Profet Jeremaea 22 - Buka Blahi Ka Cheke Holo

Nogna chekeLordranghini king gna Juda

¹ Lord ne cheke eghu, “Jeremaea, iagho tei ka king gna Juda mala cheke eghu ka mana,

² ‘Iagho king gna Juda, vikegna King Devet. Iagho baludi nou mae funei ra nei nou naikno teura fanomho fakeli ka cheke igne.

³ Lord ne cheke eghu: Ghotilo mala leghuni kolho puhi te keli nei doglo teuna. Ghotilo toghoni mae ihei te blau mare nogna glepore igne. Ghotilo thosei chaghidi ba falehedi naikno te mei funudi ka kantri delei, ba thau tela lehehi khetodi, ba goro sua tela lehehi idodi ba kmadi. Eghuteuna ghotilo thosei fiti falehedi naikno te au ka namono igne.

⁴ Jame te leghuni ghotilo nogu cheke iara igne na, iheire te karha mei ka vikegna King Devet igre ginauna king mala funei fabrahu. Eghuteuna hatimare mae king baludi nogna funeire ginauna saghe ka hose nei ka chariot mala ruma nei jifla eghu ka glalabagna nogna suga biꞌo king.

⁵ Nu jame te theome leghuni ghotilo nogu cheke iara igre na, tutuani fara, iara ginauna goigoni ni fara suga biꞌo igne.’ ”

⁶ Lord ne cheke eigna nogna suga mae king gna Juda. Mana ne cheke eghu: “Suga igne thono famane fara jateula namono Gilead nei Thogele Lebanon teura eghu. Nu neuba, iagho ginauna na jateula namono nagou te theome au kaisei naikno tagnara eghu.

⁷ Iara ginauna kuru mei keha mae mala goigoni suga biꞌo igne. Mare ginauna atha mei baludi nhirama mala kato soru khegra biꞌo teke hohoro ka gaju sida igre mala koko lao ka khaꞌaghi.

⁸ “Ke leghugna igne, naiknodi keha kantri are ginauna mei salaꞌu ka namono igne. Mare na ghusna eghu, ‘Tore, naugna unha si Lord te goigoni famane namono ignea?’

⁹ Mare ginauna cheke eghu, ‘Naugna naiknore ne theome leghuni nogna nhaꞌa cheke Lord nodi God teke loku baludi mare na. Mare tarai nei loku ranghidi eghu keha god delei!’ ”

Nogna chekeLordranghini King Jehoahas

¹⁰ King Josaea la lehehi, eghume ghotilo thosei tanhi ni mana. Te keli na ghotilo tanhi fabiꞌo nei diꞌa nagnafani eghu thugna mana King Jehoahas, naugna naoka lokini mana la atha la tei ka keha kantri delei. Eghuteuna mana ginauna nake theome ke pulo mei ka glose teke karha mana tagna igne.

¹¹ Igne unha teke chekeni Lord eigna King Jehoahas thugna Josaea, mae ihei te atha sapegna mae kmagna na te king ka kantri Juda. Nu gognarona mana lisei soru nogna sape nafnakno na. Lord ne cheke eghu, “Mae igne ginauna na theome ke pulo mei.

¹² Hatimare mae naoka ginauna athani mana tei ka keha kantri delei. Eghuteuna mana ginauna theome tangomana na teke filoni nogna kantri na. Nu mana ginauna lehe ka kantri delei.”

Mae Jeremaea ne cheke ka King Jehoiakim

¹³ Lord ne cheke eghu, “Kokhoni ni fara king te theome leghuni puhi te doglo na kate horo nogna suga na. Nu mana chaghidi nogna mae glokure kate horo mare chogho ke kligna suga na. Kokhoni ni fara mae king te huhurudi nogna mae glokure, nu theome folidi teu igre.

¹⁴ Mae king igne ne cheke eghu, ‘Iara ginauna horo kaisei nogu suga biꞌo fara, eghuteuna suga igne ginauna au kmana chogho biꞌo kligna.’ Mana ne horo kmana wida biꞌo ka suga igne, eghuteuna lalaoni fakeli gringnigna suga igne ka famane gaju sida ne peda ukru.

¹⁵ “King, jame te lalaoni iagho nou suga na ka famane gaju sida na, gaoghathomu iagho na fnakno ke klignadi keha mae king igre eghu jau? Kmamu iagho king Josaea tifa ia, mana mae mala ghamu, mae mala koꞌu nei mae mala gleale'a eghu ka nakarhagna na. Leuleghu fata na mana leghuni fabrahu puhi te doglo na, eghuteuna mana jaola fate ka puhi te doglo, eghuteuna mana au ka nakarha te thofno keli fara.

¹⁶ Kate fatedi naikno te kuma nei naikno te glaꞌe teu igre, mana phile ka mare. Ka puhi igne mana fakakhana te lase ghau iara na.

¹⁷ Nu iagho King Jehoiakim, fariu riu mala atha glepo ka puhi te theome doglo. Leuleghu fata na, iagho falehedi iheire te theome eni kaisei glepo te diꞌa, iagho fakabru naikno, nei chaghi tafridi iheire te diꞌa.”

¹⁸ Eghume, igne unha te chekeni Lord ka King Jehoiakim, thugna mae Josaea king gna Juda: “King, jame te lehe iagho na, theo kaisei naikno nate diꞌanagnafa nei tanhi teuna. Naiknore na theome cheke eghu, ‘Tore, kokhoni ni mae thabusigu na! Tore, kokhoni ni greghagu na!’ Jame te lehe iagho na, theo kaisei naikno nate diꞌanagnafa nei tanhi teuna. Naiknore na theome cheke eghu, ‘Tore, kokhoni ni fara nogu mae funei teke fnakno fara ka naiknore ia tela lehe igne!’

¹⁹ Mare ginauna korho tei thinimu iagho na jateula thinigna kaisei dongki te lehera eghu tei ke kosi namono Jerusalem mala koko soru jare.”

Nogna chekeLordeigna Jerusalem

²⁰ Lord ne cheke eghu, “Ghotilo naiknomi Jerusalem, ghotilo tei ke raru Thogele Lebanon mala eha fabiꞌo. Ghotilo tei ke maghati Besan mala uareghe fabiꞌo. Ghotilo tei ke mata thogele Moab mala tanhi fabiꞌo, naugna mae teke namhadi fara ghotilo ke tulaogu iarai ra, mare la groꞌehi.

²¹ Tifa na ghotilo neke au fakeli nei au nomi kmana glepo neku. Nu kate cheke iara na, ghotilo tiromi fanomho ka iara. Igne puhimi ghotilo funu ka narane te mei nogu naikno iara ghotilo na. Leuleghu fata na ghotilo tiromi leghu ghau iara.

²² Naoka na ginauna mei jateula nuri biꞌo te mei pala chara te tei ra eghu. Mare na atha nomi mae funei nei kherami teu ghotilore mala tei sosolo ka kantri te khaba fara. Naiknore ginauna filo fapari ghami ghotilo, eghuteuna ghotilo ginauna mamaja nomi fara eidi puhimi te thono diꞌa fara re.

²³ Gognarona ghotilo au fakeli nomi ka famane suga te keli teke horo ka gaju sida gna Lebanon. Nu puhi biꞌo ginauna thoke ghami ghotilo. Eghuteuna ghotilo ginauna kabru ghemi tanhi fabiꞌo jateula gaꞌase te kabru kate fakarha sua ra eghu.”

Lordne cheke ka mae King Jehoiakin

²⁴ “Iara Lord, mae ihei te karha te tifa, iara na cheke ranghi nigho Jehoiakin thugna mae Jehoiakim king gna Juda. Neuba iagho ne lilisei ring fei khame nhetamu fagaglana gna nogna nolaghi biꞌo king na, iara ginauna atha fadelei ka iagho nolaghi biꞌo tuana.

²⁵ Iara ginauna snakre lao nigho iagho ka nodi nolaghi mae naoka te mhaghudi fara iagho ra. Iara ginauna snakre lao nigho iagho ka nogna nolaghi King Nebukadnesa, king gna Babilonia balu nogna armi.

²⁶ Iara ginauna snakre lao nigho ka mare balugna idomu mala tei koko ghami mare ka kantri delei. Eghuteuna ghopa ginauna au ka kantri igne ghilei lehe.

²⁷ Neuba ghopa idomu ne magnahaghei fara teke pulo mei ka thofno nomi namono na, nu ghopa na theome tangomana teke pulo mei na.”

²⁸ Jeremaea ne cheke eghu, “Mae Jehoiakin igne jateula suspen glose tela diꞌahi te theo kaisei naikno te magnahagheni ra eghu. Naugna unha si Lord te magnahaghei kuru teini mana baludi thugnare ka kantri delei ignea?

²⁹ Nogu glose iara, nogu glose iara, nogu glose iara! Iagho fanomho fakeli ka chekegna Lord!

³⁰ Lord ne cheke eghu, Ghotilo rioriso thoutonu eigna mae igne. Mae igne jateula mae te theo thugna ra eghu. Eghuteuna mana ginauna na theome eni kaisei glepo te keli ka nakarhagna na. Naugna theo kaisei ka vikegna mae igne nate ke tughuni mana mala teke gnokro ka nogna sape nafnakno mae king Devet te mala funei fruni ka kantri Juda.”