Profet Jeremaea 33 - Buka Blahi Ka Cheke Holo

Lordneke eni keha nhaꞌa cheke na

¹ Kate sosolo Profet Jeremaea ka suga gna king igne, Lord ne fapea cheke ka mana.

² Profet ne cheke eghu, “Lord mae ihei teke ghaoghaho nei vuavuha teku nauthoglu igne. Nanghagna Lord! Mana neke cheke eghu:

³ Tutuani fara! Jame te eha mei ghotilo ka iara mala togho ghami teuna, iara ginauna nomhi ghami nei togho ghami eghu ghotilo. Eghuteuna iara ginauna chekeni glepo te thofno keli fara te theome tangomana kaisei naikno teke laseni tifa na.

⁴ Igne unha te chekeni Lord, nodi God maedi Israel eidi sugadi Jerusalem balu nogna suga king gna Juda. Mare paꞌe suga igre mala atha glepodi suga tuare mala eni famaku bara thina gna namono na, mala theome tangomana armi gna Babilonia igne apla te ruma lamna namono te magra na. Mana ne cheke eghu:

⁵ Suga igre ginauna fodu ka thinidi naikno nate lehe ka naokare, naugna iara thono diꞌatagu fara ka mare. Iara ginauna tirogudi naikno gna namono Jerusalem igne eidi puhi te diꞌa te edi mare igre, eghuteuna iara ginauna snakredi maedi Babilonia mala mei aknu falehedi mare ke lamna gna namono igne.

⁶ “Nu neuba, ke leghu na, iara ginauna eni namono igne mala ke keli fapulo. Iara ginauna toghodi nogna naikno mana re mala ke rheta fapulo, nei au fakeli ka pharikeli.

⁷ Iara ginauna edi maedi Juda nei maedi Israel teu igre mala au fakeli ka nodi namono na mala jateula teke tifa ia eghu.

⁸ Mare figri tagru ghau iara ne edi kmana nakhibo, nu iara ginauna nake fagae fapulodi. Uve, iara ginauna atha koko nakhibo teke edi mare kate figri tagru ghau iara na.

⁹ Ka narane tuana, naikno te gnafa ka nauthoglu igne ginauna gleale'a fara eidi glepo te keli te edi iara ka namono igne, eghuteuna mare ginauna cheke fakeli ghau iara nei fafnaknoni nanghagu iara na. Mare ginauna rhana nodi fara kate nomhini nonomho eigna puhi te eni iara ka naikno te au fakeli ka pharikeli ka namono igne.

¹⁰ “Lord ne cheke eghu: Tutuani fara! Ghotilo cheke eghu koba, ‘Namono igne thono diꞌa fara jateula namono nagou te theo kaisei naikno, ba kaisei glepo te tautagu te au tagna ra eghu.’ Eghuteuna cheke igne thofno tutuani fara. Namono Juda nei nabrou biꞌo ka namono Jerusalem igre eghu thono krogha fara theo kaisei naikno nei theo kaisei glepo te tautagu eghu te au jare na. Nu ke leghu na, ka namono igre naiknore ginauna tangomana te nomhidi

¹¹ naiknore na eha fabiꞌo, naugna mare ne thono gleale'a fara. Mare jaola na nomhidi khojedi mae sua nalhaꞌu nei goro sua gaꞌase ka gaghamu tholaghi. Eghuteuna mare tangomana te nomhidi naikno te atha gano te tei ka Sugablahi na mala kilo fnakno ka iara. Naikno igre ginauna eha eghu: “ ‘Tahati cheke fakelini Lord mae ihei te au nolaghi fateote'o, naugna mana thofno keli fara. Uve, mana namha ghita fabrahu.’ Glepo igre thoke mei naugna iara ginauna eni nomi glose ghotilo igne mala ke keli fapulo jateula tifa ia eghu.” Igne cheke gna Lord.

¹² Lord mae ihei te au nolaghi fateote'o igne, mana ne cheke eghu: “Gognarona glose igne thono diꞌa fara, eigna theo kaisei naikno ba theo kaisei glepo te tautagu tangomana te au tagna na. Nu ginauna na fodu ka famane buburu falithuidi namono igre, eghuteuna mae greireghi sipu ginauna atha tei nodi sipure mala ghamu nei gnafa eghu ka vido igre.

¹³ Eghuteuna falithuidi namono ke lamnadi thogele nei gukhu ikodi teu ke mosu, nei ka namono nagou ke mata Juda, nei ka nohi Benjamin, nei falithuidi namono rhegna Jerusalem, nei jaola ka namono te au ka kantri Juda, mae greireghi sipu igre ginauna kaha nodi sipure.” Igne chekegna Lord.

¹⁴ “Iara cheke tutuani ka ghotilo. Iara liliseihi kaisei narane edi glepo teke nhaꞌa chekedi iara ra. Igre ginauna mei tutuani ka naiknodi Israel nei Juda.

¹⁵ “ ‘Ka narane tuana, kaisei mae ginauna karha mei ka vikegna king Devet. Mae igne ginauna funei frunini nauthoglu igne ka puhi te doglo fara.

¹⁶ Ka narane te funei fruni mana jateula king teu igne, mana ginauna fakarhidi nogu naikno iara te au Juda, nei Jerusalem. Eghuteuna mare ginauna kiloni nanghagna mae igne na, Lord Sedekenu. Gaoghathogna cheke igne, Mae ihei te eni unha te doglo ka nogna naiknore.’

¹⁷ Iara Lord. Te chekeni iara na, leuleghu fata na kaisei mae ka vikegna King Devet ginauna funei frunidi naiknodi Israel.

¹⁸ Eghuteuna jaola te chekeni iara na, leuleghu fata na mae pris te jifla mei ka vikegna mae Livae igre, mare ginauna mala fafara ka iara gano te gahu ka khaꞌaghi, eghuteuna mare na atha mei flaoa ka famane wit, ba keha nafnata fafara.”

¹⁹ Lord ne cheke ka mae Jeremaea.

²⁰ Lord ne cheke eghu, “Ghema Jeremaea, iara neke eni kaisei nhaꞌa cheke baludi narane ghe bongi, eghuteuna leuleghu fata na narane na phage haghe koba hamerane boibongi, eghuteuna bongi na ginauna na jaola plulu koba fei grafi. Eghuteuna theo kaisei naikno nate huhughuni nhaꞌa cheke igne.

²¹ Jateula tuana eghu iara neke eni kaisei nhaꞌa cheke balugna King Devet, nogu mae gloku iara. Leuleghu fata na king te gnafa te mei ke leghugna mana igre ginauna kaisei mae te karha mei ka vikegna mana. Eghuteuna iara neke eni fapea nhaꞌa cheke baludi nogu mae pris te karha mei ka vikegna mae Livae, mae igre mala eni nogu gloku iara na ka nogu Sugablahi iara na. Eghuteuna phei nhaꞌa cheke igre theo kaisei naikno nate huhughudire.

²² Iara ginauna eni vikegna nogu mae gloku Devet, nei mae pris ka vikegna mae Livae mala kmana fara jateula nathunu ka maloa kligna nei nusu ka thongna, te theome tangomana kaisei naikno te kahadi.”

²³ Lord ne cheke eghu ka mae Jeremaea,

²⁴ “Naugna unha sagho te fanomho ka nodi cheke naiknodi keha kantri igrea? Mare cheke eghu, ‘Ulu lahu na Lord neke vahidi naiknodi Israel nei naiknodi Juda te mala nogna thegna. Nu gognarona mana la tirognadihi.’ Eghume mare filo faparidi nogu naikno iara re, eghuteuna mare theome ghathoni ghotilo te kaisei naikno kolho na.

²⁵ Nu iara cheke tutuani ka ghotilo: Iara ginauna na theome huhughuni nhaꞌa cheke teke eni iara baludi narane ghe bongi ra, eghuteuna iara ginauna na theome snakredi maloa ghe nauthoglu igre te huhughudi nogu vetula re.

²⁶ Na jateula igne eghu, iara ginauna na theome thododi vikedi mae Jekop ghe nogu mae gloku iara mae Devet. Eghuteuna iara na jaola theome huhughuni nhaꞌa cheke nate au fabrahu teke eni iara balugna King Devet, nei king te gnafa nate funei frunidi vikedi mae Ebraham, mae Aesak nei mae Jekop, ginauna karha mei ka vikegna Devet. Iara ginauna kokhonidi nogu naiknore, eghuteuna iara ginauna toghodi mala au fakeli ka nodi namono na jateula teke tifa ia eghu.”