Profet Jeremaea 13 - Buka Blahi Ka Cheke Holo

Mae Jeremaea atha nogna pohe na ne cheke naba

¹ Lord ne cheke eghu ka iara, “Iagho tei foli kaisei pohe kmoꞌei mala pipichi. Nu iagho thosei titihi pohe igne ka khoꞌu eghu.”

² Aonu, iara leghuni unha te chekeni Lord igne ne tei foli kaisei pohe kmoꞌei ne pipichi.

³ Aonu ke leghugna igne, Lord neke fapea cheke eghu ka iara,

⁴ “Atha pohe teke foli iagho igne tei ka Khoꞌu Pera te namo ka nou namono iagho na mala pophoru lamna khora thina.”

⁵ Aonu iara ne leghuni unha te chekeni Lord igne ne tei pophoru pohe igne Pera.

⁶ Kmana narane ke leghudi igre, Lord neke cheke eghu ka iara, “Iagho ke figri Pera mala ke tei atha pohe teke cheke nigho iara teke tei pophoru iagho jare ia.”

⁷ Aonu, iara tei Pera ka vido teke pophoru iara pohe igne neke atha fajifla ka khora thina na. Nu kate filo iara na, pohe igne la botohi, eghuteuna iara theome tangomana teke atha teke pipichi na.

⁸ Lord neke cheke eghu ka iara,

⁹ “Iara ginauna na jateula te eni pohe te boto tuana eghu goigoni nodi puhi fahaehaghe naiknodi Jerusalem nei keha naiknodi Juda.

¹⁰ Naikno te diꞌa igre tirodi leghu ghau iara. Mare theome fanomho, nu mare leghuni kolho unha te magnahagheni thedi na. Mare leghudi nei tarai eghu ka nodi god mae bongihehe. Naugna igne, naikno igre ginauna theo nafudi jateula pohe te theo nafugna te theo kaisei naikno te magnahaghei pipichi ka pohe tuana.

¹¹ Ulu lahu na iara neke magnahaghedi fara naiknodi Israel ghe Juda igre te mala loku famaku ka iara jateula pohe te maku ka thinigna naikno na igne neku. Iara neke magnahaghedi mare te mala thofno nogu naikno iara te mala tangomana naiknogna nauthoglu igne te mala cheke fakeli ghau, ghatho tahu ghau nei fafnaknoni teu nanghagu iara na. Nu mare tirodi te leghu ghau iara na.” Igne chekegna Lord.

Naiknore jateula botol waen ra eghu

¹² Lord ne cheke eghu, “Ghema Jeremaea, iagho toutonuni nonomho igne ka naiknore: Lord nodi God mae Israel igne ne cheke eghu, ‘Te keli na, botol te gnafa igre mala kafe fodu ka waen.’ Nu glahu cheke eghu mare ka iagho, ‘Uve, ghehati lasenihi unha te chekeni iagho igne!’

¹³ Te cheke eghu mare na, iagho ginauna na cheke eghu ka mare, ‘Igne unha te chekeni Lord na: Iara ginauna edi naikno gna vido igne mala jateula te koꞌu te salaꞌui ka waen ra eghu mare. Neubane mae king ka vikegna mae King Devet, ba mae pris, ba mae profet, ba ihei te au Jerusalem, mare te gnafa na ginauna na jateula te koꞌu te salaꞌui ra eghu kafe fameomekro.

¹⁴ Eghuteuna iara ginauna goigonidi naikno igre jateula mae ihei te goigoni phei botol igre eghu. Iara ginauna kafe goigonidi hui, idodi kmadi balu thudire. Ka narane igne, iara ginauna theome kokhonidi naikno igre. Thono theo fara. Iara ginauna kafe goigonidi hui.’ ” Igne chekegna Lord.

Profet Jeremaea ne cheke faheta ka naikno te fahaehaghere

¹⁵ Ghotilo fanomho fakeli ka cheke igne, thosei maku nagnafamire, naugna Lord na cheke ka ghotilo.

¹⁶ Ghotilo mala ghatho tahuni Lord, mae ihei te nomi God ghotilo. Uve, ghotilo fafnaknoni Lord, glahu kuru meini mana gromno na mala totokhei ghotilo ghahemire kate tei ghotilo ka thogelero. Ghotilo magnahagheni fara naphae na, nu mana ginauna kuru meini gromno na mala theome filoni ghotilo kaisei glepo.

¹⁷ Nu jame te theome nomhini ghotilo cheke igne na, iara ginauna tei ka vido aheva nate theo kaisei naikno te filo ghau iara na mala tanhi ghami ghotilo. Naugna ghotilo ne fahaehaghe fara. Iara ginauna tanhi nogu fara, eghuteuna kholodi phei tathagu iara igre ginauna oro soru ka tathagu nei foflogu teu iara gre, naugna noda naoka tahatire ginauna mei ulu ghita tahati, eghuteuna mare ginauna atha fajifla ghita ka noda namono igne mala tei au ka keha kantri delei.

¹⁸ Aonu Lord ne cheke eghu ka iara, “Iagho tei cheke eghu ka mae king ghe idogna, ‘Ghopa thosei gnokro ka nomi sape nafnakno re, naugna nomi khepi nafnakno ghopa re la theo nafudihi, eghuteuna ghopa theome tangomana te funei fruni ni kantri igne gognarona.’ ”

¹⁹ Mare la bobothohi grengathadi namono biꞌo ka nohi Negev ke mata Juda, eghuteuna theo kaisei naikno na teke tora na. Naugna mae naokare la mei athahi naiknodi Juda ra mala tei sosolo ka keha kantri delei.

²⁰ Ghotilo naikno te au ka namono biꞌo Jerusalem! Filo ghotilo ia! Gognarona nomi naoka ghotilore la mei funudi ke raru! Ghotilo fahaehaghedi fara namono biꞌo teke tusu ari God ka ghotilo te au ka kantri Juda, mala reireghi fakelidi ghotilo jateula sipu eghu neku. Nu ahevau si namono biꞌo tura?

²¹ Ghotilo neke au nomi gaoghatho nheta te mala loku fodu baludi keha kantri are. Nu unha eghu gaoghathomi ghotilo gognarona kate snakredi Lord naoka re te mei ulu ghami nei funei fruni ghami teu mare igre? Uve, puhi biꞌo fara ginauna mei thoke ghami ghotilo, eghuteuna ghotilo ginauna kabru ghemi fara jateula thau te fakarha sua te kabru ghegna fara ra eghu.

²² Ghotilo na ghusna eghu, “Naugna unha site thoke ghita tahati glepo igrea?” Uve, glepo igre thoke ghami ghotilo, naugna leuleghu fata na ghotilo tapla jafra ka nakhibo. Mae naoka gre jateula te koko nomi pohe ghotilore te ei puhi diꞌa na ka ghotilora eghu.

²³ Ba, mae te pipito na tangomana teke tughu thinigna na teke vegha na? Ba, phusi mata na tangomana teke tughu thinigna te thuthunu na? Thono theo fara. Ghotilo jateula tuana eghu theome tangomana te koko puhimi te diꞌare mala teke eni puhi te keli na.

²⁴ “Iara ginauna na famamhaghu ghami ghotilo mala rikha tafri ghotilo, jateula nuri biꞌo te ghaghafa mei fei namono nagou te flalo tafri chara ra eghu.

²⁵ Igne puhi biꞌo nate kuru meini iara te mala thoke ghami ghotilo na. Papara igne thofno horoghoto fara, naugna ghotilo ne ghatho iho ghau iara ne fatutuanidi god te chaichaghire.

^26-27 Eghume, iara filodihi glepo te diꞌa fateote'o te edi ghotilo ka thogele, ba farihotei glalaba. Iara filo ghami ghotilo te leghudi god te chaichaghi are. Ghotilo jateula gaꞌase vine te tei hiro nalhaꞌu tafri ra eghu, ba jateula hose nalhaꞌugna te ngolho leghuni hose gaꞌase gna na ra eghu. Iara ginauna atha koko nomi pohe ghotilo are mala kakhana mamajami ghotilo are ka tathadi naikno te gnafa ka nauthoglu igne. Kokhoni ghami fara ghotilo naiknomi Jerusalem! Puhi biꞌo fara ginauna thoke ghami ghotilo, naugna puhimi ghotilore ne thofno diꞌa fara. Niha fata theome doglo ka tathagu iara na si ghotilo ia?” Igne chekegna Lord.