Profet Jona 2 - Buka Blahi Ka Cheke Holo

Mae Jona ne tarai kaLord

¹ Kate au mae Jona ka thiꞌagna sasa biꞌo igne, mana ne tarai eghu ka Lord nogna God:

² “Lord, kate thoke ghau iara hoholo na, iara eha ari ka iagho, eghuteuna iagho fanomho mei ka iara ne cheke tughu ghau. Funu ka thiꞌagna beku na, iara tanhi ari ka iagho eghuteuna iagho nomhini naoglagu iara na.

³ Iagho koko soru ghau lamna nhorora aheva thongna te toku tafru ghau eghuteuna galo biꞌo mei poha ke klignagu.

⁴ Te ghathoni iara na, iara gne la tei koko nigho, neuba, iara ginauna nake filo fapuloni nou Sugablahi iagho na.

⁵ Iara koꞌu thongna ghilei namo lehe. Thongna namo faknoho ghau iara, eghuteuna phaꞌugu na firi ka buru.

⁶ Iara jateula te plulu ke pari pesi thogele ra eghu. Iara jateula te au ka suga sosolo ra eghu ke pari glose eghuteuna iara theome tangomana te jifla na. Nu iagho Lord nogu God fakarhi ghau jateula iagho teke atha fajifla ghau ka beku ia eghu.

⁷ “Lord, iara ghatho nigho ka vido te namo lehe iara igne. Nogu tharai iara na ari posa ka nou Sugablahi iagho na.

⁸ “Iheire te loku maku ka mumuju igre, naikno igre theome ghatho tahu nigho iagho.

⁹ Nu iara ginauna koje mala kilo fnakno nigho eghuteuna iara ginauna fafara mala cheke fakeli nigho. Gobigna lepo te nhaꞌa chekedi iara ka iagho igre, iara ginau na ediu. ‘Lord kolho tangomana te fakarhini naikno na.’ ”

¹⁰ Kate tarai eghu mae Jona igne, Lord ne cheke ka sasa igne ne longa mata ne luꞌa fajiflani mae Jona ka nusu na.