Profet Isaia 9 - Buka Blahi Ka Cheke Holo

Kaisei king biꞌo ginauna kegra haghe

¹ Neuba, namono te autagna puhi biꞌo igne, gromno na ginauna theome au fabrahu tagna. Tifa na, Lord neke eni vikegna Sebulun, nei vikegna Naftali teu igre ginauna au mamaja. Eghuteuna nanghagna nodi namono na ginauna thono diꞌa fara. Nu ka narane nate mei ginauna, Lord ginauna fafnaknoni nanghagna namono igne. Mare kiloni namono igne Galili, kmana naikno te theome Jiu na au tagna. Funu ka Thongna biꞌo Mediterenian tei posa ka keha philegna Khoꞌu biꞌo Jordan.

² Naikno teke tei kate romno tifa ra ginau filoni kaisei juta biꞌo. Tifa na ghehati neke au ka vido te romno fara, nu gognarona juta igne phae mei ka ghehati iheire te au ka vido te romno.

³ Lord, iagho fagleꞌa ghami ghehati fara. Uve, ghehati kelitami fara jateula naikno te tei pulei gano ka nagare ra eghu, ba jateula soldia te glealeꞌa te tufa glepo teke hata ka magra ra eghu.

⁴ Uve, ghehati gleale'a fara, naugna iagho neke hata fadeleihi diꞌanagnafa teke eni ranghi ghami nomi naoka ra, eghuteuna iagho lolhopahi khodo teke puri ghami ra. Iagho goigonidi mare jateula iagho teke goigonidi soldiadi Media tifa ra neu.

⁵ Uve, ghehati thofno glealeꞌa fara, naugna nodi buti mala fahaghe mae soldia ka magra balu nodi pohe te fodu ka dadara are, ginauna thofno knoro ka khaꞌaghi jateula naknoro eghu.

⁶ Uve, tahati thofno gleale'a fara, naugna kaisei sua nalhaꞌu ginauna karha mei ka tahati. Lord tusu mei sua igne mala funei fruni ghami. Eghuteuna mare ginauna kiloni mana, Mae keli mala tufa gaoghatho te keli, eghuteuna God mae ihei te rheta fara, nei Kmada mae ihei te togho ghita fabrahu, nei mae biꞌo mala togho ghita mala au ka pharikeli.

⁷ Puhigna mana te mala funei frunidi nogna naiknore ginauna thofno keli fara. Eghuteuna namono aheva te funei fruni mana igne ginauna au ka pharikeli fabrahu. Uve, mana ginauna kaisei king ka vikegna King Devet. Nogna nolaghi nei puhigna teu mana te mala fatedi naiknore ginauna au fabrahu tifa tifa. Lord, iagho au nou nolaghi fateote'o, eghuteuna iagho au nou gaoghatho rheta te mala edi gobigna lepo te magnahaghedi iagho themu re.

Lordginauna paradi naiknodi Israel

⁸ Lord la chekehi nogna cheke te mala paradi naikno te au ke raru Israel.

⁹ Eghuteuna naikno te gnafa Samaria igre ginauna laseni eigna naꞌau papara nate famei Lord igne. Nu mare te gnafa na kafe fahaehaghe nei patu gama eghu fara, neke cheke eghu,

¹⁰ “Neuba mae naoka gre ne mei paꞌe soru nomi suga ghehati teke horo ka brik igre, nu ghehati ginauna nake horo fapulo suga igre ka thina te maku. Eghuteuna neuba mae naoka igre ne mei hata koko gaju teke sutu haghedi nomi suga ghehati igre, nu ghehati ginauna nake tughu ka khegra majaghani te thofno keli fara.”

¹¹ Nu Lord ne diꞌatagna fara ne tusu lao nolaghi ka King Resin mala tangomana mana te magra ka maedi Israel.

¹² Lord neke kuru meini armi gna Siria ke maghati nei armi gna Filistia ke mosu mala mei goigonidi naiknodi Israel. Nu neuba Lord ne paradi, mana theome gnafa te diꞌatagna ka mare na. Eghuteuna mana ginauna tarabana mala paradi naikno igre.

¹³ Nu neuba, naiknodi Israel igre tirodi teke pulo mei ka Lord na. Uve, mare theome leghuni kolho puhigna Lord mae ihei te au nolaghi fateote'o na.

¹⁴ Eghume, Lord ginauna paradi iheire te jateula phaꞌudi nei sekodi teu maedi Israel igre. Uve, kaisei narane mana ginauna rave koko naikno te haghe fara jateula grege gaju biꞌo teu igre, nei naikno te pari lahu jateula buburu ka geri khoꞌu ra teu igre.

¹⁵ Phaꞌudi mae igre na mae biꞌo igre, baludi naikno te fnakno nanghadire. Eghuteuna sekodi mae igre na hatimare mae profet te cheke chaichaghi koba igre.

¹⁶ Mae igre batudi naiknore ka puhi te theome doglo.

¹⁷ Eghume, Lord na theome kelitagna ka nogna naikno majaghani igre, eghuteuna mana theome kokhonidi naikno biꞌo teke lehehi khetodi nei goro sua glehe kokoi, naugna mare te gnafa na kafe tirodini Mana. Mare theome gnafa te eni puhi te diꞌa na. Eghuteuna leuleghu fata na mare cheke chaichaghi koba. Nu neuba Lord ne paradi, mana theome gnafa te diꞌatagna ka mare na. Eghuteuna mana ginauna tarabana mala paradi naikno igre.

¹⁸ Puhi te diꞌa te eni mare igne jateula khaꞌaghi te nhako buburu fachuchurure te ghilei tei khasa ka gaju biꞌo matara eghu. Eghuteuna khujogna khaꞌaghi igne haghe ka maloa na jateula gromno biꞌo te mala nakhete ra eghu.

¹⁹ Diꞌatagna Lord mae ihei te au nolaghi fateote'o igne jateula khaꞌaghi eghu goigonidi namono nei iheire te au ka namono igre. Eghuteuna theo kaisei naikno nate mei te toghodi kheradire.

²⁰ Puhidi mare mala magra nei falehe naikno teu igne ginauna goigonidi gobigna lepore. Neuba, mare theome glealeꞌa kolho. Uve, mare jateula te ghamu fateo ghedi gano kheradire nu theome boho kolho teura eghu.

²¹ Vikegna mae Manase igre ginauna magra ka vikegna mae Efrem, eghuteuna vikegna mae Efrem igre ginauna magra ka vikegna mae Manase igre. Eghuteuna phei vike igre ginauna loku fodu mala magra ka vikegna mae Juda. Nu neuba Lord ne paradi, mana theome gnafa te diꞌatagna ka mare na. Eghuteuna Lord ginauna tarabana mala paradi naikno igre.