Profet Jeremaea 15 - Buka Blahi Ka Cheke Holo

Puhi biꞌo ginauna mei Juda

¹ Aonu Lord ne cheke eghu ka iara, “Jeremaea, fanomho sagho. Jame neubane mei namo ka iara mae Moses ghe mae Samuel phei nogu mae gloku iara tifa ra, neuba phia mare ne mei tanhi ka iara mala toghodi naiknodi Juda igre neu, iara ginauna na theome kokhonidi naiknodi Juda igre. Kuru tei delei naikno igre! Iara theome magnahaghei te filodi agne na!

² Eghuteuna jame ghusna eghu mare ka iagho, ‘Aheva nate tei ghehati na?’ Iagho ginauna na cheke eghu ka mare, ‘Lord ne cheke eghu: “ ‘Iheire teke vahidi iara mala lehe ka fogra tekura, mare ginauna lehe ka fogra. Eghuteuna iheire teke vahidi iara mala lehe ka magra tekura, mare ginauna mala lehe ka magra. Eghuteuna iheire teke vahidi iara mala lehe ka grofo tekura, mare ginauna mala lehe ka grofo. Eghuteuna iheire teke vahidi iara mala mei mae naokare mala atha fajifladi ka nodi namonore mala tei au ka keha kantri delei tekura, mare ginauna tei au jare.’

³ “Iara Lord ginauna kurudi fati glepo mala goigonidi mare: Mae naokare ginauna mei falehedi mare. Khumare ginauna mei tungnu fadelei thinidire. Eghuteuna nanghaji nei glepo tautagu teu igre ginauna ghamu fateo thinidire.

⁴ Eghuteuna kate ghathoni igne na, naiknogna nauthoglu igne ginauna mhaghu nodi fara. Iara ginauna edi glepo igre mala thokedi mare eidi puhi te diꞌa teke edi mae king Manase thugna mae King Hesekaea Jerusalem kani teke king mana Juda tifa ia.” Igne chekegna Lord.

⁵ Lord ne cheke eghu, “Ghotilo naiknomi Jerusalem, Ihei gne nate kokhoni ghami ghotilo ginauna? Ihei gne nate tanhi ghami ghotilo na? Ihei gne nate nanga ghami ghotilo te mei hiro ghami ghotilo te au fakeli ba te theo teuna? Thono theo fara!

⁶ Ghotilo tiromi ghauhi iara la rikha ghau iara. Eghume iara ginauna falehe ghami nei goigoni ghami eghu ghotilo. Iara na theome kokhoni ghami ghotilo.

⁷ Iara ginauna atha fajifla ghami ghotilo ka nomi namono are, jateula mae ihei te koko haghe wit ka nuri te mala khoko chara ka khatudi ra eghu. Ghotilo nogu naikno iara gre jateula chara wit te theo nafudi ra eghu. Eghuteuna iara ginauna atha fadelei, nei goigoni fahui eghu nomi gobigna lepo te gnafa ghotilo are, naugna ghotilo ne theome koko puhimi te diꞌare.

⁸ Kmana mae soldia ginauna lehe ka magra, eghuteuna khetodi mae soldia igre na fiti au kolho. Eghuteuna gaꞌase te lehe khetodire igre ginauna kmana fara salaꞌudi nusu ka glilihi na are. Fari hotei narane, iara ginauna kurudi mae naoka mala mei aknu falehe hui hatimare mae soldia ka kantri Juda, eghuteuna idodi mae igre ginauna diꞌanagnafa fara balu mhaghu.

⁹ Gaꞌase te au fitu thugna na ginauna glaꞌe soru ghilei nigrai phanga. Naꞌa ginauna na jateula naprai te plulu fari hotei narane ra eghu. Gaꞌase igne ginauna mamaja nogna fara, naugna naꞌa theo kaisei thugna te karha na. Eghuteuna ihei nate karha teu ka ghotilo na, iara ginauna snakredi mae naokare mala mei aknu falehe.” Igne chekegna Lord.

Nogna fapea buiburi mae Jeremaea

¹⁰ Iara ne cheke eghu, “Ido! Iara thono diꞌa nagnafagu fara, eigna iagho neke fakarhi ghau iara! Leuleghu fata na iara fapholai nei cheke diꞌa fapulo eghu ka naiknogna kantri igne. Iara theome mae mala tufa sileni ka keha mae mala ke tughu fapulo mana ka iara, eghuteuna iara jaola theome kaoni sileni ka keha maere. Nu naikno te gnafa gre mare cheke fadiꞌa ghau iara.”

¹¹ Nu Lord ne cheke eghu ka iara, “Jeremaea, iara ginauna togho nigho iagho mala au fakeli. Eghuteuna iara ginauna chekedi mae naokare mala mei tore nigho iagho mala toghodi ka narane te thoke mei hoholo biꞌo ka mare na.

¹² “Mae ihei te tangomana nate lopidi aean nei bras teu igre? Mae naoka te mei ke raru igre rheta fara jateula aean eghu.

¹³ “Eghume, iara ginauna kuru meidi mae naokare ka ghotilo, eghuteuna ghotilo ginauna na theome tangomana ghami te uludi mare na. Iara ginauna tufa kolho nomi gobigna glepo te keli fateote'o ghotilo are ka hatimare mae naoka. Naugna ghotilo ne edi kmana glepo te diꞌa ka vido te gnafa ka nomi kantri na.

¹⁴ Diꞌa tagu iara na thunu jateula khaꞌaghi eghu, eghuteuna khaꞌaghi igne ginauna na nako ghami ghotilo. Iara ginauna snakredi mae naokare mala atha ghami ghotilo tei ka kaisei kantri te theome laseni ghotilo mala loku jateula sneka eghu.”

¹⁵ Aonu iara ne cheke eghu, “Lord, iagho lase fakelini nakarhagu iara na. Naikno igre para ghau iara fabrahu. Ghatho ghau nei reireghi ghau eghu iara sagho. Tughu fapulo sagho ka mare puhi te goigoni ghau iara fabrahu mare igne. Thosei faraugha te paradi mare na, na eghunu falehe ghau iara mare eghu. Filo sagho, mare cheke fadiꞌa ghau koba iara, naugna iara nou mae gloku iagho.

¹⁶ Lord God, iagho mae ihei te au nolaghi fateote'o, iara nou iagho kolho. Kate cheke iagho ka iara na, iara na atha chekemu iagho igne jateula ghegu gano keli eghu. Eghuteuna leuleghu fata na, chekemu iagho igne faglealeꞌa ghau iara fara.

¹⁷ Iara theome gnokro ka gaghamu baludi keha naikno te gleale'a koba balu maꞌe are. Nu leuleghu fata na, iara au fabrahu kolho thegu, naugna diꞌatamu iagho ranghidi naikno igre fodu ka iara.

¹⁸ Naugna unha ne kabru fabrahu si iara gnea? Thubugu iara igne ginauna theome ke keli fapulo. Naugna unha site theome gleale'a iara gnea? Iara magnahaghei nigho iagho te togho ghau iara, nu iagho jateula kaisei khoꞌu ba kaisei glokha te krango ra eghu.”

¹⁹ Aonu Lord ne cheke eghu ka iara, “Nou cheke iagho igre fameomekro kolho. Jame figri iagho gaoghathomu na teke figri mei ka iara na, iagho ginauna nake nogu mae gloku iara. Eghuteuna jame te toutonuni iagho chekegu iara te keli igne ka naiknore, iagho ginauna na jateula foflogu eghu iara.

²⁰ Iara ginauna togho nigho iagho mala kegra heta fari hoteidi naikno igre jateula kaisei gringni te horo mare ka bras ra eghu. Kate magri nigho mare na, mare ginauna theome tangomana te ulu nigho iagho na, naugna iara ginauna na au balumu iagho. Iara ginauna reireghi nigho nei fakarhi nigho eghu.

²¹ Iara ginauna atha fajifla nigho ka nodi nolaghi mae te diꞌare, eghuteuna taji fakeli nigho ka mae iheire te fariu riu para nighore.” Igne cheke gna Lord.