Profet Jeremaea 38 - Buka Blahi Ka Cheke Holo

Mare koko laoni mae Jeremaea lamna khora kho'u

¹ Mae Sefataea, thugna mae Matan, mae Gedalaea, thugna mae Pasur, mae Jahukal thugna mae Selemaea, mae Pasur thugna mae Malkaeja. Mae igre ne nomhini thoutonu te cheke eghu mae Jeremaea ka naiknore igne,

² “Lord ne cheke eghu, ‘Iheire te theome rikha te au teu kolho ke lamnagna namono igne na ginauna lehe ka magra, ba ka vido te ninhigrana te theo gano, ba ka fogra biꞌo. Nu iheire te jifla ka namono igne te lisa laodi thedi ka khamedi mae Babilonia igre, mare ginauna theome lehe.

³ Nu igne unha te chekeni iara na: Iara ginauna snakreni armi gna Babilonia mala mei atha namono igne.’ ”

⁴ Aonu mae biꞌo igre tei ne filoni mae king ne cheke eghu ka mana, “Mae igne nabagna te lehe! Nogna cheke mana igre faglaꞌedi fara gaoghathodi noda mae soldia tahati te au teu baludi keha naikno igre. Mae igne theome fariuriu toghodi kolho naikno igre, theo, mana magnahaghei te goigonidi kolho naiknore.”

⁵ King ne cheke eghu ka mare, “Uve, mae Jeremaea gne gognarona au ka khamemi ghotilo. Ghotilo athani mana, eghuteuna ghotilo tangomana te eni unha te magnahagheni ghotilo ka mana na. Iara theome tangomana te chekeni kaisei glepo ka ghotilo na.”

⁶ Aonu mare athani mae Jeremaea ne haru ka phukri ne farurhu soru lamna khora kho'u te au ke kosigna suga sososlo na. Igne nogna seu mae Malkaeja thugna mae king. Eghuteuna mae Malkaeja au ka suga gna king te reireghi teu mare igne. Seu igne krango theo kaisei khoꞌu tagna, nu fodu ka chopu kolho eghu. Mae Jeremaea ne thofno gnokro soru ka chopu igne.

⁷ Nu mae Ebed-Melek kaisei maegna ka kantri Kus, mana kaisei nogna mae nafnakno mae king. Mae igne nomhini te liliseini mare mae Jeremaea lamna khora kho'u igne ne tei filoni king. Ka narane igne, king fanomho fate ka grengatha gna namono te kiloi mare, Nogna Grengatha Mae Benjamin.

⁸ Mae Ebed-Melek jifla ne tei cheke eghu ka mana,

⁹ “Nogu King. Glepo te eni mae biꞌo igre ka mae Jeremaea igne theome doglo. Mare koko soruni mana lamna khora kho'u. Eghuteuna mana ginauna lehe ka grofo jare, naugna gognarona namo theohi kaisei bret te au ka namono igne.”

¹⁰ King nomhini igne ne cheke eghu ka mana, “Iagho atha tolufulu mae ka mae te au balugu iara igre. Eghuteuna ghotilo tei korho fajiflani mae Jeremaea ka khora kho'u igne, mala theome lehe mana jare.”

¹¹ Aonu mae Ebed-Melek atha tolufulu mae balugna ne tei ka kaisei chogho ka suga gna king aheva te lilisei mare nogna famane glepo mae king na. Eghuteuna mare ne atha keha pohe thiꞌatifa ka vido igne atha ne tei ka khora kho'u igne. Mare haru ka phukri ne farurhu soru ka mae Jeremaea.

¹² Mae Ebed-Melek cheke ka mae Jeremaea mala lilisei pohe igre ke pari baegna mala theome fnera mana ka phukri igne. Aonu mae Jeremaea ne leghuni igne,

¹³ eghuteuna mare neke korho fajiflani mana kosi. Mare athani mana ne tei lilisei ka vido aheva te au hatimare mae soldia te reireghi gna nogna suga mae king na.

King Sedekaea ne ghusnani gaoghathogna profet Jeremaea

¹⁴ Ke leghugna igne, King Sedekaea ne kurudi keha mae mala athani mae profet Jeremaea tei ka fatilo grengatha gna nogna Sugablahi Lord na. Kate au teu phiamare na, king ne cheke eghu ka mana, “Profet, iara magnahaghei te ghusna nigho iagho kaisei faghusna, eghuteuna iagho mala cheke tughu fadoglo mei ka iara, iagho thosei pophoru kaisei glepo ka iara.”

¹⁵ Jeremaea ne cheke eghu ka mana, “King, jame te chekeni iara unha glepo te tutuani na, iagho ginauna falehe ghau iara. Eghuteuna jame te tusu ari iara famane cheke te mala togho nigho iagho na, iagho ginauna tirou fanomho.”

¹⁶ Nu King Sedekaea ne cheke faꞌikoi ka mae Jeremaea ne eni kaisei nhaꞌa cheke, ne cheke eghu, “Iara eni nhaꞌa cheke igne ka nanghagna Lord mae ihei te karha te tifa, nei tusu ranghi ghita u karha: Iara ginauna na theome falehe nigho iagho, eghuteuna iara ginauna na theome snakre lao nigho ka khamedi mae iheire te magnahaghei falehe nigho iagho igre.”

¹⁷ Aonu mae Jeremaea ne cheke eghu ka king, “Lord God mae ihei te au nolaghi fateote'o, nei nodi God mae Israel teu igne ne cheke eghu, ‘Jame te lisa lao nigho iagho themu ka khamedi nogna mae biꞌo king gna Babilonia igre, iagho ginauna theome lehe, eghuteuna mare ginauna theome gnubra namono igne. Iagho baludi tharaknamure ghotilo ginauna karha.

¹⁸ Nu jame te theome lisa lao nigho iagho themu ka khamedi mae igre na, iara ginauna lisa lao namono igne ka khamedi mare mala gnubra. Eghuteuna iagho ginauna na theome tangomana te rikhadi mare na.’ ”

¹⁹ King Sedekaea ne cheke eghu ka Jeremaea, “Iara mhaghu nogudi fara keha mae Jiu ka tahati tela rikha teke tei loku fodu baludi mae te naoka ka maedi Babilonia ra. Glahu mae naoka igre lisa lao ghau iara ka khamedi mare, eghuteuna iara ginauna au papara.”

²⁰ Mae Jeremaea ne cheke eghu, “Mare ginauna theome lisa lao nigho iagho ka khamedi mare. Nu igne unha te chekeni iara ka iagho na, jame te leghuni iagho nogna cheke Lord te chekeni iara igne na, iagho ginauna karha.

²¹ Nu jame te tirou lisa lao nigho iagho themu ka khamedi maedi Babilonia igre na, Lord ginauna eni unha teke fakakhana mana ka iara ka kaisei mifi na.

²² Ka mifi igne, iara filodi goro gaꞌase te au nga teu ka sugagna king gna Juda, eghuteuna mae naoka igre ginauna atha fajifladi mala lisa lao ka khamedi nogna mae biꞌo king gna Babilonia. Eghuteuna ka narane tuana goro gaꞌase igre ginauna cheke fadiꞌa eghu nigho iagho: “ ‘Mae thofno kheramu fofodu iaghore, mare chaghi nigho iagho la ulu nighohi. Gognarona ghahemure jofru ka chopu, eghuteuna mae kheramure la tei koko nighohi.’

²³ “Khetomu nei thumu teu iaghore ginauna atha mae naoka mala lisa lao ka khamedi mae Babilonia. Eghuteuna iagho ginauna na jaola theome tangomana nate rikhadi mare na. King gna Babilonia ginauna loki nigho iagho, eghuteuna namono igne baludi gobigna lepo te au ke lamnagna igre ginauna gnhubra dofi lue'di.”

²⁴ Aonu King Sedekaea ne cheke eghu, “Iagho thosei cheke thakleni noda thoutonu tapa igne ka ihei nga glahu lehe iagho!

²⁵ Glahu nomhidi nogu mae biꞌo iara igre u thoutonu te edi iara balumu iagho igre ghusna eghu ka iagho, ‘Iagho toutonu ka ghehati unha teke toutonudi ghopa king ra. Iagho toutonu ka ghehati gobigna lepore, naugna jame te theo iagho na, ghehati ginauna falehe nigho.’

²⁶ Jame te eghu mare na, iagho cheke eghu ka mare, ‘Iara neke toreni king mala thosei ke kuru fapulo ghau ka sosolo ka sugagna mae Jonatan mala lehe iara ka vido tuana.’ ”

²⁷ Eghuteuna ke leghugna igne, mae biꞌo igre ne kafe mei ka mae Jeremaea ne ghusnani mana. Eghuteuna mana ne thofno leghuni unha teke chekeni mae king ka mana igne. Aonu mare ne theome chekeni kaisei glepo, naugna mare neke theome nomhidi nodi thoutonu phia mare igre.

²⁸ Mare ne tajini fabrahu mae Jeremaea ka sugagna king, ka vido aheva te au hatimare mae soldia te reireghi gna nogna suga mae king na ne ghilei thokeni narane te mei mae naokare te atha namono Jerusalem igne.