Profet Jeremaea 49 - Buka Blahi Ka Cheke Holo

Nogna chekeLordeigna Amon

¹ Igne nogna cheke Lord eigna Amon. Mana neke cheke eghu, “Ne faꞌunha si mumuju god Milkom gne te magnahaghei khotogna nodi vido glose vikegna mae Gad ignea? Ne faꞌunha si naiknodi Amon gre te au ka nodi vido glose mare igrea? Puhi te eni ghotilo igne jateula te theo kaisei naikno te au agne Israel te mala reireghini teke nogna vido glose mae kmadi na ia eghu signe!

² Nu kate thoke mei narane na, naikno gna namono biꞌo Raba ginauna nomhini te kufli mae naokare. Mare ginauna paꞌe sukha namono igne, eghuteuna mare ginauna gnubra ka khaꞌaghi namono te gnafa te au faligohoni namono igne. Israel ginauna mei brue fajifladi naiknodi Amon teke atha fajifla mare igre.” Igne cheke gna Lord.

³ “Ghotilo naiknomi Hesbon! Ghotilo tanhi fabiꞌo balu diꞌanagnafa, naugna mae naoka la mei goigonihi namono Ai. Ghotilo naiknomi Raba, ghotilo eha fabiꞌo balu diꞌanagnafa! Ghotilo pipichi ka pohe thona, fagaglana eigna te diꞌanagnafa nei tanhi teu ghotilo na. Ghotilo ginauna chari tafri ke lamna namono, naugna naoka ginauna mei atha tei delei ka keha vidoi nomi mumuju god Molek ghotilo igne, baludi mae pris nei nomi mae funei teu ghotilo are.

⁴ Ghotilo cheke fahaehaghe koba eidi famane glose ka glogu te karha kmana gano tagna. Ghotilo rouronu ka nomi dedeire, eghuteuna ghotilo neke tei koko ghau iara jateula sua gaꞌase te tei kokoni kmagna na ia eghu. Eghuteuna ghotilo neke cheke eghu, ‘Theo kaisei naikno nate ulu ghita tahati na!’

⁵ Nu igne unha te chekeni iara ka ghotilo na, iara ginauna kuru ari naikno te gnafa te au faligoho ghami ghotilo are mala thono mhaghu nomi fara ghotilo. Mare ginauna brue ghami ghotilo hui, eghuteuna theo kaisei naikno nate au te mala togho ghami ghotilo na.

⁶ “Nu ke leghu na, iara ginauna nake fakekheli fapulo nakarhadi naiknodi Amon.” Igne cheke gna Lord.

Nogna chekeLordeigna Idom

⁷ Lord mae ihei te au nolaghi fateote'o igne ne cheke eghu ka naiknodi Idom, “Ulu lahu na, ghotilo iheire te au ka namono Teman igre neke au nodi famane gaoghatho te keli nei glalase eghu. Gognarona ba? Nomi famane gaoghatho te keli nei glalase teu ghotilo ra la gnafahi si ra?

⁸ Ghotilo te au namono Deda ra, ghotilo rikha tei poru lamna khora thina! Naugna iara ginauna para ghami ghotilo kate thoke mei puhi biꞌo ka vikegna Iso!

⁹ Kate ukli sisi grep na, naiknore lilisei faleghu koba keha sisi grep maladi iheire te kuma. Eghuteuna kate mei bongiro mae te blau na, mana tangomana te mei atha kolho unha te magnahagheni mana na.

¹⁰ Nu iara ginauna mei atha nomi gobigna lepo ghotilo vikegna mae Iso ra. Eghuteuna iara ginauna ari hirodi nomi vido mala poru ghotilo are, mala theo kaisei vido aheva nga nate rikha te tei poru ghotilo na. Iara ginauna aknu falehe mae te gnafa ka vikegna Iso balu thudi, kheradi nei vikedi teure.

¹¹ Nu ghotilo thosei nangadi goro sua te lehe idodi nei kmadi teure. Iara ginauna reireghidi. Eghuteuna goro naikno biꞌo te lehe khetodi ra, rehati tangomana te rouronu ghau iara na.”

¹² Igne unha te chekeni Lord: “Jame ihei te doglo na, mala koꞌu ka kapu te fodu ka diꞌatagu iara gne, ihei ka ghotilo nate theome koꞌu ka kapu igne na? Te chekeni iara ka ghotilo na, papara igne mala kafe thoke ghami ghotilo gnafa.

¹³ Iara nhaꞌa chekehi ka nanghagu thegu te mala roꞌeni nomi namono biꞌo ghotilo Bosra. Eghuteuna kate ghathoni igne, naiknore ginauna rhana nodi fara ka unha nate thoke mei ka mare na. Mare ginauna tibrini namono igne mala thoke mei puhi biꞌo ka naiknore. Eghuteuna namono te gnafa te au faligohoni namono igne ginauna theome tangomana na teke kegra fapulo na.” Igne chekegna Lord.

¹⁴ Lord neke kuruni kaisei mae mala atha tei nogna cheke na ka kantri igne. Iara nomhinihi nogna cheke mana igne. Mana neke cheke eghu ka mare, “Gognarona ghotilo tarabana mala tei magra tahati ka naiknodi Idom.” Lord ne cheke eghu ka naiknodi Idom.

¹⁵ “Ghotilo naiknomi Idom! Iara ginauna lisei soru ghami ghotilo ke paridi keha kantri te gnafa igre, eghuteuna kantri igre ginauna tirodi ghami ghotilo.

¹⁶ Ghotilo neke famamhaghu naikno, eghuteuna ghotilo fahaehaghe ghami themi fara. Ghotilo au ka thoa ke kligna thogele, eghuteuna gaoghathomi ghotilo na, ne karha nomihi eghu. Nu gaoghatho igne theome tutuani kolho. Neuba ghotilo ne au ke kligna thogele jateula gnoku gaghata neu, nu iara ginauna atha fapari ghami ghotilo.” Igne chekegna Lord.

¹⁷ “Iara ginauna roꞌeni Idom, eghuteuna naikno te gnafa nate filoni igne ginauna cheke faparini namono igne. Iheire te tei salaꞌu ka vido igne na ginauna rhana nodi fara na cheke fadiꞌa ni.

¹⁸ Idom gne ginauna groꞌe jateula teke roꞌedi iara Sodom ghe Gomora tifa baludi namono teke au faligohodi phei namono igre ra eghu. Na jateula tuana eghu theo kaisei naikno nate au tagna na. Igne cheke gna Lord.

¹⁹ “Naoka na ginauna mei jateula lion te jifla mei rhegna Khoꞌu biꞌo Jordan te mei ka vido te au sipu tagna ra eghu na megei nga mei. Eghuteuna naiknodi Idom ginauna rikha kokoni nodi kantri na. Aonu iara ginauna vavahi kaisei mae te magnahagheni iara na mala funei fruni ka kantri igne. Theo kaisei mae jateula iara teuna! Ihei gne tangomana nate tapla fapari ghau iara na? Thono theo fara. Eigna theo kaisei mae te funei fruni te au nogna nolaghi te mala tapla fapari ghau iara na.”

²⁰ Ghotilo fanomho fakeli ka unha te ghathoni Lord nate eni ranghini Idom, nei ka namono biꞌo Teman. Naoka na ginauna mei jateula lion te mei lolhoku sipu ikoi na te pala te tei ghamu ia eghu. Eghuteuna mare ginauna korho fajifla goro suadi Idom, aonu mare ginauna goigonidi fara nodi namono re.

²¹ Kate uluni mae naokare kantri tuana, glose igne ginauna nghali tongana. Eghuteuna iheire te au khaba fara rhegna Thongna Ukru igre ginauna nomhini te tanhi fabiꞌo naiknore.

²² Filo si ghotilo! Naoka na ginauna ghosei mei jateula gaghata biꞌo te ghosei tivi te sukha te atha ghegna gano ra na eghu ka namono Bosra. Ka narane tuana, nodi soldia maedi Idom ginauna mhaghu nodi fara jateula gaꞌase te mhaghu nogna fara kate namo karha thugna na ia eghu.

Nogna chekeLordeigna Damaskas

²³ Igne nogna cheke Lord eigna Damaskas. Mana ne cheke eghu, “Phei namono Hamat ghe Apadi ginauna nomho thoutonu diꞌa, eghuteuna mare ginauna nanga nodi fara nei mhaghu nodi fara eghu. Mare ginauna diꞌa thinidi fara jateula mae te au lamna vaka kate malu ra eghu.

²⁴ Damaskas ginauna glaꞌe sukha na rikha. Mare na mhaghu na theome ghaoghatho fakeli. Mare na jateula gaꞌase te kabru ghegna fara kate namo karha thugna ra eghu.

²⁵ Tifa na iara neke magnahagheni fara namono te fnakno fara igne. Eghuteuna naiknore kelitadi fara ka namono igne. Nu gognarona namono igne la diꞌahi! Naiknore ginauna tei kokoni namono igne.

²⁶ Mae majaghanire ginauna lehe naga tafri thinidire fari hotei nabrou ka namono na. Uve, mae te nheta ka magrare ginauna lehe ka naoka mala au kmu kolho.

²⁷ Iara ginauna kuru mei kaisei khaꞌaghi biꞌo mala gnhubra gringni te bara ligoho ka thina tuana. Eghuteuna nogna vido mala poru mae King Ben-Hadad are ginauna gnhubra fahui.” Igne cheke gna Lord, mae ihei te au nolaghi fateote'o.

Nogna chekeLordeidi phei namono, Keda ghe Haso

²⁸ Lord neke tusu lao cheke igne ka vikedi mae Keda ghe mae Haso. Kaisei fata, King Nebukadnesa gna Babilonia balu nogna armi neke uluni mae Haso ka magra na. Eghuteuna Lord neke cheke eghu, “Ghotilo maemi Babilonia! Ghotilo tarabana mala tei magra ka vikegna Keda, eghuteuna roꞌedi iheire te au ke maghati!

²⁹ Ghotilo atha tei nodi suga tapuale, glepodi suga te gnafa nei nodi sipu, nodi nanigot, nei kamel teu mare ra. Ghotilo ginauna nomhidi mare na eha eghu fabiꞌo, ‘Unha te au falithui ghita tahati igre te mhaghudi tahati re!’

³⁰ “Ghotilo naiknomi Haso ra! Ghotilo faghose rikha tei poru lamna khora thina! King Nebukadnesa gna Babilonia tarabanahi te mala mei magra te mala goigoni ghami ghotilo na.

³¹ “Ghotilo naiknomi Babilonia ra! Ghotilo tarabana mala tei magra ka iheire te au fakeli nodi te theo kaisei glepo te diꞌa te mala nangani mare na. Te ghathoni mare na, mare au fakeli nodiu kolho eghu. Eghuteuna gringnigna nodi namono mare igne theome bibilakhi famaku. Eghuteuna theo kaisei naikno nate toghodi mare ka magra na.

³² Nodi kamel, sipu nei nanigot teu mare are ginauna mala nomi ghotilo. Eghume, iheire te au ka vido te khaba fara ka namono nagou, puhi biꞌo ginauna thokedi mare.

³³ Haso ginauna krogha mala au nodi khuma mata kolho, eghuteuna theo kaisei naikno nate au tagna na.” Igne cheke gna Lord.

Nogna chekeLordranghini Elam

³⁴ Theome raugha ke leghugna te kegra king mae Sedekaea Juda igne, Lord ne cheke ka profet Jeremaea mala cheke eigna kantri Elam.

³⁵ Lord mae ihei te au nolaghi fateote'o igne ne cheke eghu, “Maedi Elam igre mare lase fada ka phaloho. Igne nogna nolaghi kantri igne na. Nu iara ginauna lolhopa fahui nodi phaloho mare tuare.

³⁶ Iara ginauna kuru mei naoka funu ke raru, ke mata, ke maghati nei ke mosu mala mei roꞌedi mare. Igne ginauna mei jateula nuri biꞌo eghu ka mare. Eghuteuna nuri biꞌo igne ginauna pala tafridi mare tei ke raru, ke mata, ke maghati, nei ke mosu eghu ka nauthoglu igne.

³⁷ Iara ginauna snakre lao ka khamedi hatimare mae naoka mala aknu falehe mare. Iara diꞌatagu fara ka mare, eghuteuna iara ginauna snakre mei puhi biꞌo mala thokedi mare. Iara ginauna kuru mei naoka mala mei magra ka naiknodi Elam.

³⁸ Iara ginauna aknu falehe nodi king mare na baludi nogna mae biꞌore, eghuteuna iara ginauna tughudi mare mala jateula king eghu mala funei frunini Elam.

³⁹ “Nu ke leghu na, iara ginauna tuthughu nakarhadi naiknodi Elam mala ke naikno keli fapulo.” Igne cheke gna Lord.