Profet Jeremaea 19 - Buka Blahi Ka Cheke Holo

Kantri Juda igne jateula naphosa suspen eghu

¹ Lord ne cheke eghu ka iara, “Jeremaea, iagho tei foli kaisei suspen glose, aonu iagho atha keha mae mala baubatu, nei keha mae biꞌo ka hatimare mae pris.

² Eghuteuna ghotilo jifla ka grengathagna namono biꞌo Jerusalem te kiloi mare, Grengatha Naphosa Suspen Glose igne mala soru ka glogu Hinom. Ka vido igne iagho ginauna toutonu ka mare cheke teke tusu ari iara ka iagho ra.

³ Igne thoutonu te magnahagheni iara te mala chekeni iagho na: Ghotilo mae king di Juda nei naiknomi Jerusalem teura, fanomho fakeli ka nogna cheke Lord igne. Lord mae ihei te au nolaghi fateote'o, nei nodi God mae Israel teu igne ne cheke eghu, ‘Iara ginauna eni kaisei puhi biꞌo mala thokeni namono igne. Eghuteuna ihei te nomhini thoutonu igne ginauna rhana fara.

⁴ Iara ginauna eni igne, naugna naiknogna namono igne figri tagru ghau iara ne goigoni namono igne. Mare neke atha mei nodi god keha kantri delei mala pogho soru tadi. Eghuteuna mare gahu gano neke fafara ka god igre. Naikno igre baludi mae kuꞌedi tifa ra, nei hatimare mae king di Juda jaola theome lasedi god igre. Namono igne fodu ka dadaradi naikno te doglo.

⁵ Mare babana olta mala gahu thudi nalhaꞌure ka khaꞌaghi mala fafara ka god Baal. Nu iara neke theome chekedi mare te mala eni nafnata puhi igne. Nafnata puhi igne thono diꞌa fara theome jifla mei ka gaoghathogu iara na.

⁶ Naugna igne, naiknore ginauna theome kiloni vido igne, Tofet ba Glogu Hinom, nu mare ginauna kiloni Glogu Mala Falehe Naikno.

⁷ “ ‘Eghuteuna ka vido igne iara ginauna goigonidi nodi gaoghatho maedi Juda nei Jerusalem. Iara ginauna snakredi nodi naoka mare are mala falehedi mare ka magra. Eghuteuna iara ginauna snakre lao ka nanghaji nei ka glepo te tautagu eghu mala ghamu fateo thinidire.

⁸ Iara ginauna goigoni namono igne, eghuteuna naikno te filoni igne ginauna cheke fadiꞌani. Iheire te salaꞌu ka vido igne ginauna mare rhana fara cheke fadiꞌani.

⁹ Kate mei mae naokare te kegra faligohoni namono na te magnahaghei aknu falehedi naiknore, iheire te au ke lamnagna namono igne ginauna theo gano rofo. Aonu mare ginauna rofo fara na ghilei ghamu thudi nalhaꞌu, thudi gaꞌase nei kheradi teure.’

¹⁰ “Jeremaea, kate toutonu te gnafa iagho cheke igre, iagho koko soru suspen glose igne pari mala nghuja theo tokagna kate filo teu naiknore.

¹¹ Iagho cheke eghu ka mare, ‘Lord mae ihei te au nolaghi fateote'o igne ne cheke eghu: Iara ginauna na jaola goigoni ni fara nomi namono nei kantri teu ghotilo igne, mala jateula suspen te phosa te diꞌa igne eghu mala theome tangomana kaisei naikno teke salo fodu na nghuja igre. Eghuteuna namono Tofet igne ginauna vido mala giugilui, eghuteuna vido igne ginauna fodu ka thinidi maedi Juda.

¹² Iara cheke fadoglo ari ka ghotilo. Igre glepo nate edi iara ka namono igne baludi iheire te au tagnare. Iara ginauna goigoni namono igne mala thofno jateula Tofet eghu.

¹³ Ghotilo gahu insens mala pogho soru ka nathunu ke kligna suga Jerusalem, nei ka sugadi hatimare mae king. Eghuteuna ghotilo tofa waen ke kligna olta mala kilo fnaknodi keha god. Suga te gnafa igre ginauna kafe chara fara jateula namono Tofet eghu ka tathagu iara na.’ ”

¹⁴ Eghume, iara leghuni nogna cheke Lord na ne tei ka namono Tofet ne toutonuni nogna cheke mana na. Gnafa teuna, iara jifla Tofet neke tei ka vido ke ulugna nogna Sugablahi Lord, eghuteuna iara kegra ka vido igne ne cheke eghu ka naiknore,

¹⁵ “Lord mae ihei te au nolaghi fateote'o, nei nodi God mae Israel teu igne ne cheke eghu, ‘Fanomho fakeli ghotilo ia! Ghotilo naiknomi Jerusalem, nei iheire te au ka vido rhegna namono Jerusalem, phaꞌumi ghotilore maku fara jateula thina eghu theome magnahaghei te nomhini chekegu iara na. Eghume, puhi biꞌo ginauna thoke mei ka ghotilo.’ ”