Profet Jona 4 - Buka Blahi Ka Cheke Holo

Mae Jona ne diꞌatagna kaLord

¹ Nu mae Jona ne theome gleale'a eigna puhi God te theome paradi naiknore igne ne diꞌatagna fara.

² Aonu mana ne tarai eghu, “Lord, kani au teku iara ka nogu kantri ia, iara lase nighohi te atha fadelei iagho nakhibodi naiknore. Ka puhi igne te fariu riu rikha te tei iara Spen ia. Iara kulu lase nigho iagho te keli fara nei kokhonidi teu naiknore. Iagho theome ghosei diꞌatamu, eghuteuna iagho ghatho tahudi fara naiknore. Uve, iagho tarabana fabrahu te mala atha fadelei nakhibodi naiknore, eghuteuna iagho theome mala paradi mare.

³ Eghume Lord, snakre ghau mala lehe nogu. Mala unha site karha iara gnea? Nabagu na iara mala lehe kolho.”

⁴ Lord ne cheke eghu, “Jona, theome keli te diꞌatamu iagho na.”

⁵ Mae Jona jifla ka namono ne tei ke maghati. Mana babana kaisei suga ikoi mala poru ka naprai, mana gnokro neu jare mala filoni unha nate thokeni namono biꞌo igne.

⁶ Lord God eni kaisei gaju vaen ne kotu haghe rhegna mae Jona, eghuteuna mana ne aho ka naungo gna gaju igne. Mae Jona ne keli tagna fara ka gaju vaen igne, naugna gaju igne ne toghoni mana.

⁷ Nu hamerane boibongi ka keha narane na, God ne snakre mei muno mala ghamu falehe gaju vaen igne.

⁸ Eghuteuna kate haghe naprai na, God ne eni nuri te brana fara na ne ghaghafa mei ke maghati. Eghuteuna naprai na ne brana soru ka phaꞌugna mae Jona na ne glaꞌe soru mana. Aonu, mana ne cheke eghu, “Mala unha site karha teu iara gnea? Iara nabagu na mala lehe kolho!”

⁹ Lord ne cheke eghu ka mana, “Ba, doglou kolho te diꞌatamu iagho eigna gaju vaen igne na?” Mae Jona ne cheke eghu, “Uve, doglou kolho te diꞌatagu iara na, eghume iara magnahaghei lehe nogu kolho!”

¹⁰ Lord ne cheke eghu ka mana, “Gaju vaen igne kotu mei ka kaisei bongi kolho, eghuteuna ka keha narane na teuna lehe. Iagho neke theome joꞌu, ba neke theome fakotuni, nu iagho thono diꞌanagnafani fara vaen igne.

¹¹ Gaju te kokhoni nouni iagho igne thono ikoi fara. Nu namono Ninive igne thono biꞌo fara, salaꞌuni kaisei gobi varadaki thogha naikno te au tagna na. Gaoghathodire jateula sua te theome laseni unha te keli ba unha te diꞌa teura eghu, eghuteuna kmana buluka jaola au ke lamnagna namono biꞌo igne. Ba, te ghathoni iagho na theome naba iara te mala kokhonidire?”