Profet Jeremaea 35 - Buka Blahi Ka Cheke Holo

Mae ka vikegna Rekab

¹ Ka narane te king Jehoiakim thugna Josaea king gna Juda igne, Lord ne cheke eghu ka mae Jeremaea,

² “Iagho tei ka vikegna mae Rekab. Toredi mare mala mei ka kaisei chogho ka nogu Sugablahi iara igne. Eghuteuna, iagho tusu ranghidi keha waen mala koꞌu mare.”

³ Aonu iara tei atha ne mei mae Jasania thugna keha mae te kiloni mare mae Jeremaea, thugna mae Habasinia baludi thabusigna, nei thugna teu manare. Mae te gnafa igre vikegna mae Rekab.

⁴ Iara athadi mare ne mei ka nogna Sugablahi Lord igne, eghuteuna ghehati tei ne ruma ka nogna chogho mae profet Hanan thugna mae Igdalea. Mae Hanan gne kaisei mae leghuni cheke gna Lord. Chogho igne namo rhegna vido aheva te au hatimare mae ofisa ke kligna gna nogna chogho mae Masea thugna mae Salum mae biꞌo gna Sugablahi igne. Mana te louloku ki gna grengatha biꞌo na.

⁵ Aonu iara ne atha keha botol biꞌo te fodu ka waen balu keha kapu. Eghuteuna iara ne mei ne lilisei ke uludi vikegna mae Rehab igre, ne cheke eghu ka mare, “Ghotilo koꞌu katha vido waen igne.”

⁶ Nu mare ne cheke eghu, “Ghehati theome koꞌu waen. Kuꞌemi ghehati mae Jonadab thugna mae Rekab igne mana neke cheke faheta eghu fara ka kuꞌemi ghehatire, ‘Ghotilo nei goro sua te karha mei ka vikemi ghotilore mala thosei koꞌu waen.

⁷ Eghuteuna ghotilo thosei bana suga, ba tobi, ba joꞌu grep. Blahi te edi ghotilo nafnata gloku igre, nu ghotilo mala au fabrahu kolho ka suga tapuale. Jame te eni fabrahu ghotilo igne na, ghotilo ginauna au fakeli fabrahu ka glose igne.’

⁸ Ghehati leghudi kolho nogna cheke mae Jonadab thugna mae Rekab te rheta fara igre. Ghehati nei khetomi nei thumi nalhaꞌu nei thumi gaꞌase teu igre, ghehati theome lase koꞌu waen.

⁹ Eghuteuna ghehati theome bana suga, ba tobi, ba joꞌu grep.

¹⁰ Ghehati au kolho ka suga tapuale, eghuteuna ghehati leghudi kolho gobigna lepo te chekedi mae kuꞌemi Jonadab tifa ra.

¹¹ Nu kate mei King Nebukadnesa gna Babilonia balu nogna armi te magra ke lamnagna kantri igne, ghehati rikhadi mare ne mei poru agne Jerusalem. Naugna igne te mei au teu ghehati ka namono igne.”

¹² Lord ne chekeni nogna cheke na ka mae profet Jeremaea.

¹³ Eghuteuna mae profet Jeremaea ne cheke eghu, “Ghotilo naiknomi Israel. Lord mae ihei te au nolaghi fateote'o nodi God mae Israel igne ne cheke eghu ka iara, ‘Jeremaea! Iagho tei ka naiknodi Jerusalem nei ka naiknodi Juda mala cheke eghu ranghidi? Iara Lord magnahaghei te farirhiu ghami ghotilo mala leghuni ghotilo nogu cheke iara na.

¹⁴ Mae Jonadab thugna mae Rekab igne mana neke cheke faheta ka thugnare mala thosei koꞌu waen. Eghuteuna mare nei iheire te gnafa te karha mei ka vikegna mana igre, mare leghuni kolho nogna cheke mana igne. Mei te posa gognarona vike igne theome koꞌu waen, naugna kuꞌedi mare igne neke cheke faheta ka mare mala thosei eni igne. Nu ghotilo ba? Iara cheke koba ka ghotilo, nu ghotilo theome leghu ghau iara!

¹⁵ Kmana fata iara kuru mei nogu mae gloku, hatimare mae profet. Mare mei toutonu koba ka ghotilo nogu cheke iara na. Mare cheke eghu koba ka ghotilo, “Ghotilo te gnafa na mala koko puhimi te diꞌare mala leghuni puhi te doglo na. Ghotilo thosei leghudi nei tarai eghu ka keha god are. Jame te eghu ghotilo na, ghotilo ginauna na au fakeli ka glose teke tusu lao iara ka mae kuꞌemi ghotilo tifa ra.” Nu leuleghu fata na ghotilo tiromi fanomho ka nogu cheke iara igre, nei tiromi leghu ghau iara.

¹⁶ Vikegna mae Jonadab thugna mae Rekab igre, mare leghuni fabrahu cheke gna mae kuꞌedi tifa na, nu ghotilo gne theome leghudi nogu cheke iara re.’

¹⁷ “Eghume, iara Lord God mae ihei te au nolaghi fateote'o, nodi God mae Israel. Te chekeni iara ka ghotilo na, ‘Jame te tiromi leghu ghau iara ghotilo na, iara ginauna atha mei puhi biꞌo mala thoke ghami ghotilo. Nu kate cheke iara ka ghotilo na, ghotilo tiromi fanomho. Eghuteuna kate kilo ghami iara na, ghotilo tiromi cheke tughu ka iara. Naugna igne, iara ginauna atha mei puhi biꞌo mala thoke mei ka ghotilo Jerusalem nei Juda.’ ”

¹⁸ Aonu mae Jeremaea ne cheke eghu ka vikegna mae Rekab, “Lord mae ihei te au nolaghi fateote'o, nodi God maedi Israel igne ne cheke eghu ka ghotilo: ‘Ghotilo leghudi nogna cheke kuꞌemi mae Jonadab tifa ra, eghuteuna ghotilo leghudi gobigna lepo te chekedi mana ka ghotilore.

¹⁹ Naugna igne, iara Lord mae ihei te au nolaghi fateote'o, nodi God maedi Israel, iara nhaꞌa cheke eghu ka ghotilo: Vikegna mae Jonadab, thugna mae Rekab igne ginauna theome lehe, eghuteuna naikno nate karha mei ka vike igne ginauna au fabrahu mala loku ranghi ghau iara.’ ”