Profet Jeremaea 31 - Buka Blahi Ka Cheke Holo

Mae Israel ginauna nake pulo mei ka nodi namono na

¹ Lord ne cheke eghu, “Ka narane nate mei ginau igne, iara ginauna nodi God vike te gnafa Israel, eghuteuna mare nogu naikno iara.”

² Lord ne cheke eghu, “Tifa, kani teke au kuꞌemi ghotilore ka namono nagou ra, iara neke keli ranghidi neke theome lehe ka magra, eghuteuna hiro nodi namono te mala gnafa na.”

³ Ka narane tuana, Lord neke falaseni thegna ka mae Israel neke cheke eghu, “Iara namha ghami ghotilo fabrahu fara, eghuteuna iara ginauna na ghatho tahu ghami ghotilo fabrahu.

⁴ Ghotilo nogu naikno iara. Iara ginauna na fakegra haghe ghami ghotilo maemi Israel mala kaisei vike te rheta tulao. Eghume ghotilo ginauna lalahu taborin nei ragi balu gleale'a.

⁵ Ghotilo ginauna joꞌu grep ke kligna thogele Samaria. Eghuteuna ihei te joꞌu grep igne ginauna ghamu sisigna na.

⁶ Ka narane igne, mae te toetoe ke kligna thogele Efrem igne ginauna eha eghu fabiꞌo, ‘Mei ghotilo! Tahati ari ke kligna Thogele Saion mala pogho soru ka Lord noda God!’ ”

⁷ Lord ne cheke eghu, “Ghotilo koje balu gleale'a eigna Israel! Ghotilo eha fabiꞌo eigna kantri te biꞌo lahu ka nauthoglu igne. Kate kilo fnaknoni Lord na, ghotilo mala cheke eghu ka naiknore, ‘Lord! Fakarhidi nou naikno Israel te au faleghu igre!’

⁸ Iara ginauna atha fajifladi mala jifla mei ka kantri ke raru. Uve, iara ginauna nake atha fapulo nogu naiknore funu ka kantri te khaba. Keha naiknore dofu nei blughu. Keha gaꞌasere bukla nei namo karha sua teu igre ginauna jaola nake kafe pulo mei. Iheire na teke pulo mei igre thofno kmana fara.

⁹ Ka narane te atha fajifladi iara re, naikno igre ginauna tanhi nei tarai eghu ka iara nake pulo mei. Iara ginauna na baubatudi mei ka vido te au khoꞌu te keli, eghuteuna iara ginauna atha meidi ka nabrou te doglo mala theome uka mare. Iara ginauna eni igne, naugna iara jateula kmadi eghu vikegna Israel, eghuteuna vikegna Israel igne jateula thugu nalhaꞌu teke kulu karha ra eghu iara.

¹⁰ “Ghotilo te gnafa ka kantri te gnafa ra, fanomho mei ka nogu cheke iara Lord! Ghotilo tei toutonuni nogu cheke iara igne ka naikno te au khaba ka ghotilo ra! Ghotilo tei cheke eghu, ‘Lord neke brue fajifladi naiknodi Israel neke tei tafri, nu mana ginauna nake atha fapulodi. Mana ginauna hirodi, jateula mae greireghi sipu te hirodi nogna sipu ra eghu.’

¹¹ Iara Lord, iara ginauna nake atha fapulo vikegna Israel ka khamedi nodi mae naoka te nheta fara igre.

¹² Mare ginauna mei kegra ka Thogele Saion mala koje balu gleale'a. Mare ginauna gleale'a eidi gano, waen te keli, oliv oel, sipu majaghani nei buluka majaghani. Mare ginauna au nodi kmana glepo te keli jateula famane nagare te au kmana khoꞌu te keli ra eghu, eghuteuna mare ginauna na theome glaꞌe soru.

¹³ Ka narane igne, goro gaꞌase majaghani re ginauna ragi balu gleale'a, eghuteuna mae majaghani nei mae biꞌo teure ginauna jaola loku fodu mala ragi nei gleale'a eghu baludi. Iara ginauna fameomego nagnafadi mala theome diꞌanagnafa, nu mala gleale'a nodi fabrahu kolho mare eghu.

¹⁴ Mare ginauna atha mei kmana gano ka iara, eghume mae pris ginauna au ghedi kmana gano te keli. Eghuteuna iara ginauna toghodi nogu naiknore mala gleale'a ka glepo te keli nate tusu ranghidi iara re.” Igne cheke gna Lord.

Lordna kokhonidi nogna naiknore

¹⁵ Lord ne cheke eghu, “Kaisei naogla ne nomhi laoni namono Rama. Naogla natanhi nei khoje diꞌanagnafa. Resel tanhidi thugnare. Eghuteuna ninhigrana ranghini kaisei naikno te fameomegoni naꞌa na, naugna ne dofidi thugnare.”

^16-17 Nu iara ne cheke eghu: “Resel, thosei tanhi. Iagho famomoja kholodi tathamure, naugna iara ginauna tusu ranghi nigho glepo te keli eidi gloku te keli teke edi iagho ranghidi thumura. Goro sua igre ginauna jifla mei ka namonodi mae naokare mala ke pulo mei ka nodi namono na. Eghuteuna nakarhamu iagho na ginauna thofno keli fara.” Igne cheke gna Lord.

¹⁸ “Iara nomhidihi nodi diꞌanagnafa nei natanhi teu vikegna mae Efrem ra. Mare tanhi ne cheke eghu, ‘Lord, ghehati gne jateula sua buluka mata te theome au snoto ra eghu. Nu iagho para ghami mala leghu nigho. Iagho Lord, nomi God ghehati, atha fapulo ghami ka iagho.

¹⁹ Ghehati tei koko nigho, nu gognarona iagho tughuhi gaoghathomu na. Kate laseni nomi najafra na, ghehati mamaja nomi fara ne pogho soru pari phaꞌumire. Tifa na vikemi ghehati ra neke au jateula naikno majaghani neku neke edi kmana puhi te diꞌa.’

²⁰ Nu te chekeni iara ka ghotilo gognarona. Efrem gne thofno mae thugu iara, iara thofno namhani nei gleale'ani eghu mana. Kmana fata iara diꞌatagu fara ka mana eidi nakhibogna manare. Nu neuba, leuleghu fata na iara ghathoni mana, naugna iara namhani nei kokhoni noguni eghu mana.

²¹ “Ghotilo maemi Israel, ghotilo ghatho fakelini nabrou teke leghuni ghotilo kani teke jifla ghotilo ka thofno namonomi ia, eghuteuna ghotilo neke lilisei fagaglana ka nabrou na mala laseni aheva na teke pulo mei na. Ghotilo Israel, ghotilo mala ke pulo mei ka nomi namono igre.

²² Lord namha ghami fara ghotilo, nu ghotilo tei kokoni fabrahu mana. Niha nau ame ke pulo mei nga ka mana si ghotilo ia? Lord ginauna eni kaisei glepo majaghani fara ka nauthoglu igne. Naiknodi Israel igre ginauna loku famaku ka nodi Lord na, jateula gaꞌase te loku famaku ka kheto gna na ia eghu.”

Lordginauna atha fapulo naiknodi Israel

²³ Lord mae ihei te au nolaghi fateote'o nei nodi God mae Israel teu igne ne cheke eghu, “Iara magnahaghei teke atha fapulo naiknodi Juda mala ke pulo mei ka nodi namonore mala ke au fakeli. Eghuteuna mare ginauna cheke eghu ranghini Jerusalem: ‘Iagho Thogele Blahi! Snakreni Lord mala fablahi nigho! Iagho nogna namono mae ihei te doglo fara!’

²⁴ Neubane ihei te au ka namono, ba ihei te loku ka nagare, ba ihei te reireghi sipu, mare ginauna au fodu fakeli nodi ka namono te gnafa ke lamnagna kantri Juda.

²⁵ Jame ihei te babaꞌo na, iara ginauna nake farheta fapuloni. Eghuteuna jame ihei te rofo na, ba te roi koꞌu na, iara ginauna tusu ranghini gano nei khoꞌu eghu mala ke rheta fapulo.”

²⁶ Aonu, ka narane igne, iara dofra haghe ne filo tafri, eghuteuna iara ne keli nagnafagu fara eigna unha te eni Lord kate thuru teu iara igne.

²⁷ “Iara Lord, iara cheke tutuani fara. Ginauna, iara te mala toghodi naikno nei glepo te tautagu teu igre mala vuragha ka vikegna Israel, nei ka vikegna Juda, jateula mae ihei te loku ka nagare te vuragha gano ra eghu.

²⁸ Tifa na iara neke thofno atha fajifladi ka nodi namono re. Iara neke roꞌedi, faparidi, nei goigonidi fara neku. Nu iara Lord ginauna reireghi fakelidi ka narane iara nate babana fapulodi, nei lisei fapulodi jateula mae ihei te joꞌu gano ka nogna nagare ra eghu.” Igne cheke gna Lord.

²⁹ “Eghuteuna, ka narane igne naiknore ginauna na theome cheke eghu: “ ‘Idoda kmada ra neke ghamu sisi grep te theome muita. Nu grahagna na theome khoko ka foflodi gradire.’

³⁰ “Nu ihei te ghamu sisi grep te theome muita igne na, grahagna na theome khoko ka foflogna na. Gaoghatho gna cheke igne na: Jame ihei te tapla jafra ka nakhibo na, mala lehe ka nakhibo gna thegna.”

³¹ Lord ne cheke eghu: “Fanomho ghotilo ia. Iara la vahinihi kaisei narane eigna iara ginauna eni kaisei nhaꞌa cheke majaghani baludi Israel ghe Juda.

³² Nhaꞌa cheke igne ginauna na theome jateula nhaꞌa cheke teke eni iara ka kuꞌedi mare tifa kani teke baubatudi teke jifla iara ka kantri Ijep. Uve, neuba iara ne namhadi fara jateula mae ihei te namhani khetogna na ia neu, mare neke huhughuni nhaꞌa cheke tuana.

³³ Igne u nhaꞌa cheke majaghani nate eni iara baludi naiknodi Israel. Iara ginauna lilisei nogu vetula na lamna ka thiꞌadire, eghuteuna rioriso soru ka nagnafadire. Iara ginauna nodi God mare, eghuteuna mare ginauna mala nogu naikno iara.

³⁴ Ginauna na theo kaisei naikno nate farirhiuni kheragna ba thabusigna na ka puhi te cheke eghu igne, ‘Ghotilo mala laseni Lord!’ Naugna ka narane tuana, naikno te gnafa igre ginauna lase ghauhi iara, neuba ihei ne fnakno ba theo. Iara ginauna atha fadelei thua glepo te diꞌa teke edi mare re, eghuteuna iara ginauna nake theome ghathodi nakhibodire.” Igne chekegna Lord.

³⁵ God neke lillisei naprai na mala phae ka narane, eghuteuna glaba nei nathunu teu igre mala phae bongiro. Mana neke eni thongna gne mala malu oa'ongha fabiꞌo. Nanghagna God igne, Lord mae ihei te au nolaghi fateote'o. Igne unha te chekeni Lord na:

³⁶ “Iara Lord, iara thofno cheke kate tutuani ka ghotilo. Vikegna Israel igne ginauna na jateula naprai nei glaba nei nathunu eghu mala au fabrahu. Eghuteuna iara theome snakredi nodi gloku naprai nei glaba nei nathunu teu igre na te mala gnafa na. Eghume, vikegna Israel igne ginauna theome hui.

³⁷ Eigna theo kaisei naikno tangomana te fafaja ba te skel nauthoglu igne, iara ginauna na jaola theome thodoni vikegna Israel, neuba mare neke tapla jafra fabrahu ka nakhibo.” Igne chekegna Lord.

³⁸ Lord ne cheke eghu, “Iara vahinihi kaisei narane, eghuteuna ka narane tuana, ghotilo ginauna nake babana fapulo nogu namono iara Jerusalem. Ghotilo ginauna na fufunu ke maghati nogna suga mala toetoe mae Hananel tei posa ke mosu Geri Grengatha.

³⁹ Fofota gna na fufunu ka vido ke mosu tei posa ka thogele Gareb, aonu figri tei posa ka vido nanghagna na, Goa.

⁴⁰ Eghuteuna glogu ke mata na mala koko thinidi naikno te lehe nei mala koko nakrofu khaꞌaghi, eghuteuna ka nagare ke holo Glogu Kedron te tei posa ke maghati Grengatha Hos, vido igne thofno blahi fara ka iara Lord. Eghuteuna namono igne ginauna na theo ihei nate roꞌeni ba nate goigoni ni na.”