Profet Jeremaea 18 - Buka Blahi Ka Cheke Holo

God na jateula kaisei mae mala horo suspen ka glose eghu

¹ Lord neke cheke eghu ka iara,

² “Jeremaea, iagho tei ka sugagna mae te mala horo suspen ka glose ia, eghuteuna iara ginauna cheke ka iagho.”

³ Aonu iara leghuni cheke mana igne ne tei filoni mae mala horo suspen ka glose igne.

⁴ Nu iara filoni suspen te eni mana igne theome keli. Aonu mana puipuki glose na ne eni kehai nafnata suspen nabagna unha te magnahagheni mana na.

⁵ Aonu Lord ne cheke mei ka iara nogna cheke na. Mana ne cheke eghu ka iara,

⁶ “Ghotilo naiknomi Israel! Theome tangomana iara te eni ka ghotilo unha te magnahagheni iara na, jateula mae ihei te horo suspen ka glose leghuni unha te magnahagheni mana na neu si ghotilo ia? Theo fara, ghotilo au ka khamegu iara kolho, jateula glose te au ka khamegna mae te mala horo suspen ia eghu.

⁷ Jame keha fata iara cheke ka naiknogna kaisei kantri, eghuteuna iara ginauna roꞌe soru nodi namono mare igne, eghuteuna iara ginauna goigonidi mare.

⁸ Nu jame tughu naiknore puhidi te diꞌare meuna, iara ginauna kokhonidi nei na theome paradi eghu jateula teke kulu ghathoni iara ia eghu.

⁹ Eghuteuna keha fata iara jame cheke eigna te mala babana haghe kaisei vike ba kantri mala ke rheta fapulo.

¹⁰ Nu mare tirodi leghu ghau iara ne edi fabrahu glepo te theome keli ka gaoghathogu iara na. Eghuteuna iara ginauna theome edi glepo te keli teke kulu ghathodi iara mala edi ranghidi mare teku ra.

¹¹ “Eghume, ghema Jeremaea, iagho na tei ka iheire te au ka namono Jerusalem nei ka keha vido Juda mala cheke eghu ka mare, ‘Lord ne cheke eghu: Gognarona iara ghaoghatho mala para fadiꞌa ghami ghotilo. Ghotilo te gnafa na mala koko puhimi te diꞌare, eghuteuna ghotilo mala funu leghuni puhi te doglo na mala edi glepo te kelire.’

¹² Nu mare ginauna cheke eghu, ‘Theo! Ghehati magnahaghei te eni unha te ghathoni themi na. Ghehati ginauna na kafe maku jateula thina eghu phaꞌumire mala leghuni kolho puhi te diꞌa te au ka nagnafami gre.’ ”

¹³ Naugna igne, Lord ne cheke eghu: “Tore! Tei toredi naikno te gnafa ka nauthoglu igne. Ihei te nomhini nafnata thoutonu te diꞌa eigna glepo tuana? Glepo te eni mae Israel igne jateula kaisei gaꞌase majaghani te leghuni puhi te diꞌa na ia eghu kolho.

¹⁴ Leuleghu fata na thogele biꞌo Lebanon igre thafru ka khoveo thina. Eghuteuna glokha khoꞌu te jifla mei ka thogele igre thofno jemnu fara, theome tangomana te moja na.

¹⁵ Nu naikno teke vavahi iara mala nogu naikno thegu teku igre la ghatho iho ghauhi iara. Leuleghu fata na mare gahu insens koba ka mumuju god te theo nafudi igre. Mumuju god igre batudi mare mala tei snivi ka famane nabrou te fei au na, eghuteuna mare leghuni kolho nabrou te diꞌa na mala uka tagna.

¹⁶ Aonu nodi glose mare na ginau thofno diꞌa fara, eghuteuna naikno te gnafare ginauna cheke faparini glose igne. Iheire te liu tagna na ginauna rhana nodi fara cheke fadiꞌadi mare.

¹⁷ Iara ginauna snakredi hatimare mae naoka mala ngolhi tafridi nogu naikno iara re, jateula nuri biꞌo te mei ke maghati te flalo te tei chara ra eghu. Kate thoke mei puhi biꞌo igne ka mare na, iara ginauna figri lao thagrugu na, eghuteuna tirogu toghodi mare.”

Naiknore magnahaghei te fadiꞌani mae Jeremaea

¹⁸ Naiknore ne cheke eghu, “Tore, tahati na hironi kaisei nabrou te mala fadiꞌani mae profet igne. Nogna cheke mana igre theome tutuani. Mae pris igre ginauna au baluda fabrahu te mala farirhiu ghita na. Eghuteuna mae glalase igre ginauna au baluda fabrahu te mala tusu ranghi ghita gaoghatho te keli na. Eghuteuna noda mae profet tahati igre jaola au baluda te mala toutonu ranghi ghita nodi cheke hatimare mae profet ra. Eghume tahati tiroda fanomho ka nogna cheke mae Jeremaea igre.”

¹⁹ Lord, fanomho ka nogu tharai iara gne! Iara magnahaghei nigho iagho te ghathodi cheke te edi mae naoka ka iara ra.

²⁰ Ba, keliu kolho te tughu fapulo glepo te diꞌa na ka glepo te keli na? Theo. Neuba mare ne magnahaghei falehe nigho iagho neu, iara tore nigho iagho mala thosei diꞌatamu nei paradi eghu mare. Nu mae naoka igre magnahaghei te goigoni ghau iara, jateula kaisei mae te dokha khora te mala snoꞌo bosu tagna te mala falelehera eghu.

²¹ Eghume gognarona iara magnahaghedi thudi mare igre te lehe ka grofo. Eghuteuna snakredi hatimare mae naoka mala mei aknu falehe keha ka mae igre. Eghuteuna kehare mala lehe ka fogra biꞌo. Eghuteuna hatimare mae majaghani mala lehe ka magra. Eghuteuna goro gaꞌase mala theo khetodi nei thudi.

²² Lisa lao mala diꞌanagnafa nei tanhi fabiꞌo eghu mare kate kuru mei iagho mae te diꞌare mala ghosei mei goigonidi mare. Eni igne sagho naugna mare neke dokha khora malagu iara, eghuteuna mare eni phighoro mala khale iara.

²³ Lord, iagho lasedihi gaoghatho te diꞌa te mala falehe ghau iara teu mae igre. Iagho thosei atha fadelei nakhibodire! Diꞌa tamu sagho ka mare, eghuteuna lisa lao ka mae naokare mala goigonidi mare ka tathamu iagho na.