Profet Isaia 57 - Buka Blahi Ka Cheke Holo

¹ Ka narane igne, naikno te doglo te lehe, nu theo kaisei ka naikno te diꞌa te filo glanidi ba nangadi kolho. Uve, Lord ginauna atha fadelei naikno te ghatho tahuni mana igre. Nu theo kaisei naikno kolho te filo glani Lord teke atha fadeleidi naikno igre, mala theo kaisei puhi biꞌo nate thokedi mare.

² Iheire te doglo nakarhadire ginauna au ka pharikeli, nei mala tangomana mare te gnafa fakeli nodi kate lehe na.

Lordginauna fatedi nogna naiknore

³ Lord ne cheke eghu, “Nu ghotilo thudi naikno te diꞌara, nei vikedi iheire te loku ka naitu ra, nei iheire te tolaghi pedo ra, nei gaꞌase vine ra eghu ghotilo mei mala fate ghami iara!

⁴ Ghotilo naikno chaichaghi! Ihei gne te maꞌeni ghotilo na? Ihei gne te mikoni nei fajifla glapini teu ghotilo na? Ghotilo naikno mala tiromidi glepo te keli re! Ghotilo maꞌe, miko nei fajifla glapi eghu ka themi!

⁵ Kate tarai ghotilo ka nomi god te chaichaghi are na, ghotilo tei eni puhi te diꞌa na baludi goro gaꞌase vine ke pari gaju biꞌo. Ghotilo tei ka gluma thina te au ka geri glogu, eghuteuna ghotilo aknu falehe thumire mala fafara ka nomi mumuju god.

⁶ Ghotilo sene thina salhu ka vido igne, aonu ghotilo pogho soru tagna jateula nomi god eghu. Ghotilo tofa waen ka thina igre, mala jateula nomi fafara eghu tadi, eghuteuna ghotilo jaola fafara gano ka thina igre. Ba, ne kelitagu iara te filodi glepo igre neu si ghotilo ia? Thono theo fara!

⁷ Leuleghu fata na ghotilo tei ka thogele holo mala fafara nei eni puhi te diꞌa na eghu ka gaꞌase nodi pris god igre.

⁸ Ghotilo fakegra haghe mumuju god igre lamna suga ka grengathadi nomi sugare. Ghotilo tiromi ghau iara, naugna igne ghotilo gognarona thuru soesole balu gaꞌase vine. Ghotilo magnahaghei gaꞌase fara mala glealeꞌa nomi.

⁹ Leuleghu fata na ghotilo ghiha oel te famane siri keligna ka thinimi re mala tei tarai ka god Molek. Ghotilo kurudi nomi mae glokure mala tei ka keha kantri te khaba delei mala hiro mumuju god mala tarai tadi. Neubane ka Beku mare jaola tei hiro mei tagna.

¹⁰ Ghotilo la ghilei kmusa ka hirogna god igne. Nu neuba, ghotilo thono heta fara te eni puhi igne. Te ghathoni ghotilo na, god igreu nate farheta ghami ghotilo na, naugna igne te theome koko ghotilo puhimi te diꞌa igre.

¹¹ “Ghotilo chaghi ghau iara fabrahu, naugna ghotilo mhaghudi fara god te chaichaghi igre. Naugna igne, ghotilo la ghatho iho ghauhi iara. Ba, ne au kmu fabrahu iara neu ne theome ghatho tahu ghau iara si ghotilo ia?

¹² Puhi te eni ghotilo igne keli fara ka gaoghathomi ghotilo re. Nu iara ginauna fakakhana puhimi ghotilo te diꞌa re, eghuteuna nomi god ghotilo tuare ginauna theome togho ghami ghotilo kolho.

¹³ Ka narane te ehani ghotilo ihei te mala mei togho ghami na, ghotilo snakredi god chaichaghi tuare mala fakarhi ghami. Nu fiofilo ghami eghu! Neubane kaisei nuri ikoi kolho tangomana nate ifu sorudi mare na. Nu iheire te rouronu ghau iara te mala reireghidire, ginauna au fabrahu ka kantri igne, eghuteuna mare ginauna tufru soru ghau iara ka nogu Thogele Blahi iara igne.”

Lordneke nhaꞌa cheke mala toghodi nogna naiknore

¹⁴ Naiknore ginauna nomhini nogna cheke Lord igne, “Ghotilo naiknora! Ghotilo tarabana fakeli nabrou igne mala ke pulo mei nogu naikno iara ra. Ghotilo atha fadelei glepo te fanogradi mare igre mala ke pulo mei mare ka iara.”

¹⁵ Lord mae ihei te haghe nei blahi fara, nei karha fabrahu te tifa te tifa igne, mana ne cheke eghu, “Iara au ka vido te haghe nei blahi, nu iara jaola au baludi naikno te nhaꞌa faparidi thedi nei au diꞌanagnafa fara eidi nakhibodi re teu igre, eghuteuna iara tusu lao ranghidi nakarha majaghani.

¹⁶ Iara ginauna na theome figri tagru ghami, ba diꞌatagu ka ghotilo, naugna jame te eghu fabrahu iara na, ghotilo ginauna na glaꞌe soru. Uve, jame te eghu ghotilo na, ghotilo iheire teke tusu ari iara nakarha na tami ra ginauna lehe.

¹⁷ Tifa na iara neke diꞌatagu ka ghotilo, naugna ghotilo neke tapla jafra ka nakhibo nei ghamu nhoto fara neku. Naugna igne te para ghami nei tei koko ghami teu iara na. Nu neuba, phaꞌumi ghotilore maku fara jateula thina eghu maku fara, eghuteuna ghotilo leghudi kolho puhimi themi te diꞌare.

¹⁸ Iara filodihi puhimi ghotilo te diꞌa tuare, nu neuba, iara ginauna nake fakeli fapulo ghami ghotilo. Iara ginauna na baubatu ghami nei togho ghami eghu ghotilo. Iara ginauna farerheta nagnafami ghotilore, eghuteuna ghotilo iheire te diꞌanagnafa nei tanhi teura ginauna eha nei kilo fnakno ghau iara.

¹⁹ Neuba ghotilo ne tei au kate khaba, ba au kate namo, iara magnahaghei ghami ghotilo te au ka pharikeli. Uve, iara ginauna togho ghami ghotilo mala ke pulo mei.

²⁰ Nu naikno te tirodi ghau iara re jateula thongna te malura eghu theome au kmu. Nu leuleghu fata na, ghoro falonga mata ka gratha na kmana chara nei chopu eghu. Eghume, naikno te diꞌa na jateula tuana eghu.

²¹ Uve, pharikeli na theome au ka nagnafadi nafnata naikno te diꞌa igre.” Igne chekegna Lord nogu God.