Profet Jeremaea 37 - Buka Blahi Ka Cheke Holo

King Sedekaea toreni profet Jeremaea mala tarai

¹ Nebukadnesa king gna Babilonia igne ne vahini mae Sedekaea, thugna King Josaea mala king gna Juda.

² Nu King Sedekaea, baludi nogna mae ofisa nei keha naiknodi Juda teu igre ne tirodi fanomho ka cheke te tusu lao Lord ka mae profet Jeremaea igre.

³ Kaisei fata, King Sedekaea ne kilodi mae Jehukal, thugna mae Selemaea, ghe mae pris Sefanaea, thugna mae Masea mala tei toreni mae profet Jeremaea. Phei mae igre tei ne cheke eghu ka mana, “King magnahaghei nigho iagho te tarai ka Lord noda God mala togho ghita.”

⁴ Ka narane tuana, king theome koko laoni neku mae Jeremaea ka sosolo. Aonu mana snagla te tei tafri baludi naiknore.

⁵ Ka narane igre, armi gna Babilonia mei ne bara ligohoni Jerusalem. Eghuteuna kate nomhini armigna Babilonia gne te mei armi gna Ijep igne te mala toghoni Juda na, armi gna Babilonia igne ne jifla Jerusalem neke figri.

⁶ Aonu Lord ne cheke eghu ka mae Jeremaea,

⁷ “Iara Lord, nodi God maedi Israel, igne nogu cheke iara na: Iagho tei cheke eghu ka king gna Juda, mae ihei teke kuru mei nigho ka iara igne, ‘Neuba armi gna Ijep igne ne mei togho ghami ghotilo, mare ginauna na theome tangomana nate mei posa agne na, nu mare nake figri kolho Ijep.

⁸ Eghuteuna armi gna Babilonia igne ginauna nake figri mei ka namono igne mala magra ka ghotilo. Mare ginauna na ulu ghami ghotilo, eghuteuna mare ginauna gnubra fahui ka khaꞌaghi gobigna lepo fateote'o re, eghuteuna theo kaisei glepo nate au na ka namono igne.’

⁹ “Igne unha te chekeni iara ka iagho na: Glahu cheke chaghi eghu mare, ‘Armi gna Babilonia igne ginauna theome tangomana na teke pulo mei agne Jerusalem.’ Nafnata cheke igne theome tutuani! Mare ginauna nake pulo mei!

¹⁰ Neuba ghotilo ne uluni armi gna Babilonia te mei magra ka ghotilo igne, keha mae te fnera ka mare thuru karha neu ka nodi suga tapualere igre ginauna kegra haghe mei gnubra namono igne baludi gobigna lepo te au ke lamnagna.”

King Sedekaea lisei laoni Jeremaea ka sosolo

¹¹ Aonu, armi gna Babilonia igne jifla Jerusalem mala tei magra ka nogna armi king gna Ijep.

¹² Mae Jeremaea jaola ne jifla Jerusalem ne tei ka nohi Benjamin mala tei filoni vido glose te khotogna mana ka nogna vike na.

¹³ Nu kate posa lao mana ka grengathagna bara te kiloi mare, Nogna Grengatha Benjamin teu igne, kaisei nodi komanda mae soldia te mala reireghigna grengatha igne, ne lokini mana. Nanghagna mae komanda igne, mae Iraeja, thugna mae Selemaea, thugna mae Hananaea. Mae Jeremaea theome jifla ngau kosi, nu mae komanda igne fasnotoni mana ne cheke eghu, “Hei! Iagho rikha ghami ghehati mala tei au baludi mae Babilonia!”

¹⁴ Mae Jeremaea ne cheke eghu, “Theo! Iara theome tei mala au baludi mare!” Nu mae Iraeja ne theome fanomho ka mana. Mana lokini mae Jeremaea atha ne tei ka hatimare nogna ofisa mae king igre.

¹⁵ Kate nomhini mae ofisa igre nogna cheke mae komanda Iraeja igre, mare ne diꞌa tadi fara ka mae Jeremaea. Mare ne chekedi hatimare mae soldia igre mala purini mae Jeremaea. Kate purini mana te gnafa na, mare palani mana ne tei ka nogna suga mae Jonatan, nogna minista mae king.

¹⁶ Mare liliseini mana jare ka kaisei chogho lamna glose te romno fara na ne au raugha ka vido tuana.

¹⁷ Keha narane ke leghudi igre, King Sedekaea ne fatei cheke ka mare mala atha fapuloni mae Jeremaea ka nogna suga na. Mana ne ghusna eghu ka mae Jeremaea, “Ba, Lord na cheke ranghi nigho iagho keha nonomho, ba theo?” Mae Jeremaea ne cheke eghu ka mana, “Uve! Lord neke cheke mei ka iara. Mare ginauna lisa lao nigho iagho ka khamedi mae Babilonia!”

¹⁸ Eghuteuna mae Jeremaea neke ghusna eghu, “King, naugna unha sagho te snakredi mare te lilisei ghau iara ka sosolo gnea? Eigna iara theome eni kaisei najafra ranghi nigho iagho, ba ranghidi hatimare nou mae ofisa iagho igre, ba eni kaisei najafra ranghidi naikno te au ka namono igne. Cheke te gnafa te chekedi iara igre thofno tutuani fara.

¹⁹ Nu aheva si nou mae profet iagho teke chekeni mae king gna Babilonia balu nogna armi na ginauna theome mei magra ka noda kantri tahati igne teku gnea?

²⁰ Nogu King! Famane fanomho mei ka nogu cheke iara igre. Iagho kokhoni ghau iara, thosei ke kuru fapulo ghau iara ka sosolo ka suga gna mae minista Jonatan ia glahu lehe iara jare.”

²¹ Aonu King Sedekaea ne cheke faheta ka nogna mae soldiare mala liliseini kolho mae Jeremaea ka kaisei vido ka nogna suga na. Aonu mae profet Jeremaea sosolo neu kolho ka vido igne. Eghuteuna leuleghu narane na, nogna mae soldia mae king igre mare tusu ranghini mana famane bret te keli ne ghilei thoke ka narane te theo bret na.