Profet Jeremaea 20 - Buka Blahi Ka Cheke Holo

Profet Jeremaea ghe mae pris Pasur

¹ Kate toutonu mae Jeremaea cheke igne, mae pris Pasur, thugna mae Ima igne kaisei mae biꞌo te mala reireghigna nogna Sugablahi Lord igne ne nomhidi nogna cheke mae Jeremaea igre.

² Mae pris Pasur ne cheke ranghidi nogna mae glokure mala purini mae profet. Aonu mare ne liliseini mana rhegna nogna Grengatha mae Benjamin ka thogele ke raru Sugablahi. Aonu mare ne haruni mana farihoteidi phei thaba mala au papara mana.

³ Ka keha narane na, mae Pasur neke snakre fajiflani mae Jeremaea, eghuteuna mae Jeremaea ne cheke eghu ka mana, “Ghema Pasur, Lord ginauna theome kilo nigho iagho Pasur. Nanghamu iagho gognarona, ‘Mhaghu ka Vido te Gnafa.’

⁴ Igne unha te chekeni Lord eimu iagho na, ‘Iara ginauna na eni kaisei glepo te diꞌa mala thoke nigho iagho, eghuteuna iagho baludi mae kheramu are ginauna mhaghu fara. Iagho ginauna filou mei mae naokare mala aknu falehe kheramu iaghore. Jaola, iara ginauna snakre lao ghami ghotilo naiknomi Juda te gnafa ra ka khamegna king gna Babilonia. Kehare ginauna na aknu falehe, eghuteuna kehare ginauna atha tei mala sosolo Babilonia.

⁵ Eghuteuna iara ginauna snakre lao ka mae naokare gobigna lepo te keli fateote'o ka namono biꞌo igne, neubane famane glepo teke edi ghotilo themi ba nogna dedei mae king gna Juda. Mare ginauna atha fahui gobigna lepo igre pala tei Babilonia.

⁶ Eghuteuna iagho ghema Pasur, mae naokare ginauna atha nigho iagho baludi iheire te au ka khora sugamu na mala tei sosolo Babilonia. Eghuteuna iagho baludi mae kheramu teke toutonu chaichaghi iagho ka mare ra, ghotilo te gnafa na ginauna lehe ka namono igne, eghuteuna mare ginauna giugilu ghami ghotilo jare.’ ”

Mae Jeremaea ne diꞌanagnafa ne cheke kaLord

⁷ Lord, iara loku leghudi unha te chekedi iagho ra, nu iagho chaghi ghau iara kolho. Iagho nheta ulu ghau iara, eghuteuna nou nolaghi iagho na ulu ghauhi iara. Leuleghu fata na naiknore maꞌe ghau iara balu tibri.

⁸ Kate toutonuni iara chekemu iagho na, iagho neke snakre ghau iara mala cheke fabiꞌo nei fnaja eghu eidi puhi nate paradi iagho naiknore. Nu leuleghu fata na mare maꞌe ghau nei cheke fapari ghau eghu iara.

⁹ Jame te cheke eghu iara ka gaoghathogu thegu na, “Gognarona iara ginauna na ghatho ihoni Lord. Iara ginauna tirogu toutonu ka nanghagna mana.” Nu kate ghathoni iara igne na, glamnagu iara na brana jateula khaꞌaghi eghu. Eghuteuna iara haimidi nhubragu fateote'o re jateula te gnhubra eghu. Iara fariu riu mala haboni glamnagu na, nu iara theome tangomana te eni igne na.

¹⁰ Iara nomhidi naiknore buiburi eghu eigu iara, “Mae profet igne chekedi koba glepo te mhaghudi tahati te au falithui ghita igre. Tahati na kiloni mana ka nangha igne, Namhaghu na Aufalithui Heva Heva! Tahati na tei cheke ka mae biꞌo ra!” Mae kheragu iara gre jaola ofo ghau iara te mala eni iara unha glepo te jafra na ne cheke eghu fabrahu, “Tahati na saosagroni mana mala tangomana tahati te uluni mana na, eghuteuna ke tughu fapulo unha teke edi mana ka tahati ra eghu.”

¹¹ Nu iagho Lord, iagho jateula kaisei mae soldia nheta te au fabrahu teu balugu iara ia eghu. Mae iheire te para ghau iara igre ginauna glaꞌe soru na theome ulu ghau iara. Mare ginauna mamaja fara, eghuteuna mamaja igne ginauna theome gnafa ka mare tifa tifa.

¹² Lord, iagho mae ihei te au nolaghi fateote'o! Iagho ngala tangomana te fariu riudi naikno te kelire, naugna iagho laseni fara gaoghathogna naikno na. Gognarogne iara magnahaghei te filo nigho iagho te paradi naikno igre, naugna iara lilisei nogu diꞌanagnafa na ka khamemu iagho.

¹³ Tahati koje ranghini Lord! Tahati cheke fakelini nanghagna mana! Naugna mana toghodi koba iheire te kuma ka nogna nolaghi mae te diꞌa.

¹⁴ Iara tiroguni fara narane teke karha mei iara igne! Thosei snakreni kaisei naikno mala toutonuni kaisei glepo te keli eigna narane teke fakarhi ghau idogu na!

¹⁵ Snakre lao puhi biꞌo ka mae ihei te atha nonomho te mei cheke eghu ka mae kmagu iara na, “Khetomu iagho ia au kaisei thugna nalhaꞌu.” Mae kmagu iara na nomhini igne neke gleale'a fara.

¹⁶ Iara magnahaghei puhi biꞌo thokeni mae igne, jateula puhi biꞌo teke thokeni namono teke goigoni Lord ia eghu. Iara magnahagheni mae igne te nomhidi naikno te tanhi fei hamerane, eghuteuna hatimare mae naoka eha fabiꞌo fari hotei naublatha.

¹⁷ Iara diꞌatagu fara, naugna mae igne neke theome falehe ghau iara kani au teku iara ka thiꞌagna idogu na, jame neku na thiꞌagna idogu iara na jame neke bekugu iara.

¹⁸ Naugna unha neke jifla mei ka thiꞌagna idogu na sara gnea? Thua nafnata puhi biꞌo kolho te thokeni nakarhagu iara na, eghuteuna leuleghu fata na iara tanhi nei diꞌanagnafa eghu kolho. Eghuteuna nakarhagu fateote'o iara na au mamaja kolho.