Profet Jeremaea 17 - Buka Blahi Ka Cheke Holo

Naiknodi Juda theome koko puhidi te diꞌare

¹ Lord ne cheke eghu, “Ghotilo naiknomi Juda. Ghotilo theome tangomana te koko puhimi te diꞌare, eghuteuna nagnafami ghotilore maku jateula thina eghu. Eghuteuna keha ka ghotilo ghagra nanghadi nakhibomire ke kligna thina. Eghuteuna mare jaola rioriso nanghadi nakhibomi ghotilore ka honagna nomi olta ghotilo te mala pogho soru ka nomi mumujure.

² Ghotilo jaola leghudi fabrahu puhidi vikemi tifa teke pogho soru ka nogna olta mumuju god gaꞌase Asera, ba ke pari gaju blahi, ba ke kligna thogele biꞌo.

³ Ghotilo tei tarai fari hotei thogele ba fari hotei gukhu! Nakhibomi ghotilore au heva heva ka kantri igne, eghume iara ginauna snakre lao ka mae naoka nomi dedei nei nomi glepo te keli fateote'o baludi nomi vido blahi te mala tarai ghotilore.

⁴ Diꞌa tagu iara na ginauna brana fara jateula khaꞌaghi biꞌo eghu na gnubra ghami ghotilo. Naugna puhi te edi fabrahu ghotilo igre, ghotilo ginauna theome khotogna namono teke snakre lao iara ka mae kuꞌemi ghotilo tifa ra. Eghuteuna iara ginauna snakredi mae naokare mala atha ghami ghotilo tei ka namono aheva ghotilo te theome laseni mala loku jateula sneka eghu.”

Puhidi phei nafnata naikno

⁵ Lord ne cheke eghu, “Ihei te figri tagru ghau iara, nu rouronu kolho ka nogna nolaghi naikno te mala fakarhini na teuna, iara ginauna fateni naikno tuana mala thokeni hoholo biꞌo.

⁶ Nafnata naikno tuana jateula kaisei gaju ikoi ka namono nagou, ba kaisei namono te theo kaisei khoꞌu tagna, eghuteuna glosegna na fodu kolho ka tahi. Nafnata naikno igne theo kaisei glepo te keli ka nakarhagna na.

⁷ “Nu ihei te fatutuani ghau iara, eghuteuna rheta gaoghathogna na ka iara teuna gleale'a nogna fara.

⁸ Nafnata naikno igne jateula gaju te karha ka geri khoꞌu biꞌo ra eghu. Glathigna gaju igne soru atha khoꞌu pari. Eghuteuna khaklagnare kakarha fabrahu theome tangomana te brango na. Neubane ka nhigra aho, naꞌa ginauna na ure fabrahu kolho. Na jateula tuana eghu mana na theome mhaghu nei nanga nogna eghu kate thoke mei puhi biꞌo na.”

⁹ Ihei te lase fakelini gaoghathogna naikno na? Gaoghathogna naikno na jateula kaisei fogra biꞌo te theome tangomana kaisei naikno teke famafoni ra eghu. Thiꞌagna naikno na fodu ka chaichaghi. Ihei te lase fakelini nagnafagna naikno na?

¹⁰ “Iara Lord kolho te filoni glamnagna naikno na. Eghuteuna iara fariu riuni koba gaoghathogna naikno na, mala ke tughu fapulo ka naikno igne nabagna unha teke eni mana na.”

¹¹ Ihei te atha sileni ka puhi te theome doglo na, mana jateula nanghaji te blau nakredi ka keha nanghaji na te lilisei ka nogna gnoku thegna na ra eghu. Nogna dedei mana igre ginauna hui kate mae majaghani teu mana na. Eghuteuna leghulahugna mae igne ginauna laseni te nogna gaoghatho naikno na thono fameomekro fara kolho.

Jeremaea ne tarai kaLord

¹² Lord, funu ka narane teke babana iagho nou Sugablahi na farihoteimi ghehati ia ne jateula nogna sape nafnakno mae king te ghatho tahuni naikno te gnafa ra neu.

¹³ Lord God, ghehati maemi Israel gre fatutuani nigho. Ihei te figri tagru nigho na ginauna mamaja nogna fara. Ihei te tei koko nigho iagho na, ginauna na jateula cheke te rioriso soru ke kligna nusu ra eghu, eghuteuna ghosei me dofini teura eghu kolho. Lord, iagho jateula glokha khoꞌu te tusu mei karha na ka ghehati ra eghu.

¹⁴ Lord, iara cheke fakeli nigho fabrahu! Fablahi ghau iara te fogra gne mala ke keli fapulo iara. Jame te fakarhi ghau iara iagho na, iara ginauna karha fabrahu.

¹⁵ Mare cheke eghu fabrahu ka iara, “Ne faꞌunha si chekegna Lord teke toutonu iagho ia? Naugna unha site theome tutuani cheke tura?”

¹⁶ Nu neuba, iara theome babaꞌo te reireghidi nou naikno iagho igre, eghuteuna iara theome magnahagheni kaisei puhi biꞌo te thokedi mare na. Cheke te gnafa te chekedi iara igre iagho kafe lasedi gnafa.

¹⁷ Kate thoke mei puhi biꞌo na, iagho ngala nogu vido te keli te mala poru iara na. Thosei famamhaghu ghau.

¹⁸ Mare para ghau iara fabrahu, famamajadi sagho, nu thosei famamaja ghau iara eghu. Famamhaghudi sagho, nu iagho thosei famamhaghu ghau iara. Snakre mei puhi biꞌo sagho mala thokedi mare, eghuteuna iagho mala phei fata paradi mare.

Leghuni vetula eigna narane Sabat

¹⁹ Lord ne cheke eghu ka iara, “Jeremaea, iagho tei kegra ka grengathagna namono biꞌo Jerusalem te kiloni mare, ‘Nodi Grengatha Naiknore.’ Hatimare mae king di Juda igre tei ruma koba ka grengatha igne. Eghuteuna ke leghugna igne, iagho ke tei ka keha grengatha biꞌogna namono biꞌo igne.

²⁰ Iagho cheke eghu ka mae king gna namono biꞌo igne, ‘Ghotilo mae king baludi naiknodi Juda nei Jerusalem te mei ruma ka grengatha igne ra, fanomho mei ka nogna cheke Lord igne.

²¹ Lord ne cheke eghu: Jame te magnahaghei karha fabrahu ghotilo na, ghotilo thosei pala kaisei glepo te tahu ka narane Sabat na mei ruma ka grengathagna namono Jerusalem.

²² Ghotilo thosei eni kaisei gloku ba pala jifla kaisei glepo te tahu ka sugamire. Ghotilo tajini fabrahu narane Sabat te blahi igne, jateula teke chekeni iara ka kuꞌemi ghotilo tifa ra eghu.

²³ Nu kuꞌemi ghotilora neke tirodi fanomho nei leghuni neku nogu cheke iara na. Mare maku fara jateula thina eghu nagnafadire neke tirodi ghau iara te farirhiuni puhi te keli na.

²⁴ Tutuani fara te chekeni iara ka ghotilo na, iara magnahaghei ghami ghotilo te mala leghuni nogu cheke iara re. Iara magnahaghei ghami ghotilo te mala tajini narane Sabat te blahi igne, eghuteuna ghotilo thosei pala mei kaisei glepo te tahu lamna namono biꞌo ka narane igne. Jame te tajini ghotilo narane Sabat igne, eghuteuna theome eni ghotilo kaisei gloku ka narane igne teuna,

²⁵ hatimare mae king ka vikegna mae King Devet baludi nogna mae funeire ginauna tangomana te ruma mei ka namono igne. Mare ginauna tangomana te saghe te mei ka hose nei ka chariot. Iheire te au Jerusalem nei ka keha vido Juda teu igre ginauna tangomana te mei baludi mare na. Eghuteuna namono biꞌo Jerusalem igne ginauna fodu fabrahu ka naikno.

²⁶ Mare ginauna mei Jerusalem mala pogho soru ka iara. Mare ginauna mei funudi ka namono Juda, ka namono rhegna Jerusalem, nei ka nohi Benjamin. Naiknore ginauna soru mei funudi ka gukhu, nei ka thogele ikodi ke mosu, nei ka namono nagou ke mata Juda. Kate mei mare ka nogu Sugablahi iara Lord na, mare ginauna atha mei sipu ba buluka mala gahu fafara, nei keha nafnata fafarai, balu gano ka nagare, insens, nei thufa mala tegio ka iara.

²⁷ Nu jame te theome leghu ghau nei tiromi tajini teu ghotilo narane Sabat te blahi igne na, eghuteuna jame te pala ghotilo glepo te tahu te ruma Jerusalem ka narane igne na, iara ginauna kuru mei kaisei khaꞌaghi biꞌo mala gnhubra namono biꞌo Jerusalem baludi grengatha biꞌo nei vido mala poru, eghuteuna ginauna na theo kaisei naikno nate faleheni khaꞌaghi igne na.’ ”