Profet Jeremaea 24 - Buka Blahi Ka Cheke Holo

Phei kharaꞌo te fodu ka sisi fig te keli nei te diꞌa

¹ King Nebukadnesa atha King Jehoiakin, thugna king Jehoiakim baludi mae biꞌo nei mae glalase teudi Juda igre ne tei Babilonia. Ke leghugna igne, Lord ne falalase ka iara kaisei mifi. Ka mifi igne iara ne filodi phei kharaꞌo te fodu ka sisi fig. Phei kharaꞌo igre au ke ulugna nogna Sugablahi Lord na.

² Kaisei kharaꞌo fodu ka sisi fig te keli, nu keha na fodu ka sisi fig te diꞌa te theome naba kaisei naikno te ghamu na.

³ Aonu Lord ne cheke eghu ka iara, “Ghema Jeremaea, unha te filodi iagho re?” Iara ne cheke eghu, “Sisi fig. Kehare keli, nu kehare diꞌa theome naba kaisei naikno te ghamu na.”

⁴ Aonu Lord ne cheke eghu ka iara,

⁵ “Iara Lord, nodi God mae Israel, iara neke snakredi mae naokare mala mei atha naiknodi Juda igre mala tei au ka kantri Babilonia. Naikno igre jateula sisi fig te keli ra eghu.

⁶ Iara ginauna fablahidi nei reireghi fakelidi eghu. Eghuteuna iara ginauna nake atha fapulodi agne Juda mala ke au fakeli. Iara jateula kaisei mae te babana suga te maku te theome tangomana te groꞌe, ba jateula kaisei nagare te theome krathu ra eghu.

⁷ Iara ginauna nhaꞌa lao gaoghatho te keli ka mare, mala tangomana mare te lase ghau iara Lord. Eghuteuna mare ginauna nogu naikno iara, eghuteuna iara nodi God mare, naugna mare ginauna nake pulo mei ka iara balu thofno gaoghathodi.

⁸ “Nu King Sedekaea baludi nogna mae funei, nei naikno teu te au faleghu Jerusalem igre, ba iheire te rikha te tei au Ijep, nafnata naikno igre jateula sisi fig te boto te theome naba kaisei naikno nate ghamu ra eghu. Iara ginauna koko naikno igre, jateula mae te koko sisi fig te boto ra eghu.

⁹ Iara ginauna na neneidi fara mare, eghuteuna naiknodi keha kantri ka nauthoglu igne ginauna rhana nodi fara ka mare. Iara ginauna khi tafridi, eghuteuna aheva te au mare na, naikno te au ka vido tuana ginauna maꞌedi, cheke fadiꞌadi nei tibridi eghu mala thoke mei puhi biꞌo ka mare.

¹⁰ Iara ginauna kuru meidi mae naokare mala mei falehedi mare mala krogha theo naiknogna glose teke tufa iara ka mae kuꞌedi mare tifa ra.”