Profet Joel 2 - Buka Blahi Ka Cheke Holo

Cheche igre kaisei fagaglana eigna tela namohi nogna naraneLordna

¹ Nogna Narane Lord te mala fatedi naiknore la namohi gognarona. Eghume, ghotilo kufli nei belo eghu ke kligna Thogele blahi Saion mala kulu laseni naiknore. Eghuteuna naikno te au ka kantri Juda igre ginauna mhaghu nei fififri eghu ka narane igne.

² Narane igne ginauna kafe romno soru, eghuteuna maloa igne ginauna thafru ka gromno. Aonu kaisei tothoghei cheche ginauna mei toku tafru vido te gnafa jateula kaisei armi eghu ke kligna thogele, ba jateula gromno te haghe te toku naprai na ra eghu. Theo kaisei glepo jateula igne teku tifa na, eghuteuna theo kaisei glepo nate jateula igne teu ginauna.

³ Cheche igre ginauna mei jateula kaisei khaꞌaghi te ghamu fahui buburu nei gobigna lepo fateote'o ra eghu. Uve, ame thoke mei nga glepo igre teuna, nauthoglu igne famane namono fara jateula nagare Iden eghu. Eghuteuna kate ghamu te hui cheche khakladi gaju te gnafa igre na, kantri igne ginauna na jateula namono nagou eghu na theo kaisei glepo nate au teu ke leghugna igne na.

⁴ Cheche igre theidire umhu fara jateula hose te tei ka magra eghu.

⁵ Kate chari umhu te mei ka thogele na, rehati taitanhi jateula chariot te tei ka magra ra eghu, ba jateula namhata te gnhubra ka khaꞌaghi ra eghu. Theidire kaisei jajagha ngala jateula kaisei armi te tarabana te mala tei ka magra ra eghu.

⁶ Kate mei te namo rehati na, naiknore mhaghu nodi fara filo laodire.

⁷ Chari te meidire jateula mae soldia te chari te tei apla ke kligna bara gna namono ra eghu. Rehati kaisei thei ngala, theo kaisei ka reꞌe te figri fadelei ka keha na.

⁸ Theo kaisei teke farore tafri ke ulugna keha na. Glepo igre kmana fara, eghuteuna theidire jateula thei mae soldia te theome mhaghudi naoka ra eghu. Eghuteuna theo kaisei glepo te fanogradire.

⁹ Theome raugha meidi te apla ka gringni na te ruma goigoni ni namono na. Rehati apla ka sugare, eghuteuna ruma ka widare jateula mae te blau ra eghu.

¹⁰ Kate kafe thugha mei cheche igre na, nauthoglu ghe maloa igre na kafe nghali. Naprai ghe glaba igre ginauna na kafe romno soru, eghuteuna nathunu are ginauna theome agha.

¹¹ Aonu Lord ne eha fabiꞌo ka cheche te jateula nogna mae soldia teu mana igre. Aonu naoglagna mana igne thono biꞌo fara jateula te poha fila ra eghu. Neuba, cheche igre ne kmana fara nei nolaghi fara neu, rehati na leghuni kolho nogna cheke mana na. Eghume, nogna Narane Lord igne ginauna ninhigrana fara. Ihei gne te nabagna nate khegra heta kate thoke mei Narane igne na? Thono theo fara.

God kilodi naiknore mala ke pulo mei ka mana

¹² Neuba, Lord ne cheke eghu, “Ghotilo naiknomi Israel. Neuba puhi biꞌo igre ne thoke ghami ghotilo, iara magnahaghei ghami ghotilo te figri tagrudi nakhibomi are mala ke pulo mei ka iara. Ghotilo falalase puhi igne ka puhi dangna, diꞌanagnafa nei tanhi.”

¹³ Nafnata puhi te reku pohe ghotilo te mala laseni naiknore te diꞌanagnafa ghotilo igne theome naba kolho. Ghotilo mala diꞌanagnafa kate tutuani te jifla mei ka thofno nagnafami fateote'o eidi nakhibomi are. Ghotilo mala ke pulo mei ka Lord, nomi God. Naugna Mana keli fara nei kokhonidi eghu naiknore. Mana theome ghosei diꞌatagna, nu mana ghatho tahudi naiknore. Uve, mana tarabana koba te mala hata fadelei nakhiboda re, theome mala para ghita.

¹⁴ Jame te figri mei ghotilo ka Lord noda God na, mana tangomana teke tughu gaoghatho teke kokhoni ghita, nei fablahi ghita teu te mala ke kmana gheda gano na. Eghuteuna tahati ginauna tangomana teke fafara gano nei waen teu ka Sugablahi igne.

¹⁵ Ghotilo mae pris ra! Ghotilo kufli ke kligna Thogele blahi Saion, mala kilo meidi naikno te gnafa ra mala kafe khapru mei agne. Eghuteuna ghotilo cheke faheta ranghidi naiknora mala thosei ima.

¹⁶ Ghotilo ehadi naikno ra mala khapru mei ka Sugablahi igne. Fufunu ka naikno biꞌo, mae biꞌo, gaꞌase majaghani, nalhaꞌu majaghani, nei goro sua te chuꞌu teu ra eghu. Eghuteuna naikno te tolaghi majaghani ra mala jaola jifla mei ka sugadire.

¹⁷ Ghotilo mae pris te loku ranghini Lord ka sugagna mana ra, ghotilo mala diꞌanagnafa nei tanhi eghu fari hotei grengatha nei olta. Ghotilo tarai eghu ka Mana, “Lord God, kokhoni ghami, thosei snakredi naiknodi keha kantri igre mala cheke fapari ghami nei cheke fadiꞌa ghami eghu. Eigna thofno diꞌa fara te cheke eghu mare na, ‘Aheva gne nomi God ghotilo na?’ ”

Lordginau fablahini glose igne mala ke keli fapulo

¹⁸ Aonu naiknore ne tughu nagnafa, eghuteuna Lord ne ghatho tahuni nogna glose na ne kokhonidi nogna naiknore.

¹⁹ Lord ne fanomho ka nodi tharai naiknore ne cheke eghu, “Iara ginauna tusu ari kmana gano, waen nei oliv oel eghu ka ghotilo mala keli tami ghotilo. Eghuteuna naiknodi keha kantri igre ginauna theome tangomana nate cheke fadiꞌa ghami ghotilo na.

²⁰ “Iara ginauna brue teidi cheche teke mei funudi ke raru igre, kehare mala tei ke mata namono nagou. Iara na brue teidi kehare ke maghati Thongna Lehe igre. Eghuteuna tothoghei cheche teke mei leghu lahu igre iara na brue teidi ke mosu Thongna Mediterenian. Cheche igre ginauna tei lehe nei siri eghu jare. “Uve, iara ginauna goigoni fahui glepo igre, naugna reꞌe ne ei puhi biꞌo ka ghotilo.

²¹ Iagho glose! Thosei mhaghu. Iagho gleale'a nei kelitamu eghu, naugna iara edi glepo te biꞌo igre mala togho nigho iagho.

²² Ghotilo glepo te tautagu ra! Ghotilo thosei mhaghu. Buburu ra kela thugru fapulo. Gaju ra kela ure fapulo. Eghuteuna gaju fig nei grep teura jaola kela ure fapulo.

²³ Ghotilo naiknomi ka namono Saion! Ghotilo gleale'a ka unha teke edi iara nomi Lord nei nomi God, iara eni igne mala togho ghami ghotilo. Ka narane te joꞌu ghotilo na, iara na snakre mei nakhete mala karha gano te joꞌu ghotilo ka nagare ra, jateula teke eni iara ka ghotilo tifa ia eghu.

²⁴ Uve, vido te mala fagagae wit nei rais bali teura ginauna fodu ka gano, eghuteuna dis biꞌo te mala poji grep nei oliv oel teura ginau fodu salaꞌui ka waen nei oel.

²⁵ “Iara ngala teke kuru meidi tothoghei cheche te goigoni ghami ghotilo igre. Nu iara nake tusu fapulo ka ghotilo gobigna lepo teke goigoni fahui cheche igre.

²⁶ Ka narane igre, ghotilo ginauna nake gleale'au, naugna ghotilo ginauna nake au ghemi kmana gano. Ghotilo ginauna cheke fakelini nanghagu iara nomi Lord nei nomi God, naugna iara neke edi kmana glepo te keli ranghi ghami ghotilo. Eghuteuna theo kaisei naikno nate famamaja ghami ghotilo na.

²⁷ Ghotilo maemi Israel, ghotilo ginauna lase fakeli ghau iara nomi Lord nei nomi God te au balumi ghotilo. Theo kaisei god aheva nga Iara ngala. Ghotilo nogu naikno iara ra na theo kaisei naikno nate famamaja ghami ghotilo na.”

Nogna NaraneLordna ginau mei

²⁸ Lord ne cheke eghu, “Ke leghugna igne, iara ginauna snakreni Tharungagu na mala soru mei au baludi naikno te gnafa igre. Thumi gaꞌase nei thumi nalhaꞌu teu ghotilo are ginauna toutonuni chekegu iara na jateula mae profet eghu. Mae biꞌo gre ginauna mifi, eghuteuna mae majaghani re ginauna filodi keha nafnata mifi te nhogri.

²⁹ Ka narane tuana, iara ginauna na kuruni Tharungagu na mala au baludi mare gnafa, neubane mae nalhaꞌu sneka, ba gaꞌase sneka.

³⁰ Ka narane tuana, iara ginauna edi keha fagaglana biꞌo ka maloa kligna nei ka nauthoglu pari igne. Uve, dadara, khaꞌaghi nei gagahu eghu ginauna thakle mei.

³¹ Naprai gne ginauna romno soru, eghuteuna glaba gne ginauna ukru jateula dadara eghu. Aonu ke leghugna igne, Nogna Narane Lord te mala fatedi naiknore igne ginauna thoke mei. Igne kaisei narane te mala mhaghuni naiknore.

³² Nu ihei te tore ka iara Lord te mala toghoni ka narane igne teuna, iara ginauna fakarhini naikno tuana. Iara neke kulu cheke ranghidi naikno te gnafa te au ka Thogele blahi Saion, eghuteuna keha naikno te au ka namono biꞌo Jerusalem ginauna rikhani glehe na. Naikno te vahi fadelei iara igre na theome lehe.”