu igne unha te chekeni Lord na, “Iara ghaoghatho mala eni puhi biꞌo mala thoke ghami ghotilo, eghuteuna ghotilo ginauna theo kaisei nabrou te mala rikha na. Nu puhi biꞌo igne theome mala tangomana ghotilo te mala fahaehaghe ghami themi jateula te eni ghotilo gognaro na.

⁴ Ke leghu gna narane tuana, naiknore ginauna maꞌe ghami ghotilo fabrahu funu ka puhi biꞌo te thoke ghami ghotilo igne. Eghuteuna mare ginauna eni kaisei khoje mala maꞌe ghami ghotilo ka puhi biꞌo igne. Mare ginauna koje eghu, ‘Gognarona tahati kafe thofno goigoni ghita fara! Lord snakredi naokare mala atha noda glose tahati gne.’ ”

⁵ Eghume, ke leghugna narane Lord na teke tusu fapulo glose igne ka nogna naiknore, mare nake tufa glose igne. Nu theo kaisei naikno ka tharaknami ghotilo re nate atha kaisei glose.

⁶ Ghotilo cheke faheta eghu ka iara, “Ei! Iagho thosei cheke eghu ghami ghehati! Theome keli te cheke faheta fabrahu iagho eidi glepo igre. God theome tangomana te famamaja ghami ghehati na.”

⁷ Ghotilo naiknomi Israel! Ghotilo thosei mala cheke eghu. Jame Lord theome diꞌatagna, mana theome edi glepo teu la tuana eghu. Jame te leghudi ghotilo puhigna mana te doglore, ghotilo ginauna magnahaghei te nomhidi nogu cheke iara re.

⁸ Nu Lord ne cheke tughu eghu ka ghotilo, “Leuleghu fata ghotilo jateula naoka eghu fabrahu ka nogu naikno iara gre. Kate pulo mei mare funu ka kaisei magra na, mare gaoghathodi na keliu kolho, na theo kaisei glepo nate goigonidi mare. Nu ghotilo ofodi mare kolho mala salo fahui gobigna lepore ka mare mala ghotilo themi.

⁹ Ghotilo ngolhi fajifladi glehe kokoi nogu naikno iara re ka nodi namonore. Eghuteuna leuleghu fata na ghotilo jaola blau glepo teke magnahaghei tusu lao iara Lord ka thudi mare.

¹⁰ Eghume ghotilo jifla tei! Funu gognaro gne, glose igne theome nomi namono ghotilo. Naugna ghotilo la fatothona nihi glose igne. Puhimi ghotilo te tapla jafra fabrahu ka nakhibo igne la goigonihi glose igne, eghuteuna theome tangomana teke keli fapulo na.

¹¹ Jame kaisei mae chaichaghi mei ka ghotilo ne cheke eghu, ‘Iara cheke fadoglo ka ghotilo! Na theome raugha, nomi namono ghotilo igne ginauna fodu fara ka waen nei beer,’ igne nafnata mae te kelitami fara ghotilo na.”

Lordnhaꞌa cheke eigna nogna naiknore ginauna neke snagla

¹² Lord ne cheke eghu, “Ghotilo naiknomi Israel. Kaisei narane iara ginauna atha gnafa iheire teke karha mei ke leghumi ghotilo nei ka iheire te karha nga teu, mala kafe mei. Eghuteuna iara ginauna reireghi fakelidi jateula mae mala greireghi sipu atha teke pulo mei nogna sipu re ka baradi re. Nomi namono ghotilore ginauna fodu ka naikno, jateula kaisei vido te au famane buburu aheva kmana sipu te au tagna.

¹³ Ka narane tuana, Lord ginauna ei nabrou maladi nogna naiknore, aheva mana ginauna atha fajifladi mare ka kantri te khaba aheva mare teke huhurudi mare mala au tagna. Mare ginauna jifla ka namono te khaba igre, eghuteuna mare ginauna snagla. Lord kolho ginauna nodi king mare, eghuteuna mana thegna ginauna batudi mare mala kafe jifla ka namono tuana mala ke pulo ka nodi thofno namono na.”