Profet Joel 3 - Buka Blahi Ka Cheke Holo

God ginauna fatedi naiknogna nauthoglu igne

¹ Lord ne cheke eghu, “Ka narane tuana, iara ginauna nake tusu fapulo kmana glepo te keli ka naikno te au ka namono biꞌo Jerusalem nei ka keha vido ke lamnagna kantri Juda.

² Iara ginauna salofodu mei naikno te gnafa ka keha kantri are mala mei au ka glogu Jehosafat. Naugna ka vido igne nate fatedi iara iheire teke edi puhi te diꞌa ranghidi nogu naikno iara Israel. Keha naiknore neke fofota nodi vido glose maedi Israel igre, nei khi fajifladi naiknodi Israel ka nodi thofno namono na.

³ Naikno igre neke lalahu khale mala laseni ihei nate hata nogu naikno iara Israel teke uludi mare ka magra. Mare foli sua nalhaꞌu nei sua gaꞌase teu igre mala nodi naikno gloku, eghuteuna mare hata sileni tuana mala foli gaꞌase vine nei waen.

⁴ “Ghotilo naiknomi ka phei namono biꞌo Taea ghe Saedon, nei ghotilo naiknomi ka kantri Filistia! Unha te magnahaghei eni ghotilo ka iara na? Iara neke theome eni kaisei puhi te diꞌa ka ghotilo. Iara neke theome eni kaisei puhi te diꞌa mala ke foli fapulo ghotilo ka iara. Jame te eghu na, iara ginauna nake tughu fapulo ka ghotilo.

⁵ Ghotilo neke hata neke tei balumi keha silva nei gol, baludi keha nogu famane glepo iara neke tei lilisei ka sugadi phei nomi king ra.

⁶ Ghotilo hata neke tei naiknodi Jerusalem nei Juda mala foli ka naiknodi Gris ka kantri te khaba fara.

⁷ “Nu iara gognaro na nake tei hata fajifladi ka namono aheva teke tei liliseidi ghotilore. Eghuteuna iara ginauna nake enila ka ghotilo nafnata puhi teke eni ghotilo ka nogu naikno iara ra.

⁸ Iara ginauna kuru ari naiknodi keha kantri are mala hata thumi gaꞌase nei thumi nalhaꞌu teu ghotilo are mala mei foli ka naiknodi Juda. Aonu naiknodi Juda igre ginauna tei foli thumi ghotilo igre ka kantri Seba ka vido aheva te khaba fara.” Igne chekegna Lord.

⁹ God ne cheke ranghini mae Joel mala cheke eghu mana ka naiknodi keha kantri are, “Ghotilo tarabana mala tei ka magra. Kilo meidi mae soldia ra mala kafe mei mala magra.

¹⁰ Jaha fnonu nomi aean te mala dokha glose ra mala horo naflahi mala magra, eghuteuna salo naflahi thagho ra mala horo grojo. Mae iheire te nigra ra, mala jaola mala tei ka magra.

¹¹ Ghotilo iheire te au faligoho teura faghose mei ka glogu pari igne.” “Lord, kuru meidi sagho nou mae soldia te nheta ra mala mei falehedi mae naoka igre.”

¹² God ne cheke eghu, “Ghotilo naiknomi ka keha kantri ra tarabana mala tei ka glogu Jehosafat. Ka vido igne te mala gnokro soru iara te mala fatedi naiknodi kantri te au faligoho tafri igre.”

¹³ Puhidi naikno igre thono diꞌa fara. Eghume, ghotilo katodi jateula mae te kato wit ra eghu. Tapla faheta ke klignadi jateula mae te tapla ke klignadi grep ra eghu.

¹⁴ Kmana thogha naikno ginau khapru mei pari agne, naugna nogna Narane Lord na la namo meihi. Uve, ka narane tuana, mana ginauna fatedi naikno te gnafa te au ka namono igne.

¹⁵ Ka narane tuana, naprai, nei glaba, nei nathunu teu igre ginauna kafe romno soru.

¹⁶ Lord ginauna au Jerusalem ka Thogele blahi Saion, ne eha fabiꞌo. Eghuteuna naoglagna mana igne biꞌo fara jateula fila eghu, eghuteuna maloa ghe nauthoglu igre ginauna nghali tongana. Nu Lord ginauna reireghi fakelidi fabrahu nogna naiknore.

¹⁷ Lord ne cheke eghu, “Ka Narane tuana, ghotilo mae Israel ra ginauna lase ghau iara, eigna iara ngala nomi Lord nei nomi God teu ghotilo na. Iara au ka namono biꞌo Jerusalem ka Thogele blahi Saion. Iara vahini namono biꞌo igne mala nogu namono blahi iara. Eghuteuna keha vike are ginauna nake theome tangomana teke ruma mei nake goigonini na.”

God ginauna fablahidi nogna naiknore

¹⁸ Lord ne cheke eghu, “Ka Narane tuana, thogele te gnafa igre ginauna fodu ka grep, eghuteuna ghotilo tangomana te hata milk ka buluka te au ka thogele ke holo. Eghuteuna naikno te au ka kantri Juda igre ginauna au ghedi kmana khoꞌu, eghuteuna kaisei glokha ginauna jifla mei ka nogu Sugablahi iara na. Khoꞌu igne ginauna loloro soru ka glogu Akesia.

¹⁹ Nu kantri Ijep ginauna thofno diꞌa theo tokagna. Kantri Idom ginauna mala kaisei namono nagou, eghuteuna theo kaisei glepo te keli nate au tagna na. Naugna naiknogna namono igne neke mei goigonini kantri Juda neke falehedi iheire teke theome eni kaisei puhi te diꞌa ranghini ihei.

^20-21 Uve, iara ginauna nake tughu fapulo, eghuteuna iara ginauna nake theome hata fadelei unha najafra te thono diꞌa fara teke edi mare ka nogu naikno iara igre. Nu nogu naikno iara igre ginauna au fabrahu ka kantri Juda nei ka namono biꞌo Jerusalem. Eghuteuna iara ginauna au fabrahu baludi ka Thogele blahi Saion.”