Profet Maeka 1 - Buka Blahi Ka Cheke Holo

Cheke ululahu

¹ Igne nogna cheke Lord neke mei ka profet Maeka maegna ka namono Moreset. Lord ne falalase nogna cheke re ka mifi kate King Jotam, nei ka narane King Ehas, nei ka narane King Hesekaea, mae igre neke kafe king Juda. Mifi igre cheke eidi naikno gna namono Samaria, nodi namono biꞌo naiknodi Israel, nei naikno gna namono Jerusalem, nodi namono biꞌo naiknodi Juda.

Khoje mala diꞌanagnafa Samaria nei Jerusalem (Nogna cheke profet)

² Ghotilo naikno te gnafa ka nauthoglu igne, Fanomho mei ka nogu cheke iara gne! Lord lase ghami ghotilo, eghuteuna mana ginauna cheke fapari ghami ghotilo, funu mei ka sugagna mana kligna na.

³ Tore! Lord ginauna soru mei mala nolo ke kligna thogele.

⁴ Tutuani, thogele igre ginauna blalho, jateula kadele te au rhegna khaꞌaghi eghu. Mare ginauna thofa soru pari ke lamna glogu, jateula khoꞌu te loloro soru funu ka thogele ro.

⁵ Glepo igre ginauna thoke mei, naugna ghotilo naiknomi Israel te gnafa igre tapla jafra fabrahu ka nakhibo, nei figri tagruni God. Ghotilo naiknomi Israel! Ghotilo figri tagruni fabrahuni mana, nu ihei teke batu ghami ghotilo teke tei ka vido te diꞌa igne na? Naiknodi Samaria kolho. Eghuteuna ghotilo naiknomi Juda! Ghotilo tarai koba ka mumuju god, nu ihei teke batu ghami ghotilo te mala edi glepo te diꞌa igre? Naiknodi Jerusalem kolho.

⁶ Naugna igne, Lord ne cheke eghu, “Iara ginauna goigoni fahui namono biꞌo Samaria igne. Eghuteuna namono igne ginauna jateula tothoghei chara ka glalaba ra eghu filogna na, eghuteuna ginauna jateula vido mala joꞌu gaju grep eghu kolho. Thina gringni gna namono igne, iara ginauna pili tei ka glogu ro, eghuteuna thina mala famamhaku gna namono igne ginauna fiti au kolho ka vido te krogha.

⁷ Iara ginauna chekedi nomi naoka ghotilo are mala kina nguanguja mumuju god igre. Mumuju god te pogho soru fabrahu ghotilo ka Sugablahi bongihehe igre, iara ginauna chekedi nomi naoka ghotilo igre mala gnubra. Uve, mumuju te gnafa igre ginauna na jateula chara eghu. Ghotilo tapla jafra fabrahu baludi mae bongihehe mala tarai ka god chaichaghi. Igne jateula kaisei mae ne thuru fodu balugna kaisei gaꞌase vine eghu. Nu iara ginauna chekedi mae naoka mala atha gobigna lepo ghotilo Samaria te edi kate tarai na. Gobigna lepo igre jateula kaisei mae te tusu lao sileni ka gaꞌase vine ra eghu!”

⁸ Glepo te nomhidi iara igre, ginauna fadiꞌa nagnafa ghau nei fatanhi ghau eghu iara. Eghuteuna iara ginauna atha koko nogu pohe nei nogu sadol teu iara re, eghuteuna nolo tafri jateula mae te diꞌanagnafa nei tanhi teu fabrahu eigna ihei te lehe. Iara ginauna tanhi fabiꞌo jateula khuma mata, eghuteuna tanhi fadiꞌa jateula nakrudu.

⁹ Papara te thokedi naiknodi Samaria gre igne jateula thubu ka thini te theome tangomana nate ke mafo ra eghu. Eghuteuna nafnata fogra igne la thoke ghita tahati hi Juda. Uve, papara igne jaola thoke ka grengatha gna namono biꞌo Jerusalem, namono biꞌo igne nodi nogu naikno iara gre.

Naoka igre mei namo Jerusalem

¹⁰ Ghotilo naiknomi Juda! Ghotilo thosei tei cheke ka naiknodi Filistia ka namono Gat, aheva tahati teke nigra ka magra. Eghuteuna ghotilo mala thosei tanhi. Naiknodi ka namono Bet-Leafra! Ghotilo mala pili tafri ka nakrofu fagaglana gna eigna ghotilo te thofno diꞌanagnafa fara.

¹¹ Ghotilo naiknomi ka namono Safia! Mae naoka ginauna huhuru ghami ghotilo mala teu ka keha kantri delei, eghuteuna mare ginauna koko nomi pohe ghotilo re mala thofno mamaja nomi fara ghotilo. Naiknodi namono Sanan mhaghu nodi na theome jifla mei ke kosi gna nodi namono na. Naiknodi Bet-Esel diꞌanagnafa nei tanhi fabrahu. Eghuteuna ghotilo theome tangomana te tei poru ka nodi namono mare, naugna mare theome nheta te mala togho ghami ghotilo na.

¹² Ghotilo naiknomi ka namono Marot nanga nomi fara, eghuteuna mare magnahaghei fara mala ihei te mei te mala fakarhidi mare na. Nu puhi biꞌo igne, Lord neke kuru mei la auhi rhegna grengatha gna Jerusalem.

¹³ Ghotilo iheire te au Lakis! Ghotilo haru famaku nomi hose are tei ka chariot mala rikha. Ghotilo kaisei namono biꞌo ululahu Juda, ghotilo leghudi puhi te diꞌa te edi naiknodi Israel ke raru, nei jaola batudi naiknodi Jerusalem ka nakhibo.

¹⁴ Ghotilo naiknomi Juda! Narane igne malada tahati gnafa mala kubae ka namono Moreset-Gat, naugna naoka na mei atha namono igne. Eghuteuna naikno gna namono Aksib ginauna chaghi ka nomi king ghotilo na, naugna naiknodi Aksib rouronu ghami ghotilo te mala toghodi na, nu mare theome togho ghami ghotilo kolho.

¹⁵ Ghotilo naiknomi namono Maresa! Na theome raugha Lord ginauna snakredi nomi naoka ghotilo ra mala mei atha nomi namono. Eghuteuna lidadi Israel igre ginauna rikha tei poru lamna gluma rhegna namono Adulam jateula teke eni King Devet tifa ia eghu.

¹⁶ Naiknomi Juda! Ghotilo mala kuchi khaklami are fagaglana gna te diꞌanagnafa nei tanhi teu ghotilo na. Ghotilo mala kuchi koko khakla re mala klaja, naugna noda naoka tahati re ginauna mei huhurudi goro sua ke namhadi fara tahati gre mala tei au ka nodi namono re.