Profet Jeremaea 27 - Buka Blahi Ka Cheke Holo

King Nebukadnesa ginau funei fruni ni Juda

¹ Ka vido kmoꞌei te king gna Juda mae Sedekaea thugna mae king Josaea igne, Lord ne cheke eghu ka iara,

² “Jeremaea, iagho atha kaisei vido thaba baludi phei nhugha mala horo kaisei glepo jateula glepo te mala lilisei ka grara gna buluka ra eghu. Eghuteuna iagho lilisei glepo igne ka graramu na.

³ Eghuteuna iagho faꞌatha nogu cheke iara igne ka mae te atha nonomho te tei Jerusalem ka mae Sedekaea, king gna Juda mala atha tei mare ka king gna Idom, nei ka king gna Moab, nei ka king gna Amon, nei ka king gna Taea nei ka king gna Saedon.

⁴ Iagho cheke ka mae igre eigu iara Lord mae ihei te au nolaghi fateote'o nodi God mae Israel te chekeni igne: Ghotilo mae te mala atha nonomho ra, ghotilo tei cheke eghu ka nomi king re,

⁵ ‘Ka nogu nolaghi biꞌo, iara neke vuavuha nauthoglu igne baludi naikno nei gobigna lepo fateote'o te au ke lamna gna. Eghuteuna iara tufa glepo igre ka ihei te vahini iara na.

⁶ Eghume gognarona iara lisa lao nomi kantri ghotilo igre ke parigna nogna nolaghi nogu mae gloku iara, king Nebukadnesa, king gna Babilonia. Eghuteuna iara jaola tusu lao nolaghi igne ka mana mala funei frunidi gobigna lepo te tautagu ka namhata na are.

⁷ Kantri te gnafa ka nauthoglu na igre ginauna au ke parigna nogna nolaghi mana. Eghuteuna ke leghu na, mare ginauna au ke parigna nogna nolaghi thugna mana na, eghuteuna ke leghu gna igne mare au ke parigna nogna nolaghi gragna mana na, na eghu fabrahu ghilei gnafa ka narane te vahini iara na. Ka narane igre, keha kantri te nheta fara ginauna tapla faparini Babilonia mala ke nodi naikno sneka mare.

⁸ “ ‘Nu jame kaisei kantri ba kaisei king tirogna au ke parigna nogna nolaghi king Nebukadnesa, iara ginauna roꞌeni kantri igne. Iara ginauna kuruni king Nebukadnesa mala magra ka mare. Mare ginauna kmoꞌe ka gano, eghuteuna mare ginauna na thokedi fogra biꞌo. Ka puhi igne iara ginauna goigoni ni kantri ba king igne.

⁹ Eghume ghotilo thosei fanomho ka mae profet chaichaghi, ka mae khaekae, ka mae neilehe, ka mae glalase nei ka mae iheire te ruarutha mifi. Ghotilo thosei fanomho ka mae igre kate chekeni mare te mala thosei au ke pari gna nogna nolaghi king gna Babilonia teuna.

¹⁰ Mae igre chaghi ghami ghotilo fabrahu. Nu jame te fatutuani di ghotilo nodi cheke mae igre na, iara ginauna khi tei ghami ghotilo ka vido aheva te khaba fara.

¹¹ Nu jame kaisei kantri magnahaghei te au ke parigna nogna nolaghi king gna Babilonia. Kantri igne ginauna na jateula buluka te snakreni mae khoto gna na te lisei lao vido thaba balu nhugha ka grara gna na mala loku teu ia eghu. Mae igre ginauna na loku fabrahu ranghini mana. Eghuteuna iara ginauna snakredi mae igre mala au ka nodi kantri mare igne. Mare tangomana te loku nagare nei au fakeli nodi teu ka vido igne.’ Igne cheke gna Lord.”

¹² Aonu iara tei ne toutonudi nafnata cheke igre ka King Sedekaea, mae ihei te king gna Juda. Iara ne cheke eghu ka mana, “King, ghotilo lisa lao ghami themi ke pari gna nogna nolaghi king gna Babilonia baludi nogna naikno manare. Ghotilo jateula buluka te snakreni mae khoto gna na te lilisei vido thaba balu nhugha ka grara gna na te mala loku ia eghu mala loku ranghidi mare. Jame te eghu ghotilo na, ghotilo ginauna au fakeli nomi jare.

¹³ Lord la chekenihi, jame iheire te tirodi au ke parigna nogna nolaghi king gna Babilonia na, mare ginauna lehe ka magra, ka theo gano nei ka fogra biꞌo. Ba, king? Iagho magnahaghei te lehe baludi nou naikno igre?

¹⁴ Ghotilo thosei fanomho ka nodi cheke mae profet chaichaghi igre, eigna mae igre na chekeni ka ghotilo te mala thosei au ghotilo ke parigna nogna nolaghi king gna Babilonia teuna. Mare na chaichaghi kolho ka ghotilo.

¹⁵ Lord ne cheke eghu, ‘Iara neke theome kurudi mae igre, nu mare toutonu chaichaghi ka nanghagu iara. Jame te fatutuanidi ghotilo nodi cheke mae igre na, iara ginauna khi ghami ghotilo baludi mae profet tuare mala jifla kokoni ghotilo nomi namono igne mala tei lehe ka vido te khaba.’ ”

¹⁶ Aonu iara ne toutonuni chekegna Lord igne ranghidi mae pris nei naikno teu igre ne cheke eghu, “Igne unha te chekeni Lord na: Ghotilo thosei fanomho ka nodi cheke mae profet te cheke eghu igre, ‘Theome raugha mare ginauna nake atha glepo gna nogna Sugablahi Lord te au teu Babilonia gognaro gre, mala atha ke pulo mei Jerusalem.’ Mae profet igre chaghi ghami ghotilo!

¹⁷ Ghotilo thosei fanomho ka nodi cheke mae igre. Te keli na ghotilo au ke parigna nogna nolaghi king gna Babilonia, te eghu na ghotilo ginauna au fakeli nomi. Na eghunu groꞌe namono igne eghu.

¹⁸ Jame te mae profet tutuani mare te toutonuni chekegu iara na, mare nabadi te tarai ka iara Lord mae ihei te au nolaghi fateote'o na, mala fanogradi iara mae naoka tuare mala theome mei atha tei mare Babilonia glepo te au teu ka Sugablahi igne, nei ka suga gna king gna Juda, nei ka keha vido Jerusalem.

^19-20 King Nebukadnesa mei Jerusalem ne atha king Jehoiakin, thugna King Jehoiakim gna Juda, baludi mae biꞌo mala baubatu ka namono Jerusalem nei ka keha vido Juda mala tei Babilonia. Eghuteuna ka narane igne, mana neke theome atha phei khegra biꞌo ke ulugna nogna Sugablahi Lord, nei tangk teke horo ka bras, nei kat mala pala khoꞌu, nei keha glepo gna Sugablahi na. Glepo igre au faleghu ka namono Jerusalem.

²¹ Aonu iara God, nodi Lord mae Israel, iara Lord mae ihei te au nolaghi fateote'o, iara na cheke eghu ka ghotilo, iara cheke eidi glepo te au teu ka Sugablahi igne, nei ka sugagna king gna Juda, nei ka keha namono Jerusalem:

²² ‘Mae naokare ginauna atha glepo igre tei Babilonia. Glepo igre ginauna au jare ghilei thoke ka narane na teke atha fapulo di iara re. Ka narane tuana, iara ginauna nake atha fapulo glepo igre mala ke lilisei Jerusalem mala au dire.’ ” Igne cheke gna Lord.