Profet Jeremaea 28 - Buka Blahi Ka Cheke Holo

Profet Hananaea ne chaghidi naiknore

¹ Ka falima nhigra, ka fafati finogha king Sedekaea te funei fruni Juda, Profet Hananaea thugna mae Asur, maegna ka namono Gibeon, mana mei ka Sugablahi gna Lord na ne cheke ka mae Jeremaea ke uludi mae pris baludi naiknore. Mana ne cheke eghu,

² “Lord mae ihei te au nolaghi fateote'o, nei noda God tahati maeda Israel teu igne, mana ne cheke eghu: ‘Iara ginauna kina lopi nogna nolaghi king gna Babilonia.

³ Ame salaꞌu nga phei finogha igre teuna, glepo gna Sugablahi teke atha teke tei Babilonia King Nebukadnesa ira, iara ginauna nake atha fapulo agne Jerusalem.

⁴ Iara ginauna na jaola ke atha fapuloni King Jehoiakin, thugna king Jehoiakim, baludi naikno teke atha teke tei mare Babilonia ra. Iara ginauna kina lopi nogna nolaghi king gna Babilonia, jateula mae te atha koko vido thaba ka grara gna buluka na ia eghu. Igne chekegna Lord.’ ”

⁵ Aonu profet Jeremaea kegra haghe ke uludi mae pris nei naikno teu te kegra teu ka Sugablahi na igre ne cheke eghu ka profet Hananaea,

⁶ “Tutuani fara! Iara magnahagheni Lord te eni jateula te chekeni iagho igne teuna! Thofno keli fara jame te eni Lord unha te chekeni iagho igne mala ke atha fapulo glepo gna Sugablahi te au teu Babilonia baludi naikno teke atha fajifladi mare ka namono igne ra.

⁷ Nu iagho fanomho fakeli ka unha nate chekeni iara ka iagho baludi naikno igre.

⁸ Funu tifa te ghilei mei posa ka narane igne, mae profet igre mare neke cheke eidi narane mala magra, narane hoholo biꞌo, narane mala fogra biꞌo teu igre mala kafe thokedi naikno te kmana ka namono nei kantri.

⁹ Eghume, jame kaisei mae profet cheke eigna narane pharikeli, tahati theome laseni cheke igne tutuani ba theo. Nu jame te tutuani nogna cheke mana igre, tahati ginauna laseni, Lord neke tusu lao cheke igre ka mae profet igne neke kuru meini mana teuna.”

¹⁰ Aonu mae profet Hananaea atha vido thaba te au ka grara gna mae Jeremaea na igne ne kina lopi.

¹¹ Mana kegra haghe ne cheke eghu ke uludi naiknore, “Lord ne cheke eghu: Ka nafnata puhi igne, ame gnafa nga phei finogha igre teuna, iara ginauna kina lopi nogna nolaghi King Nebukadnesa te funei frunidi kantri te gnafa igre.” Kate nomhini mae Jeremaea cheke igne, mana kegra haghe ne jifla.

¹² Keha fata ke leghu gna te kina lopi mae profet Hananaea vido thaba ka grara gna profet Jeremaea na igne, Lord ne cheke eghu ka mae Jeremaea,

¹³ “Iagho tei ka profet Hananaea mala cheke eghu ka mana, ‘Lord mae ihei te au nolaghi fateote'o, nei nodi God mae Israel teu igne, mana ne cheke eghu: Iagho kina lopi kolho vido thaba balu nhugha igne. Nu ke tughu gna glepo igne na, iara ginauna horo nafnata glepo igne ka aean mala lilisei ari ka iagho.

¹⁴ Iara ginauna lisei soru naiknodi kantri igre ke parigna nogna nolaghi biꞌo King Nebukadnesa, king gna Babilonia te theo kaisei naikno nate kina lopini na. Eghuteuna iara ginauna na jaola chekedi glepo te tautagu ka namhata na are mala au ke parigna nogna nolaghi mana.’ ”

¹⁵ Aonu profet Jeremaea leghuni nogna cheke Lord igne ne cheke eghu ka profet Hananaea, “Hananaea, fanomho fakeli iagho ia! Lord neke theome kuru mei nigho iagho. Nu naikno igre fatutuanidi nou cheke chaichaghi iaghore.

¹⁶ Naugna igne, Lord ne cheke eghu: Theome raugha, iara ginauna atha fadelei nigho iagho ka nauthoglu igne. Ka finogha igne iagho ginauna lehe, naugna cheke te edi iagho igre batudi naiknore mala theome leghuni nogu cheke iara na.”

¹⁷ Aonu ka fafitu nhigra ka finogha igne, profet Hananaea ne lehe.