Profet Jeremaea 39 - Buka Blahi Ka Cheke Holo

Groꞌe gna Jerusalem

¹ Fabotho nhigra ka fanheva finogha te king mae Sedekaea Juda igne, king Nebukadnesa gna Babilonia igne ne atha nogna armi na ne kegra faligohoni Jerusalem.

² Eghuteuna ka fanheva narane gna fafati nhigra ka fabotho finogha te king mae Sedekaea igne, hatimare mae armi ne roꞌeni gringni gna namono Jerusalem.

³ Kate uluni te atha namono igne, nogna ofisa te gnafa king gna Babilonia igre ne ruma Jerusalem ne gnokro soru ka vido te kiloi mare Farihotei Grengatha: phei mae te kilodi nanghadire, mae Negal-Saresa, nei mae Samga-Nebo, nei mae Sasekim, nei keha mae nogna ofisa biꞌo king.

⁴ Kate filoni King Sedekaea baludi nogna mae soldiare igne, mare ne rikha. Mare jifla Jerusalem bongiro ne tei salaꞌu ka nogna nagare mae king na ne jifla farihoteidi phei gringni thinare ne tei thoke ka glogu rhegna Khoꞌu biꞌo Jordan.

⁵ Nu armi gna Babilonia igne ngolhidi ne tei thokeni mae Sedekaea ka sare Jeriko. Mare lokini mana jare atha ne tei ka King Nebukadnesa, te au teu ka namono Ribla ka nohi Hamat. Jare King Nebukadnesa ne fateni mana.

⁶ Jare Ribla King Nebukadnesa ne aknu falehe thugna mae Sedekaea re baludi hatimare mae biꞌodi Juda kate filo teu mana na.

⁷ Aonu mae Nebukadnesa ne bilo koko phei tathagna mae Sedekaea re. Mana jaola ne haru phei khamegna manare ka chen atha ne tei Babilonia.

⁸ Ka narane tuana, maedi Babilonia igre ne gnubra nogna suga king na baludi nodi suga naiknore, eghuteuna mare jaola ne paꞌe soru gringni gna namono na.

⁹ Komanda Nebusaradan atha naikno teke au faleghu teku ka namono na baludi naikno teke snakre laodi thedi ka khamedi mae soldia re eghu atha ne tei Babilonia.

¹⁰ Nu mae komanda Nebusaradan ne lisa faleghu naikno te kuma te theome khotogna kaisei glepo igre. Nu ka narane tuana, mana ne tusu ranghidi nagare grep nei vido glose.

Mare ne snakre teini mae Jeremaea

¹¹ Nebukadnesa king gna Babilonia igne ne cheke eigna mae Jeremaea ka mae Nebusaradan mae komanda gna nogna armi na vetula igre:

¹² “Ghotilo tei filoni mae profet Jeremaea mala reireghi fakelini mana. Thosei parani, nu eni ranghini unha te chekeni mana na.”

¹³ Aonu mae Nebukadnesa ne kurudi mae biꞌo igre: Mae komanda Nebusaradan, nei mae Nebusasban, nei mae Negal-Saresa, nei keha nogna ofisa biꞌo mae king gna Babilonia teu igre, mare ne tei ka mae profet Jeremaea.

¹⁴ Mare atha fajiflani mae Jeremaea ka hatimare mae soldia te reireghini suga gna king na ne snakre laoni mana ka khamegna mae Gedalaea, thugna mae Ahikam, thugna mae Safan mala ke atha fapuloni ka namono. Aonu mare neke atha fapuloni mana ka nogna suga na, eghuteuna mana neke pulo neke au baludi naikno te au faleghu teu Juda igre.

Lordne farerheta nagnafa gna mae Ebed-Melek

¹⁵ Kate sosolo teu mae Jeremaea ka sugagna king igne, Lord ne cheke eghu ka mana,

¹⁶ “Jeremaea, iagho tei cheke ka mae Ebed-Melek, maegna Kus ia nonomho igne: ‘Igne unha te chekeni Lord, mae ihei te au nolaghi fateote'o nodi God mae Israel: Theome raugha nogu cheke iara eigna puhi biꞌo nate thoke mei ka namono igne ginauna thoke mei tutuani. Iagho ginauna filo tathamu thoke meidi gobigna lepo igre.

¹⁷ Nu Ebed-Melek, iara ginauna fakarhi nigho ka narane tuana. Iara ginauna theome snakre nigho ka khamedi mae te mhaghudi iagho re.

¹⁸ Tutuani, iara ginauna fakarhi nigho. Iagho ginauna theome lehe ka naflahi, naugna iagho ne rouronu ghau iara fabrahu.’ ” Igne chekegna Lord.