Profet Jeremaea 42 - Buka Blahi Ka Cheke Holo

Mae Jeremaea ne cheke faheta ka mare mala thosei tei Ijep

¹ Mae Johanan thugna mae Karea ghe mae Jesanaea thugna mae Hosaea, baludi keha mae komanda ka armi, nei naikno te gnafa te fnakno, ba te theome fnakno, mare te gnafa na jaola ne kafe tei filoni mae profet Jeremaea.

² Mare ne cheke eghu ka mana, “Iagho fanomho ka unha te toreni ghehati igne. Toreni Lord nou God, mala kafe togho ghita tahati gnafa te aunga teu gre. Tifa na tahati neke kmana, nu gognarona tahati la katha bua kolho.

³ Iagho toreni Lord nou God mala falalase ka tahati unha nabrou nate leghuni tahati na, nei unha te magnahaghei nei eni teu tahati na.”

⁴ Jeremaea ne cheke eghu, “Iara laseni unha te magnahagheni ghotilo na. Iara ginauna tore ka Lord nomi God, jateula te toreni ghotilo na eghu. Iara ginauna toutonu ka ghotilo gobigna lepo te chekedi mana re, eghuteuna iara na theome poruni kaisei glepo ka ghotilo.”

⁵ Mare ne cheke eghu ka mana, “Ghehati nhaꞌa cheke mala leghudi unha Lord nou God te chekedi ka iagho re. Jame te theome tajini ghehati nhaꞌa cheke igne na, Lord ginauna tangomana te fate ghami ghehati na.

⁶ Eghume, ghehati tore nigho iagho mala tarai ka mana eimi ghehati. Eghuteuna neuba Lord noda God ne tusu mei cheke tughu te gle'ani ba te theome gle'ani ghehati na, nu ghehati ginauna leghuni ngala. Naugna jame te leghuni mana ghehati na, ghehati ginauna au fakeli nomi fabrahu.”

⁷ Nabotho narane ke leghu, Lord ne cheke ka mae Jeremaea.

⁸ Aonu mae Jeremaea ne kiloni mae Johanan, thugna mae Karea, nei keha mae komanda balugna, nei jaola keha naikno te gnafa te fnakno ba te theome fnakno mala kafe mei ka mana.

⁹ Mana ne cheke eghu ka mare, “Ghotilo neke kuru ghau iara mala tore ka Lord unha te magnahagheni ghotilo na. Igne unha te chekeni Lord nodi God maedi Israel:

¹⁰ ‘Jame te au fabrahu ghotilo agne Juda na, iara ginauna reireghi ghami ghotilo, eghuteuna iara ginauna theome tangomana te fapari ghami ghotilo na. Iara ginauna na jateula kaisei mae te babana suga maku te theome tangomana iara teke paꞌe soru, ba jateula kaisei nagare te theome tangomana iara te rathu koko. Iara kokhoni ghami ghotilo eigna puhi biꞌo te eni iara te goigoni ghami ghotilo igne.

¹¹ Gognarona ghotilo mhaghuni king gna Babilonia, nu ghotilo thosei mhaghuni mana. Iara ginauna au balumi ghotilo mala fakarhi ghami ghotilo.

¹² Iara ginauna kokhoni ghami nei keli ranghi ghami eghu ghotilo, eghuteuna snakre ghami mala ke figri ka nomi thofno namono re.’ ” Igne cheke gna Lord.

^13-15 Profet ne cheke eghu, “Ghotilo maemi Juda te au teu ka namono igne ra! Famane fanomho fakeli ka cheke gna Lord igne! Glahu ghotilo tiromi leghuni Lord nomi God na, nei cheke eghu, ‘Ghehati ginauna tiromi au ka namono igne. Ghehati ginauna tei au Ijep. Ka namono tuana ghehati na theome magra, eghuteuna ghehati ginauna theome nomhidi naogladi khufli mala tei magra, eghuteuna ginauna theome rofo.’ Lord mae ihei te au nolaghi fateote'o, nei nodi God mae Israel teu igne ne cheke eghu, ‘Jame te cheke eghu ghotilo na, eghuteuna jame te maku fara ghotilo phaꞌumire, eghuteuna jame te magnahaghei tei au ghotilo Ijep na,

¹⁶ magra te mhaghuni nei narane theo gano te tiromidi ghotilo igre ginauna mei thoke ka ghotilo ka namono tuana, eghuteuna ghotilo te gnafa na ginauna kafe lehe.

¹⁷ Uve, ghotilo te gnafa te magnahaghei fara tei au Ijep igre, ghotilo ginauna na kafe lehe kolho. Keha ka ghotilo ginauna lehe ka magra, eghuteuna kehare ginauna lehe ka grofo, eghuteuna kehare ginauna lehe ka fogra biꞌo, eigna glepo igre ginauna mei thoke ghami ghotilo. Eghuteuna ginauna theo kaisei ka ghotilo nate karha na. Tutuani, theo kaisei nate rikhadi puhi biꞌo nate mei thoke ghami ghotilo ginauna igre.’

¹⁸ Igne unha te chekeni Lord mae ihei te au nolaghi fateote'o na, nei nodi God maedi Israel, ‘Jame te tei ghotilo Ijep na, iara ginauna diꞌatagu fara ka ghotilo, jateula teke diꞌatagu iara ka naiknodi Jerusalem tifa ra eghu. Ghotilo ginauna theome tangomana na teke pulo mei ka namono igne. Kate ghatho ghami ghotilo na, naiknore ginauna rhana nodi fara na cheke fadiꞌa ghami ghotilo. Naiknore ginauna tibri ghami ghotilo mala thoke ghami ghotilo puhi biꞌo.’ ”

¹⁹ Mae Jeremaea ne cheke eghu, “Ghotilo naiknomi Juda te aunga teu ka namono ignera! Lord neke cheke eghuhi ka ghotilo, ‘Ghotilo thosei tei Ijep!’ Ghotilo fanomho fakeli ka cheke te eni iara ka ghotilo gognarogne.

²⁰ Gaoghathomi ghotilo te mei tore ghau iara te mala toreni Lord nomi God igne thofno jafra fara. Ghotilo neke cheke eghu ka iara, ‘Iagho tarai ka nomi Lord God. Iagho chekeni ka ghehati unha te magnahagheni mana na, eghuteuna ghehati ginauna nhaꞌa cheke te mala eni igne.’

²¹ Eghume iara neke chekehi ka ghotilo gobigna lepo teke chekedi mana ka iara re, nu ghotilo theome leghudi kolho nogna cheke mana igre.

²² Naugna igne, te mala laseni ghotilo na, ghotilo te gnafa na ginauna kafe lehe ka magra, ka theo gano nei ka fogra biꞌo.”