Profet Jeremaea 34 - Buka Blahi Ka Cheke Holo

Lordcheke ranghi King Sedekaea

¹ Lord ne cheke ka mae Jeremaea ka narane Nebukadnesa king gna Babilonia teke mei magra Jerusalem, nei ka namono te gnafa te au faligohoni namono biꞌo igne. Mae Nebukadnesa ne atha nogna armi na baludi armi te gnafa nei naikno eghu te funei frunidi mana igre.

² Igne unha te chekeni Iara Lord nodi God mae Israel: “Iagho tei ka King Sedekaea mala cheke eghu ka mana, ‘Iara ginauna snakre lao namono igne ka king gna Babilonia mala gnubra mana.

³ Ka narane tuana iagho ginauna na theome tangomana nate rikha na. Mare ginauna atha nigho iagho tei mala snakre lao nigho ka mana. Iagho ginauna filo tathani mana, eghuteuna mana ginauna toutonu balumu iagho. Eghuteuna ke leghugna igne, mana ginauna huhuru nigho iagho mala tei Babilonia.

⁴ “ ‘King Sedekaea, iagho fanomho fakeli ka nogna cheke Lord igne! Lord na ne cheke eghu, Iagho ginauna na theome lehe ka magra.

⁵ Nu iagho ginauna lehe kolho ka pharikeli. Eghuteuna mare ginauna giugilu nigho iagho jateula teke edi mare ka mae king teke vikemu iagho tifa ra eghu. Mare gahu insens neke ghatho tahudi mae king tura, eghuteuna mare ginauna nake jateula tuana eghu ka iagho. Eghuteuna mare ginauna tanhi balu diꞌanagnafa eimu iagho. Mare na cheke eghu, “Kokhoni ni fara, nogu funei iara igne la lehe!” Kokhoni ni fara, nogu funei iara igne la lehehi!’ ” Igne chekegna Lord.

⁶ Aonu mae profet Jeremaea tei Jerusalem ne tusu lao cheke igne ka King Sedekaea.

⁷ Ka narane tuana nogna armi king gna Babilonia igne magra Jerusalem, nei ka phei namono Lakis ghe Aseka, eghuteuna phei namono igre mare bara te ligoho ka thina. Mae naoka igre mare magra neke uludihi keha namono te gnafa ka kantri Juda.

King Sedekaea baludi naiknore ne theome leghuni nodi nhaꞌa cheke na

^8-12 King Sedekaea ne eni kaisei nhaꞌa cheke baludi naikno te gnafa te au Jerusalem. Te chekeni ka nhaꞌa cheke igne na, mare magnahagheidi naikno sneka te gnafa, gaꞌase ba nalhaꞌu te snagla mala jifla tei. Mare theome magnahagheni kaisei naikno Jiu te sneka na. Aonu naiknore baludi keha naikno te loku fodu ka nhaꞌa cheke igne, mare leghuni nhaꞌa cheke igne ne snakredi nalhaꞌu sneka nei gaꞌase sneka teu igre snagla jifla ne tei. Nu ke leghugna igne, mare neke tughu gaoghatho neke atha fafigridi neke huhurudi mala ke loku jateula naikno sneka eghu. Aonu, Lord ne chekeni cheke igne ka profet Jeremaea.

¹³ Eghuteuna profet ne cheke eghu, “Ghotilo vikegna Israel. Igne unha te chekeni Lord nodi God maedi Israel: Tifa na iara neke atha kuꞌemi ghotilo ra neke jifla Ijep. Mare neke loku jateula naikno sneka neku jare, nu iara neke snakredi mare mala snagla jifla tei. Ka narane tuana, iara neke eni kaisei nhaꞌa cheke baludi neke cheke eghu,

¹⁴ ‘Jame kaisei gaꞌase ba kaisei mae nalhaꞌu ka mae Hibru igre sneka ka ghotilo, mana ginauna mala loku jateula naikno sneka eghu nabagna namno finogha kolho, nu ka fafitu finogha na, ghotilo snakreni mana mala snagla jifla tei.’ Nu kuꞌemi ghotilo ra mare neke tirodi fanomho ka iara, nei tirodi leghu ghau iara.

¹⁵ Ulu lahu na, ghotilo neke theome leghuni cheke igne. Nu theome raugha, ghotilo tughu nagnafa ne eni glepo te thofno doglo fara ka tathagu iara na. Ghotilo te gnafa na kaisei gaoghatho ne snakredi kherami te sneka ka ghotilo igre mala snagla jifla tei. Eghuteuna ghotilo mei ka Sugablahi te laseni naikno te gnafa igre te nogu iara na, eghuteuna ghotilo eni kaisei nhaꞌa cheke ka tathagu iara na.

¹⁶ Nu gognarona, ghotilo ke tughu nagnafami. Eghuteuna ghotilo fakakhana te theome ghatho tahu ghau iara na ka puhi te huhughuni ghotilo nhaꞌa cheke igne. Ulu lahu na ghotilo neke snakredi naikno te sneka igre mala snagla jifla tei, mala tangomana mare te tei ka namono aheva te magnahagheni mare na. Nu gognarona, ghotilo ke atha fafigridi mala nomi naikno sneka ghotilo.

¹⁷ “Eghume, igne unha te chekeni Lord na: Ghotilo tiromi leghu ghau iara. Ghotilo tiromi snakredi kheramire mala snagla jifla tei. Nu gognaro na iara ginauna snakre ghami ghotilo mala kafe snagla jifla tei. Iara ginauna snakre ghami ghotilo mala snagla jifla tei lehe ka magra, ba lehe ka fogra biꞌo, ba ka glehe rofo. Iara ginauna na fakokhoana ghami ghotilo, eghuteuna naikno ka keha kantri igre ginauna thono mhaghu nodi fara ka ghotilo.

¹⁸ Ghotilo neke eni nhaꞌa cheke igne ke ulugu iara, eghuteuna ghotilo neke leghuni kastom tuana mala rheta nhaꞌa cheke igne. Ghotilo neke falehe buluka neke vahe pea ka phei vido, eghuteuna ghotilo eni nhaꞌa cheke igne kate nolo ghotilo farihoteidi phei vido igre. Nu ghotilo theome leghuni nhaꞌa cheke igne, eghume ghotilo ginauna fnota pea jateula buluka igne eghu.

¹⁹ Neuba ghotilo mae mala baubatudi Juda nei Jerusalem baludi nogna ofisa mae king, mae pris nei keha naikno ka kantri igre, iara ginauna fota ghami ghotilo gnafa naugna ghotilo ne theome leghuni nhaꞌa cheke igne.

²⁰ Eghume, iara ginauna lilisei ghami ghotilo ke pari gna nodi nolaghi hatimare mae naoka mae iheire te magnahaghei falehe ghami ghotilo igre. Eghuteuna thinimi ghotilore ginauna mala ghamu ghedi saroko nei khuma mata.

²¹ “Iara ginauna na jaola lisa laoni King Sedekaea balu nogna mae ofisa ke pari gna nodi nolaghi mae naoka mae iheire te magnahaghei falehe ghami ghotilo. Nogna armi mae king gna Babilonia igne, mare jiflahi ka nomi namono ghotilo igne.

²² Nu iara ginauna na tusu lao vetula ka armi gna Babilonia mala ke pulo mei Jerusalem. Mare ginauna mei magra ka ghotilo, eghuteuna mare na ulu ghami ghotilo, mare na gnubra gobigna lepo ka namono igne. Iara ginauna goigoni ni namono Juda mala theome tangomana kaisei naikno te au tagna na.” Igne cheke gna Lord.