Profet Jeremaea 52 - Buka Blahi Ka Cheke Holo

Naoka na mei goigoni ni Jerusalem

¹ Mae Sedekaea neke varadaki kaisei finogha gna kate king mana Juda igne. Mana neke funei fruni Jerusalem nabagna nabotho kaisei finogha. Mana neke karha ka thaugna Libna, nangha gna na Hamutal thugna mae Jeremaea. (Jeremaea igne theome profet Jeremaea).

² Mae Sedekaea ne theome leghuni cheke gna Lord na ne tapla jafra fabrahu ka nakhibo, jateula teke eni king Jehoeakim tifa ia neu.

³ Lord diꞌatagna fara ka naiknodi Jerusalem ghe Juda igre ne khi fajifladi ka nogna namono na. Aonu King Sedekaea ne mamagra ka King Nebukadnesa gna Babilonia.

⁴ Aonu, ka fanheva finogha te king mae Sedekaea Juda, ka fabotho narane gna fabotho nhigra te king mana igre, King Nebukadnesa gna Babilonia igne ne haghe balu nogna armi ne mei magra Jerusalem. Mae igre mei ne au ke kosi Jerusalem, eghuteuna mare nali glose ne lithui ka gringni gna namono na mala tangomana mare te apla te ruma lamna te mala magra na.

^5-6 Mare theome magnahagheni kaisei naikno te ruma ba te jifla ka namono na. Kate thokeni te nabotho kaisei finogha gna King Sedekaea, naikno te gnafa te au ka namono Jerusalem igre ne rofo fara, naugna gano na la nhighohi te mala ghamu na.

⁷ Ka fafati nhigra ka finogha tuana, nei ka fanheva narane igne, mae soldia di Babilonia igre paꞌe soru gringni gna namono na ne ruma lamna. Neuba mae soldia igre ne kegra faligohoni namono na, king Sedekaea ne jifla Jerusalem bongiro balugna nogna tothoghei soldia na. Mare ne tei salaꞌu ka nogna nagare mae king na ne jifla farihoteidi ka grengatha farihoteidi phei gringni thinare. Mare rikha ne tei posa ka glogu biꞌo ka Khoꞌu biꞌo Jordan.

⁸ Nu mae soldia di Babilonia igre ngolho leghudi ne tei thokeni King Sedekaea ka glogu rhegna namono Jeriko, nu nogna soldia mae king igre ne rikha kokoni mana.

⁹ Mare lokini mana jare atha ne tei ka King Nebukadnesa, te au ka namono Ribla ka nohi Hamat. Ka namono igne, King Nebukadnesa ne fateni mana.

¹⁰ Jare Ribla mare ne aknu falehe thugna mae Sedekaea re kate filo teu mana na. Mare jaola ne aknu falehe ne gnafa mae biꞌodi Juda.

¹¹ Aonu ke leghugna igne, mare ne bilo koko phei tathagna mae Sedekaea re, eghuteuna mare haru khame gna manare ka chen atha ne tei mala sosolo Babilonia. Mana au neu ka sosolo jare Babilonia ne ghilei lehe.

Maedi Babilonia ne goigoni ni nogna SugablahiLord

¹² Ka fabotho nheva finogha te king mae Nebukadnesa Babilonia, ka fabotho narane gna falima nhigra gna mana igne, mae Nebusaradan mae ihei te mae komanda biꞌo ka nogna armi king igne, mana ne haghe Jerusalem.

¹³ Mana ne gnubra ka khaꞌaghi nogna Sugablahi Lord na, nogna suga biꞌo king na, nei suga te gnafa Jerusalem. Mana gnubra ne hui suga ulu te gnafa ka namono na.

¹⁴ Nogna soldia manare tei ne paꞌe soru gringni te gnafa te au ligohoni namono na.

¹⁵ Eghuteuna Komanda Nebusaradan ne atha keha naikno te kuma, iheire teke au faleghu teku Jerusalem igre, iheire te lase edi glepo te keli, nei iheire te lisa laodi thedi ka king gna Babilonia.

¹⁶ Nu mae Nebusaradan ne lisei faleghu iheire te tharuma'eidi naiknore mala loku nei tobi nagare grep eghu.

¹⁷ Hatimare mae soldiadi Babilonia igre ne atha phei khegra biꞌo gna nogna Sugablahi Lord teke hohoro ka bras, baludi glepo biꞌo te mala toho khoꞌu te kiloi mare Thongna. Mare atha ne tei glepo igre Babilonia.

¹⁸ Mare jaola atha ne tei baket mala lilisei nakrofu, sevol ikodi, glepo mala falehe juta, dis, tapera, baludi keha glepo igre mala fafara ka Sugablahi teke hohoro ka bras.

¹⁹ Mae Nebusaradan jaola ne atha glepo teke horo mare ka gol nei silva. Glepo igre: dis ikodi, nei tapera mala atha sisibe ngaja, dis mala lilisei dadara mala fafara nei suspen tapera mala gahu insens nei gaju kadol nei dis mala totoho waen.

²⁰ Tifa na nogna mae gloku mae King Solomon igre neke atha bras neke horo phei khegra, eghuteuna kaisei tangk biꞌo, eghuteuna nabotho phei mumuju buluka nalhaꞌudi te loku haghegna tangk igne, nei kat mala pala khoꞌu. Eghuteuna glepo te horo ka bras igre theome tangomana te fagefe haghe ka skel na, naugna thono tahu fara.

²¹ Phei khegra igre brahudire nhana mita, eghuteuna krepadire, thokeni namno mita. Glamnadi phei khegra igre kafe kora, eghuteuna thutadi geridire nhana sentemita.

²² Phaꞌudi phei posi igre, mare neke horo ka bras, eghuteuna haghedi phaꞌudire jaola thokeni phei mita varadaki sentemita. Mare lalaoni phaꞌudi phei posi igre ka bras, nei jaola lalaoni mumujudi sisi pomegranet.

²³ Ka phei phaꞌu igre, mare lalaoni kaisei gobi mumuju sisi pomegranet. Ihei te kegra ke parigna posi igne tangomana te filodi kolho nheva salei namnoi, eghuteuna keha fati mumuju ke kligna gna bras igne.

Naiknodi Juda jifla kokoni nodi namono na ne tei Babilonia

²⁴ Nebusaradan mae ihei te komanda ka nogna armi king igne, mana ne lokidi mae pris ulu Seraea, ghe pris Sefanaea baludi thilo mae biꞌogna nogna Sugablahi Lord.

²⁵ Eghuteuna mana ne lokini nodi komanda hatimare mae soldia baludi fitu mae nogna advaesa king gna Juda. Jaola mana ne lokini mae biꞌo teke huhurudi maedi Juda teke tei ka armi tifa ra, baludi keha namno salei mae biꞌo te au teu Jerusalem.

^26-27 Mae Nebusaradan athadi mare ne tei ka mae King Nebukadnesa te au teu ka namono Ribla ka nohi Hamat ke raru. Aonu mae King Nebukadnesa ne aknu falehe nogna soldia manare. Aonu maedi Babilonia igre ne atha naiknodi Juda re ne jifla kokoni mare nodi kantri na mala tei au sosolo ka keha kantri delei.

²⁸ Nabadi naikno te atha te tei mae Nebukadnesa Babilonia igre eghu agne: Ka fafitu finogha te King mae Nebukadnesa Babilonia igne, thilo thogha varadaki thilo naiknodi Juda ne tei.

²⁹ Ka fabotho nhana finogha gna mana na, nhana gobi tolufulu phei naikno funudi Jerusalem ne tei.

³⁰ Eghuteuna ka favaradaki thilo finogha gna mana na, fitu gobi phiatutu glima naiknodi Juda, mae Nebusaradan nogna komanda ka nogna armi king igne atha ne tei naikno igre. Nabadi naikno te gnafa igre ne thokeni fati thogha namno gobi.

King Evil-Merodak ne snakre teini mae King Jehoeakin

³¹ Tolufulu fitu finogha te au teu mae King Jehoeakin ka sosolo Babilonia igne, mae Evil-Merodak ne king gna Babilonia. Ka favaradaki glima narane gna fabotho phei nhigra ka finogha gna mana igne, mae king ne atha fajiflani mae King Jehoeakin ka sosolo, eghuteuna snakreni mala snagla tei mana.

³² King Evil-Merodak ne keli ranghini mana, eghuteuna mana ne fafnaknoni fara mana salaꞌudi keha king te au balugna mana Babilonia.

³³ Aonu King Jehoeakin ne rusu koko nogna pohe sosolo na ne tusu lao pohe majaghani ka mana. Eghuteuna leuleghu narane funu ka narane igne te ghilei gnafa nakarhagna na, mana ghamu koba ka tevo balugna king.

³⁴ Eghuteuna leuleghu narane na, king gna Babilonia igne mana tufa gano unha te magnahagheni King Jehoeakin ne ghilei thokeni narane te lehe mana na.