Profet Jona 3 - Buka Blahi Ka Cheke Holo

Mae Jona ne faꞌuveniLord

¹ Lord neke fapea cheke eghu ka mae Jona,

² “Jona, iagho na tei ka namono biꞌo Ninive, mala toutonuni cheke te tusu ari iara ka iagho igne.”

³ Eghume mae Jona ne tei Ninive leghuni unha te chekeni Lord ka mana na. Namono igne biꞌo fara nabagna thilo narane te tei funu ka keha phile na te tei thoke ka keha phile namono na.

⁴ Ka narane ulu lahu, kate tei mana lamna namono na, mana ne eha eghu fabiꞌo, “Ame gnafa nga phiatutu narane igre teuna, God ginauna goigoni ghami fara ghotilo!”

⁵ Naiknodi Ninive igre ne fatutuani ni chekegna God igne ne tughu nagnafa. Neubane mae nafnakno ba theo, mare te gnafa na ne theome ima. Eghuteuna mare ne pipichi ka pohe thona, fagaglana eigna nodi diꞌanagnafa na.

⁶ Kate nomhini igne, king gna Ninive igne jaola ne diꞌanagnafa gna fara. Mana kegra haghe ka nogna sape nafnakno na ne koko nogna famane pohe na. Mana jaola ne pipichi ka pohe te thona ne tei gnokro lamna nakrofu.

⁷ Mana ne fatei cheke igne ka naiknogna namono Ninive, “Iara nomi king ghotilo. “Eghuteuna iara baludi nogu mae funei gre, iara cheke ghami ghotilo hui, ghotilo baludi noda buluka nei sipu teura mala thosei ima nei koꞌu eghu.

⁸ Tahati mala pipichi pohe thona, eghuteuna haru tafru ka pohe thona noda buluka ra. Eghuteuna tahati te gnafa na mala tarai heta ka God, eghuteuna tahati mala koko puhida te diꞌa gre.

⁹ Jame te eghu tahati na, glahu kokhoni ghita God, eghuteuna mana ginauna na tughu gaoghathogna na theome diꞌatagna ka tahati, eghuteuna mana ginau na theome falehe ghita.”

¹⁰ God filoni te tughu nakarha naiknore. Aonu mana kokhonidi naiknore ne theome paradi leghuni unha teke chekeni mana tifa na.