Profet Isaia 7 - Buka Blahi Ka Cheke Holo

Nogna chekeLordranghini King Ehas

¹ Ehas thugna King Jotam, eghuteuna Jotam na thugna King Iusaea. Ka narane Ehas te king gna Juda igre, Peka thugna King Remalaea gognarona king gna Israel. Eghuteuna ka narane tuare, King Peka baludi naiknodi Israel igre ne loku fodu balugna King Resin baludi naiknodi Siria mala tei magra Jerusalem, nu mare ne theome uluni namono igne.

² Kate nomhini King Ehas baludi nogna naiknore te loku fodu nodi soldia phei king igre te mala magra Juda na, mare ne mhaghu nodi fara.

³ Lord ne cheke eghu ka iara, “Iagho hata balumu thumu Seajasub mala tei filoni King Ehas. Iagho ginauna filoni mana ka vido aheva te mala titihi pohe ka khoꞌu te soru mei funu ka kholo ke holo ia.

⁴ Iagho cheke eghu ka mana, ‘King Ehas! Iagho thosei nanga nou nei mhaghu eghu! Iagho thosei snakreni gaoghathomu na mala glaꞌe soru. Fanomho mei sagho! Iagho thosei mhaghudi phei mae king tuare. Diꞌatadi phiamare ka iagho tuana jateula gagahudi phei nakrono te namo lehe ra eghu kolho.

⁵ Phei mae king igre baludi nodi armi re la ghaoghathohi te mala mei goigoni ghami ghotilo na.

⁶ “Mare magnahaghei te mei magra ka ghotilo mala hata namono Juda. Eghuteuna mare magnahagheni thugna mae Tabel te mala king jare na.”

⁷ Nu iara Lord cheke eghu ka iagho: “ ‘Nodi gaoghatho te eni phei mae king igre ginauna theo nafugna kolho.

^8-9 Iara cheke eghu, naugna King Resin au nolaghi kolho te mala funei fruni ni Damaskas, nodi namono biꞌo lahu naiknodi Siria. Eghuteuna King Peka au nolaghi kolho te mala funei frunini Samaria, nodi namono biꞌo lahu naiknodi Israel. Ke lamnadi namnosalei glima finogha te mei igre, mae naoka ginauna mei goigonini fara Israel. Fanomho sagho! Jame te theome kegra heta iagho ka nou fatutuani na, iagho ginauna theome tangomana te kegra heta na.’ ” Igne cheke gna Lord.

Fagaglana eigna God te au baluda

¹⁰ Theome raugha ke leghugna igne, iara neke cheke ka Ehas, king gna Juda unha teke chekedi Lord ka iara re.

¹¹ Iara ne cheke eghu, “King Ehas, Lord na noda God tahati, eghuteuna thofno keli fara jame te toreni mana iagho mala falalase ranghi nigho kaisei fagaglana. Mana tangomana te fakakhana kaisei fagaglana ka iagho. Mana tangomana te fakakhana fagaglana te soru mei funugna ka maloa kligna ba haghe funugna ke pari glose.”

¹² Nu mae Ehas tirogna ne cheke eghu, “Theo, iara ginauna theome fariuriuni Lord jateula tuana teuna.”

¹³ Mae Isaia ne cheke eghu, “Ghema Ehas, fanomho fakeli sagho! Ghotilo vikegna mae Devet ra, ghotilo neke eni igne fabrahu, eghuteuna naiknore la ghilei tirodi ghami ghotilo. Ba, ghotilo magnahagheni nogu God iara gne te tiromi ghami la ghotilo na sia?

¹⁴ Tutuani fara, Lord thegna ginauna tusu ranghi nigho kaisei fagaglana. Ghotilo ginauna filoni kaisei kupi na bukla, eghuteuna naꞌa ginauna karha kaisei thugna nalhaꞌu, eghuteuna naꞌa ginauna kiloni mana, Imanuel. Gaoghathogna na God na au baluda.

¹⁵ Kate funu laseni mae sitei igne unha te keli na, nei unha te diꞌa na teuna, mana na ghamu jujurukuli nei milk eghu kolho. Ka narane tuana mana mae sitei ngau kolho.

¹⁶ King Ehas, iagho gognarona mhaghudi phei king te au ka kantri Israel ghe Aram. Nu te chekeni iara ka iagho na, ame laseni nga mae sua nalhaꞌu na puhi te keli na, nei puhi te diꞌa na teuna, phei mae king te mhaghudi iagho igre ginauna kafe lehe.

¹⁷ Naugna te tirouni iagho Lord na, Lord ginauna hata mei kaisei puhi biꞌo te thono diꞌa fara ka tharaknamu nei vikemu teu iagho igre. Puhi biꞌo igne ginauna thono diꞌa fara salaꞌudi narane teke fnota pea Israel ghe Juda tifa ra. Lord ginauna chekeni king mala hata mei armi gna Asiria mala magra ka iagho.”

¹⁸ Ka narane igne, Lord ginauna kiloni armi gna Ijep, eghuteuna mae soldiare ginauna jifla mei ka vido te gnafa ka kantri tuana. Mae igre kmana fara jateula sisimi eghu. Mana ginauna na jaola kiloni armi gna Asiria igne. Mae soldia igre ginauna mei jateula jurukuli eghu mala mei goigonidi nei falehedi eghu naiknore.

¹⁹ Mae naoka igre ginauna mei au ka vido te gnafa igre Israel. Neubane fari hotei thogele, ba ka gluma thina, ba ke lamna buburu, ka vido aheva te ghamu buluka igre, mare na jaola au jare.

²⁰ Ka narane igne, Lord ginauna kilodi maedi Asiria mala mei jateula nuri blahi eghu goigonidi namono te gnafa, nagare te gnafa, nei naikno te gnafa eghu ka kantri Juda. Uve, mare ginauna na loki ghami ghotilo mala ghoighori phaꞌumi, thinimi nei gremohomi teu ghotilo re mala mamaja ghotilo.

²¹ Ka narane igne, theo kaisei naikno nate tangomana te loku ka nagare na. Kaisei mae ginauna tathaji kaisei buluka ikoi, nei phei nanigot eghu kolho.

²² Thilo glepo igre kolho nate hata milk mana tadire. Naugna iheire nate au faleghu teu ka namono igne na, mare ginauna theo ghedi gano. Nu mare ginauna au ghedi kmana milk te mala koꞌu na, nei jurukuli eghu, naugna theome kmana naikno te au ka glose igne na.

²³ Ka narane igne, nagare grep te mala hata sileni biꞌo igre, ginauna buburu fachuchuru nei soro eghu kolho nate kotu haghe tagna na.

²⁴ Uve, buburu te diꞌa kolho igre nate fodu ka vido igne. Eghume mae nalhaꞌure ginauna hata nodi phalohore mala tei hili bosu mala ima.

²⁵ Buburu te diꞌa igre ginauna thafru ka vido te gnafa ka thogele aheva te au nagare teu ghotilo gognaro igre. Ginauna na theo kaisei naikno nate rogna tei ka vido igne. Buluka nei sipu eghu kolho nate au tagna na.