Profet Jeremaea 30 - Buka Blahi Ka Cheke Holo

Lordnhaꞌa cheke mala toghodi nogna naiknore

¹ Igre cheke te chekedi Lord ka mae Jeremaea re.

² “Iara Lord, nodi God mae Israel. Iagho rioriso sukha ka buka unha te chekedi iara ka iagho igre.

³ Ka narane tuana, iara ginauna nake atha fafigri naiknodi Jerusalem nei Juda mala ke pulo mei au fakeli ka nodi namono teke tusu ari iara ka vikedi mare tifa ra.”

⁴ Lord ne ghathodi fara naiknodi Jerusalem nei Juda teu igre ne cheke eghu:

⁵ “Iara nomhidi naikno te mhaghu nodi fara te tanhi fabiꞌo, nei theome au ka pharikeli teura.

⁶ Ba? Nalhaꞌu na tangomana te fakarha sua na? Ne faꞌunha site filodi iara mae nalhaꞌu te loku ka khoto thiꞌa na jateula gaꞌase te namo karha sua teu igrea? Ne faꞌunha si mare te jateula te mhaghu teu te nhogri tathadi nei foflodi teu igrea?

⁷ Tore. Narane igne ginauna na thono ninhigrana fara. Theo kaisei narane te jateula igne teuna. Ginauna puhi biꞌo fara na thoke mei ka vikegna Israel, nu theo kaisei naikno nate lehe na.

⁸ “Ka narane igne, iara Lord mae ihei te au nolaghi fateote'o ginauna atha fadelei ghami ghotilo ka nodi nolaghi nomi naokare, jateula mae ihei te atha fadelei vido thaba balu nhugha ka grara gna buluka na ia eghu. Uve, iara ginauna kusu chen te haru fabrahu ghami ghotilo mare igne. Eghuteuna ginauna na theo kaisei mae ka keha kantri igre nate atha ghami ghotilo te tei loku jateula sneka teuna.

⁹ Mare ginauna loku ranghi ghau iara Lord, nomi God ghotilo, nei loku ranghini king teke vavahi iara ka vikegna King Devet.

¹⁰ “Eghume, ghotilo vikegna Israel, nogu naikno gloku iara ra ghotilo thosei mhaghu. Iara ginauna atha fapulo ghami ghotilo ka kantri te tei au sneka teu ghotilo igne. Uve, iara ginauna atha fajifla ghami ghotilo ka vido aheva te funei fruni ghami teu mae naoka igre. Ghotilo ginauna nake pulo mei ka nomi thofno namono na mala ke au fakeli nei au ka pharikeli. Theo kaisei naikno nate goigoni ghami ba famamhaghu ghami teu ghotilo ginauna. Theo.

¹¹ Iara au balumi ghotilo, eghuteuna iara ginauna fakarhi ghami ghotilo. Neuba iara ne goigonihi kantri mala tei au ghotilo teku iara igne, iara ginauna na theome goigoni ghami ghotilo. Neuba, iara ginauna para ghami ghotilo, eidi nakhibo te edi ghotilo ranghi ghau iara, nu iara ginauna na theome para ghami fara ghotilo.” Igne cheke gna Lord.

¹² Lord ne cheke eghu, “Ghotilo thubu, eghuteuna theome tangomana nate mafo na. Ghotilo fnera, eghuteuna theome tangomana teke keli na.

¹³ Theo kaisei naikno nate phile ka ghotilo na. Eghuteuna jaola theo kaisei meresin te mala famafodi thubumi ghotilore.

¹⁴ Kherami ghotilore ghatho iho ghamihi ghotilo. Mare theome ghatho tahu ghami ghotilo gognarona. Iara para ghami ghotilo, jateula mae naoka te magri ghami ghotilo ra eghu. Papara te snakre mei iara igne ninhigrana fara, naugna nakhibomi ghotilore kmana fara, eghuteuna nabamiu ghotilo te papara na.

¹⁵ Tore, naugna unha si ghotilo te khuru chekedi thubumi grea? Thosei khuru chekedi glepo nate theome ke keli fapulo igre. Iara kuru ari papara ka ghotilo, naugna nakhibomi ghotilore kmana fara, eghuteuna ghotilo nabami fara te papara na.

¹⁶ “Nu jame te mei mae naokare te goigoni ghami ghotilo na, iara ginauna goigonidi mare. Eghuteuna jame te mei mae naokare te blau nomi glepo ghotilore, iara ginauna blau nakarhadi mae igre. Iara ginauna edi glepo igre mala jifla kokoni mare nodi thofno namono na mala tei au ka vido te theome nodi mare.

¹⁷ Nu iara Lord ginauna nake fakeli fapulo ghami ghotilo, eghuteuna thua fogrami nei thubumi teu ghotilore ginauna nake keli fapulo. Iara eni igne, naugna te chekeni mare na iara ngolho fajifla ghami ghotilo, eghuteuna theo kaisei naikno te ghatho tahudi Juda ghe Israel.” Igne cheke gna Lord.

¹⁸ Lord ne cheke eghu, “Iara ginauna kokhonidi vikegna Israel, nei toghodi mare mala thofno keli fara nakarhadire. Mare ginauna nake babana fapulo nodi namono na, eghuteuna lilisei nogna suga biꞌo king na ka thofno vido teke augna na.

¹⁹ Aonu mare ginauna gleale'a fara nei koje mala kilo fnakno ghau iara. Iara ginauna fablahidi mare, mala kmana nei theome glaꞌe soru eghu mare. Iara ginauna fablahidi mala ghatho tahudi mare naiknore, eghuteuna theo kaisei naikno nate faparidi mare na.

²⁰ Iheire nate karha mei ke leghure ginauna rheta jateula nogu naikno iara teke rheta tifa ra eghu. Iara ginauna toghodi mare, eghuteuna mare ginauna au fakeli ka glose igne. Eghuteuna iara ginauna goigonini ihei te fariuriu paradi mare na.

²¹ Kaisei mae ka mare thedi nate king te mala funei frunidi mare na. Iara ginauna atha meini mae igne mala mei namo ka iara. Naugna mare theome tangomana te mei thedi te namo ka iara na.

²² Ka puhi igne mare ginauna nogu naikno iara, eghuteuna iara nodi God mare.” Igne cheke gna Lord.

²³ Fanomho ghotilo ia! Lord na thono diꞌatagna fara ka ihei te diꞌa fara puhi gna na. Eghuteuna papara nate kuru mei mana ka mare igne, ginauna na jateula thongna te malu ka saeklon ra eghu.

²⁴ Diꞌa tagna Lord igne ginauna theome gnafa ghilei thoke mei narane te magnahagheni mana te mala gnafadi gobigna lepore. Ka narane leghu lahu na ghotilo naikno ra ginauna lase fakelini glepo igne.