Profet Jeremaea 36 - Buka Blahi Ka Cheke Holo

Mae Baruk ne iu'iju nogna buka mae Jeremaea igne ke lamna Sugablahi

¹ Ka fafati finogha King Jehoiakim, thugna King Josaea te funei fruni Juda igne, Lord ne cheke eghu ka mae Jeremaea,

² “Jeremaea, funu ka narane gna King Josaea te mei posa gognarogne, iara neke cheke ka iagho eidi phei kantri Israel ghe Juda baludi keha kantri igre. Gognarona iara magnahaghei nigho iagho te atha kaisei pepa brahu mala rioriso soru cheke te gnafa igre.

³ Jame te fanomho maedi Juda igre ka nogu cheke iara igre te tughu nagnafa mare eidi puhi te diꞌa te edi mare igre na, iara ginauna atha fadelei puhi biꞌo teke ghathoni iara mala thokedi mare teku igne. Eghume iara ginauna jaola hata fadelei nakhibodi mare igre.”

⁴ Aonu mae Jeremaea ne kilo meini mae Baruk, thugna mae Neraea. Kate toutonu mae Jeremaea ka mae Baruk cheke teke cheke Lord ka mana igre, mae Baruk ne rioriso soru ka kaisei buka.

⁵ Gnafa teuna, mana ne cheke eghu ka mae Baruk, “Gognarona iara au ka sosolo, eghuteuna mare theome snakre ghau iara te tei lamna ka nogna Sugablahi Lord na.

⁶ Nu ka narane te dangna naiknore te kafe mei tarai ka Sugablahi na igre, iara magnahaghei nigho iagho te tei ka vido tuana. Iara magnahaghei nigho iagho te iu'iju soru chekegna Lord teke rioriso iagho ra. Iagho iu'iju soru cheke igre ka naiknodi Juda te mei funu ka namonodire te kafe khapru mei agne Jerusalem.

⁷ Jame te keli na mare fanomho nei tughu nagnafa eghu ka cheke te eidi iagho igre. Eghuteuna iagho toreni Lord mala atha koko mana nakhibo te edi mare te diꞌatagnadi mana ka mare igre.”

^8-10 Aonu mae Baruk, thugna mae Neraea igne ne thofno leghuni unha teke chekeni mae profet Jeremaea igne. Ka faheva nhigra ka falima finogha te funei fruni King Jehoiakim Juda igre, naiknore au kaisei nodi narane biꞌo. Ka narane igne naikno te gnafa Jerusalem nei iheire te mei funudi ka keha namono Juda teu igre, mare te gnafa na mala dangna. Eghuteuna ka narane biꞌo igne, mae Baruk atha ne tei buka igne ka Sugablahi na ne kegra haghe ke ulugna nogna chogho biꞌo mae Gemaraea, thugna mae Safan mae ihei teke nogna minista king tifa. Chogho igne au ka vido kligna, rhegna grengatha gna Sugablahi te kiloi mare, Grengatha Majaghani. Aonu mae Baruk kegra ka vido igne ne iu'iju soru ka naikno te au ka Sugablahi na igre, nogna cheke Lord teke toutonuni mae Jeremaea te au ke lamna gna buka igne.

Mae Baruk ne iu'iju nogna buka mae Jeremaea igne ka sugagna king

¹¹ Mae Mikaea thugna mae Gemaraea, thugna mae Safan igne ne nomhidi cheke gna Lord te iu'iju soru mae Baruk ka buka na igre.

¹² Aonu, mana ne soru ka sugagna king na ne tei ka nogna chogho mae minista te au ka vido aheva te faidu teu hatimare nogna ofisa mae king igre. Igre nanghadi hatimare mae ofisa te gnokro ka faidu igne: Mae Elisama, nogna minista mae king, mae Delaea, thugna mae Semaea, mae Elnatan, thugna mae Akboa, mae Gemaraea, thugna mae Safan, mae Sedekaea, thugna mae Hananaea, nei keha nogna ofisa langau mae king.

¹³ Mae Mikaea kegra haghe ne toutonu ka mare cheke te gnafa teke iu'iju soru mae Baruk ka buka na igre.

¹⁴ Aonu hatimare mae ofisa igre ne kuruni mae Jehudi, thugna mae Netanaea, thugna mae Selemaea, thugna mae Kusi mala tei ka mae Baruk mala cheke eghu ka mana, “Iagho mei ka ghehati, eghuteuna iagho atha mei balumu buka teke iu'iju soru iagho ka naiknore igne.” Aonu, mae Baruk atha ne mei ka mare buka igne.

¹⁵ Mare ne cheke eghu ka mana, “Gnokro sagho, eghuteuna iagho iu'iju soru cheke tuare mala nomhidi ghehati.” Aonu mae Baruk ne iu'iju buka igne ka mare.

¹⁶ Kate nomhidi cheke igre, mare mhaghu nodi ne cheke eghu ka mana, “Ghehati ginauna fathoke lao cheke igre ka king.”

¹⁷ Mare neke cheke eghui ka mana, “Iagho cheke ka ghehati. Faꞌunha ne rioriso soru sagho cheke igre ia? Profet Jeremaea neke cheke ranghi nigho iagho neke rioriso soru cheke igre?”

¹⁸ Mana ne cheke eghu, “Uve, profet Jeremaea neke toutonu ka iara cheke igre neke rioriso iara ka pepa igne.”

¹⁹ Aonu mare ne cheke eghu ka mana, “Ghopa mae Jeremaea rikha tei poru! Eghuteuna ghopa thosei falalase ka ihei nga vido aheva te au teu ghopa na!”

King Jehoiakim ne gnubra nogna buka mae Jeremaea igne

²⁰ Mae ofisa igre atha buka igne ka mae Baruk ne lilisei ka nogna chogho mae Elisama, mae ihei te nogna minista mae king igne. Eghuteuna mare kegra haghe ne tei filoni mae king ka vido te loku teu mana na. Eghuteuna mare ne toutonu eidi gobigna glepo igre ka mana.

²¹ King kuruni mae Jehudi ne tei ka mae Elisama mala atha mei buka igne. Mae Jehudi atha buka igne ne mei iu'iju soru cheke igre ka king, nei hatimare mae ofisa te kegra faligohoni teu mana igre.

²² Ka faheva nhigra gna finogha te thono reka fara igne, king au neu ka nogna chogho te theome tangomana nagrifu te mei tagna na. Mana gnokro neu rhegna khaꞌaghi na.

²³ Kate iu'iju mae Jehudi phei ba thilo thura ka pepa brahu igne, king atha naflahi ikoi na ne reku koko thura igre ne koko lao ka khaꞌaghi. Mana ne eni fabrahu igne ne ghilei gnubra fahui buka na.

²⁴ Kate nomhidi mae king cheke igre, baludi nogna mae biꞌo re, mana jaola theome mhaghu, nei jaola theome rerheku nogna pohe na neu, fagaglana gna nogna diꞌanagnafa na.

²⁵ Neuba mae Elnatan, mae Delaea nei mae Gemaraea ne fariu riu lhotini mae king te gnubra pepa brahu igne, nu mana tirogna fanomho ka thilo mae igre.

²⁶ Aonu mae king ne kuruni Jeramel thugna mana na, mae Seraea thugna mae Asriel, nei mae Selemaea thugna mae Abdel teu igre mala tei lokidi mae profet Jeremaea ghe mae Baruk. Nu mare ne theome filodi mae Jeremaea ghe mae Baruk, naugna Lord ne pophorudi phei mare.

Mae Profet Jeremaea ghe mae Baruk neke riorisoi keha buka na

²⁷ Ke leghugna igne, Lord ne cheke eghu ka mae Jeremaea,

²⁸ “Iagho atha keha buka na mala rioriso soru cheke te gnafa teke rioriso iagho ka buka ulu lahu teke gnubra mae King Jehoiakim ia.

²⁹ Eghuteuna iagho jaola cheke eghu ka king gna Juda, ‘Lord na ne cheke eghu: King Jehoiakim! Iagho gnubra buka igne neke cheke eghu: Mae ihei teke cheke ranghini mae profet Jeremaea te mala rioriso eigna te mala mei king gna Babilonia te mala goigonini kantri igne, ba jaola mala aknu falehe naiknodi namono igre baludi glepo te tautagu igre?’

³⁰ Aonu, Lord ne cheke eghu eigna mae Jehoiakim king gna Juda: Ginauna na theo kaisei ka mae te karha mei ka vikegna mana igre nate atha sapegna King Devet tifa ia te mala funei frunidi nogu naikno iara igre. Kate lehe mae Jehoiakim na, mare ginauna koko fakosi thini gna mana na farihotei glalaba. Eghuteuna naprai, nakhete bongiro eghu ginauna soru mei ka mana.

³¹ Iara ginauna parani mana baludi thugna nei nogna mae ofisa teu mana igre, eidi puhi te diꞌa te edi mare igre. Mare baludi naiknodi Jerusalem nei Juda teu igre tirodi fanomho ka nogu cheke iara re. Naugna igne, puhi biꞌo ginauna thokedi mare, jateula teke nhaꞌa chekehi iara ka mare ia eghu.”

³² Aonu mae Jeremaea atha keha pepa brahu na ne tusu lao ka mae Baruk. Eghuteuna mae Baruk neke rioriso soru cheke te gnafa teke au ka pepa brahu ulu lahu teke gnubra King Jehoiakim igre ka pepa brahu igne, baludi kmana cheke teke chekedi mae profet ka mana re.