Profet Jeremaea 21 - Buka Blahi Ka Cheke Holo

Hatimare mae Babilonia ginauna uluni Jerusalem

¹ Lord ne tusu lao nogna cheke na ka mae Jeremaea. Ka narane igne mae King Sedekaea ne kurudi mae Pasur thugna mae Malkaeja ghe mae pris Sefanaea thugna mae Masea mala tei toutonu phei mae igre gaoghathogna na ka mae Jeremaea. Phei mae igre ne cheke eghu ka mana,

² “Tarai ka Lord mala fakarhi ghita, naugna mae Nebukadnesa mae king gna Babilonia balu nogna soldia meihi mala magra ka tahati. Glahu eni Lord kaisei kofubobhoi jateula teke eni mana tifa ia eghu, mala ke figri mae king igne balugna nogna armi na.”

³ Nu mae profet Jeremaea ne cheke eghu ka phei mae igre,

⁴ “Ghopa tei cheke ka mae Sedekaea: Lord nodi God mae Israel igne ne cheke eghu, ‘Sedekaea, ghotilo jifla tei magra ka mae king gna Babilonia balu nogna armi te au teu ke kosigna Jerusalem. Nu iara thegu ginauna huta fapulo ghami ghotilo lamna namono balu nomi glepo mala magra.

⁵ Iara thono diꞌatagu fara ka ghotilo, eghuteuna iara ginauna magra heta ka ghotilo.

⁶ Iara ginauna snakre ari kaisei fogra biꞌo te thono diꞌa fara ka namono igne mala lehe ghotilo balu nomi glepo tautagu fateote'o.

⁷ Kmana naikno ginauna lehe ka fogra igne, ka magra nei ka theo gano. Ke leghugna igne, iara ginauna snakreni mae King Nebukadnesa balu nogna armi mala atha mae Sedekaea balu nogna ofisa nei iheire teke theome lehe ka fogra igne. Mae Nebukadnesa balu armi gna Babilonia, mae iheire te naoka ka ghotilo maemi Israel. Mare ginauna theome kokhoni ghami nei na theome keli ranghi ghami eghu ghotilo, nu mare ginauna falehe ghami ghotilo hui ka naflahi.’ Igne chekegna Lord.

⁸ “Eghuteuna Lord ne cheke eghu, ‘Jeremaea, iagho tusu lao nogu cheke iara igne ka naiknore: Iara Lord, iara gognarona falalase ka ghotilo phei nabrou. Kaisei nabrou mala karha, eghuteuna kehana mala lehe. Ghotilo mala vavahi ka phei nafnata nabrou aheva te magnahaghei leghuni ghotilo na.

⁹ Ihei te poru teu kolho ke lamnagna namono igne na ginauna lehe ka magra, ba ka theo gano, ba ka fogra te diꞌa. Nu jame ihei te jifla ke kosi namono te snakre laoni thegna ka khamedi mae Babilonia te mei bara ligohoni namono igne na, mare ginauna theome faleheni mana.

¹⁰ Iara neke chekehi, eghuteuna iara ginauna na theome ke tughu nagnafagu na. Iara ginauna na theome eni kaisei glepo te keli ka namono igne. Theo. Iara ginauna goigoni ni fara ka khaꞌaghi.’ Igne chekegna Lord.

^11-12 “Ghotilo jaola cheke ka vikegna king gna Juda: Ghotilo vikegna King Devet, fanomho fakeli ka chekegna Lord! Igne chekegna Lord: “ ‘Leuleghu narane kate fate na, ghotilo fateni naikno na ka puhi te doglo. Eghuteuna ghotilo mala toghoni mae te blauni keha mae na. Te theome eni ghotilo igne na, iara ginauna na thono diꞌatagu fara eidi puhimi ghotilo te diꞌa igre. Eghuteuna diꞌatagu iara igne ginauna nako ghami ghotilo jateula khaꞌaghi te theome tangomana kaisei naikno te faleheni ra eghu.

¹³ Eigna te au teu ghotilo ke kligna thogele na, theome tangomana kaisei naikno nate mei magra te uluni nomi vido mala poru na eghu jau si ghotilo gaoghathomi na? Theo.

¹⁴ Iara thegu nate para ghami ghotilo eidi glepo diꞌa te edi fabrahu ghotilo igre. Iara ginauna nako nogna suga biꞌo mae king nei gobigna lepo te gnafa ke lamnagna namono biꞌo Jerusalem.’ ” Igne chekegna Lord.