Profet Joel 1 - Buka Blahi Ka Cheke Holo

Cheke ululahu

¹ Lord ne cheke ka mae Joel thugna mae Petuel.

² Ghotilo naikno te gnafa ra, mae biꞌo ra baludi naikno te gnafa ra, ghotilo fanomho mei ka nogu cheke iara igre. Nu iara na kulu ghusna ghami ghotilo. Glepo te edi gognaro igre neke edila ka ghotilo ba ka vikemi teku ghotilo tifara?

³ Ghotilo toutonu ranghidi thumire glepo igre. Eghuteuna thumi ghotilo are ginauna jaola mala ke toutonu ranghidi thudi gaꞌase nei thudi nalhaꞌu nate karha mei thogheiro re.

⁴ Uve, fati nafnata cheche teke kafe mei ghamu fateo khakladi glepo teke joꞌu ka nagare ra. Unha teke theome ghamu tothoghei cheche ululahu igre, fapea tothoghei cheche igne teke mei ghamu fateo na. Eghuteuna unha teke salaꞌui ka fapea tothoghei cheche igre teke mei ghamu fahui fatilo tothoghei na, eghuteuna ke leghu na, fafati tothoghei cheche igre teke mei ghamu te ghilei theo kaisei glepo te salaꞌui na.

⁵ Ghotilo mae te koꞌu te thaviru ra, ghotilo dofra mala tanhi. Ghotilo mae te lase koꞌu waen ra, ghotilo mala jaola mala tanhi, naugna grep te mala eꞌei waen majaghani ghotilora la gnafahi.

⁶ Cheche igre kafe thugha ne mei jateula kaisei armi biꞌo neu ne mei goigoni fateo noda namono tahati igne. Cheche igre kmana fara nei nheta fara eghu, theo kaisei naikno te nheta jateula cheche igre teuna. Eghuteuna jaola theo kaisei naikno te tangomana te kahadire. Aonu kheꞌidi cheche igre fnonu fara jateula kheꞌi lion eghu.

⁷ Cheche igre goigonidi fara gheda grep nei gheda fig teu tahati igre. Cheche igre ghamu fateo gulidi nei gregedi teu gaju igre la gnhagha la ghilei lehe, eghuteuna theo kaisei glepo te salaꞌui ka reꞌe na.

⁸ Eghume, te chekeni iara ka ghotilo na, ghotilo te gnafa na, ghotilo mala diꞌanagnafa nei tanhi eghu, jateula kaisei gaꞌase te tanhi kate lehe mae nalhaꞌu teke magnahagheni naꞌa ra eghu.

⁹ Gognaro na theo kaisei gano, ba waen te mala fafara ka sugagna Lord. Igne te diꞌanagnafani nei tanhini teu mae pris te loku ka Sugablahi igne.

¹⁰ Uve, glose igne jateula diꞌanagnafa nei tanhi eghu, naugna nagare wit, grep, nei oliv teu igre la kafe lehehi.

¹¹ Ghotilo mae te loku ka nagare ra, ghotilo na diꞌanagnafa. Ghotilo mae te reireghi nagare grep ra, ghotilo tanhi. Naugna wit, rais, bali, nei gano te gnafa teu ka nagare na igre la hui ka cheche.

¹² Grep nei fig teu igre la lehehi. Uve, keha nafnata gaju te mala ima naikno igre la jaola la lehehi. Eghume, gobigna lepo te mala fagleꞌani nagnafagna naikno na igre la gnafahi ka cheche.

Naiknore mala figri ke pulo kaLord

¹³ Ghotilo mae pris te mala fafara ke kligna olta ra, ghotilo pipichi ka pohe te thona, fagaglanagna te diꞌanagnafa ghotilo na. Ghotilo tei tanhi ghilei rane ka Sugablahi gno, naugna gognaro na theo kaisei gano, ba waen te mala fafara ka noda God na.

¹⁴ Kilo fodu meidi naikno ra mala cheke faheta ranghidi mala thosei ima kaisei gano. Uve, kafe kilo meidi mae mala baubatu nei naiknodi Juda teura mala kafe mei ruma haghe ka Suga gna Lord noda God mala tanhi ka mana.

¹⁵ Naugna nogna narane Lord te mala fatedi naiknore ginauna ninhigrana fara. Narane igne la namo meihi, eghuteuna Lord mae ihei te au nolaghi fateoteꞌo igne ginauna mei goigoni fahui gobigna lepo ka nauthoglu igne.

¹⁶ Tahati la filo tathadahi te theo gano te mala fafara na, eghuteuna tahati gognarona theome tangomana te gleale'a na ka narane te tei tarai ka Sugagna Lord.

¹⁷ Khatu sisi teke joꞌu ghotilora la kafe lehe la gnafahi, naugna glose igne ne moja. Eghuteuna theo kaisei khatu te au teu te mala joꞌu gognarona. Eghuteuna suga te mala lilisei ganora krogha la groꞌe soru pari.

¹⁸ Buluka ra la rofo la theome au snoto la tanhi tafri, naugna theo kaisei buburu te mala ghamu na. Uve, sipu gre la jaola la paradi fara kate rofo na la ghilei nhubradi kolho.

¹⁹ Lord, iara tanhi ka iagho, naugna buburu nei gaju teu igre jateula teke gnhubra ka khaꞌaghi ra lau la mojadi.

²⁰ Gobigna lepo te tautagu ka namhata ra la tanhi ari ka iagho, naugna khoꞌu igre la thofno krango, eghuteuna gaju igre la lehehi.