Profet Jona 1 - Buka Blahi Ka Cheke Holo

Mae Profet Jona fariuriu rikhaniLord

¹ Lord ne cheke eghu ka mae Jona, thugna mae Amitai,

² “Iagho tei ka namono biꞌo Ninive. Toutonu ka naikno te au ka namono biꞌo tuana, naugna iara filoni puhidi mare na thono diꞌa fara.”

³ Nu mae Jona ne tirogna, ne fariuriu rikhani Lord mala tei ka namono Spen te khaba ke mosu. Aonu mana ne tei ka namono Jopa te au ka geri thongna na ne filoni kaisei vaka tarabana mala tei Spen. Mana foli pasis ne tei lamna ka vaka igne mala rikhani Lord. Aonu mare jifla Jopa ne tei Spen.

⁴ Nu Lord eni nuri biꞌo na ne ghaghafa mei ne malu thongna na, eghuteuna vaka na ne namo phosa.

⁵ Mae te loku ka vaka na igre ne mhaghu nodi fara, eghuteuna mare te gnafa na ne tarai balu eha fabiꞌo ka nodi god re mala toghodi. Mare ne koko soru nodi glujare naugna vaka na ne namo lodu. Aonu kate funu ghaghafa faheta nuri na, mae Jona soru pari lamna vaka ne thuru iho.

⁶ Kate filoni mana na, kapten ne cheke eghu fabiꞌo ka mana, “Sei! Thuru unha sagho ia? Dofra, tarai balu eha fabiꞌo ka nou god na! Glahu kokhoni ghita mana, eghuteuna tahati ginauna theome lehe.”

⁷ Mae te loku ka vaka na igre ne cheke eghu fari thedi, “Tahati na lalahu khale mala laseni mae ihei te eni puhi biꞌo te thoke ghita tahati igne.” Aonu, mare soru pari ne lalahu khale. Eghuteuna igne ne soru kolho ka mae Jona.

⁸ Mare ne cheke eghu ka mana, “Iagho cheke mei! Naugna unha ne thoke ghita tahati si hoholo ignea? Unha teke eni iagho na? Unha nou gloku iagho na? Aheva namonomu iagho na? Iagho vikegna mae ihei?”

⁹ Aonu, mae Jona ne cheke eghu ka mare, “Iara kaisei mae Hibru, iara tufru soruni Lord God gna kligna, mae ihei teke vuavuhadi moumolu nei thongna.”

¹⁰ Kate nomhini mare igne, mare ne thono mhaghu nodi fara, naugna mae Jona chekenihi mana te fariuriu rikhani Lord. Mare ne cheke eghu ka mana, “Tore! Faꞌunha ne eni iagho glepo igne?”

¹¹ Ka vido igne, nuri na ne mei faheta fara, eghuteuna thongna na ne malu fara. Aonu, mare ne ghusna eghu ka mana, “Unha nate eni ghehati ka iagho te mala ke snoto nuri gne nei beata thongna gne teuna?”

¹² Mae Jona ne cheke eghu ka mare, “Iara laseni nuri biꞌo nei maraghata teu te thoke ghita tahati igne, naugna iara neke fariu riu rikhani Lord. Eghume, ghotilo koko soru ghau iara lamna thongna, eghuteuna thongna gne ginauna nake muana.”

¹³ Nu mae te loku ka vaka na igre ne tirodi te eni igne, aonu mare fariu riu ghorha vaka na tei mata. Neuba, mare theome tangomana, naugna nuri na nheta fara eghuteuna thongna na jaola malu fara.

¹⁴ Aonu mare ne eha eghu ka Lord, “Lord, thosei para ghami ka glehegna mae igne. Ghehati theome tangomana te faleheni mae ihei te theo nakhibogna igne. Naugna iagho tangomana te eni unha te magnahagheni iagho na.”

¹⁵ Aonu, mare koko soruni mae Jona lamna thongna eghuteuna megei nga nuri ghe thongna gre ne lehe soru.

¹⁶ Mae te loku ka vaka na igre ne mhaghuni fara Lord kate filoni glepo igne. Aonu, mare atha kaisei glepo tautagu ne fafara ka Lord nei jaola ne nhaꞌa cheke ka mana.

¹⁷ Lord kuruni kaisei sasa biꞌo ne mei tomno soruni mae Jona, eghuteuna mana au lamna ka thiꞌagna sasa igne thilo narane nei thilo bongi.