Profet Isaia 52 - Buka Blahi Ka Cheke Holo

Lordginauna fakarhini Jerusalem

¹ Dofra haghe ghotilo naiknomi Jerusalem! Farerheta nagnafami are! Ghotilo mala fagae ghami themi ka namono blahi Jerusalem. Naugna naikno bongihehe baludi naikno te theome gae ka tathagna God igre ginauna theome ruma haghe ka namono Jerusalem.

² Ghotilo naiknomi Jerusalem te loku jateula naikno sneka teura, kegra haghe mala ghiha koko gnagnapa te au ka thinimi are. Atha koko chen ka grarami are mala snagla.

³ Tutuani fara, igne unha te chekeni Lord na, “Kani teke atha ghami mae naokare teke tei loku jateula mae sneka tekura, mare neke theome foli ka sileni kolho. Eghume kate atha fajifla ghami iara na, iara ginauna na theome foli fajifla ghami ka sileni.

⁴ Tifa na ghotilo nogu naikno iara igre neke tei au Ijep ka nomi gaoghatho themi. Nu ke leghu na mae Asiria atha ghami ghotilo neke tei mala loku jateula naikno sneka neku, eghuteuna mare neke para ghami fara ghotilo.

⁵ Eghume unha nate eni iara gognarona? Mare neke atha ghami ghotilo mala loku jateula nodi naikno sneka neku, eghuteuna mare neke theome foli fajifla ghami ghotilo. Mae iheire teke funei fruni ghami ghotilo ra mare neke cheke fahaehaghe fabrahu, eghuteuna leuleghu fata na mare neke cheke fapari ghau iara.

⁶ Nu ghotilo ginauna lase ghau iara Lord, iara na chekeni unha nate thoke mei ginauna. Uve, iara ngala God na.”

⁷ Thofno keli fara te filoni kaisei mae te chari te mei ka thogele ro, mana atha mei famane nonomho te keli eigna pharikeli. Mana toutonu eigna God ginauna fakarhi ghita. Mana ginauna mei Saion mala cheke eghu ka tahati, “Nomi God ghotilo na king!”

⁸ Ka narane tuana, mae iheire te doadofra gna namono biꞌo igne ginauna gleale'a fara balu eha fabiꞌo. Naugna mare ginauna filoni Lord nake pulo mei Saion.

⁹ Neubane diꞌa fara nomi namono biꞌo ghotilo Jerusalem gne gognarona, ghotilo gleale'a balu eha fabiꞌo, naugna Lord ginauna fameomego ghami, fakarha ghami nei ke eni fakeli namono biꞌo Jerusalem!

¹⁰ Lord ginauna fakakhana nogna nolaghi te blahi na. Eghuteuna naikno te gnafa ka nauthoglu igne ginauna filoni mana te fakarhidi nogna naiknore.

¹¹ Jifla mei ka namono Babilonia! Jifla mei ka namono te diꞌa tuana! Thosei haboni kaisei glepo te thona ka tathagna God. Ghotilo mae te atha te mei glepo te blahi ka sugagna Lord ra, ghotilo mala jifla mei ka namono tuana, eghuteuna ghotilo mala gae ka tathagna God.

¹² Nu ghotilo ginauna na theome faghosei jifla Babilonia, jateula te rikha ra teuna. Naugna Lord nomi God ghotilo maemi Israel ra ginauna batu ghami ghotilo, eghuteuna mana ginauna au ke leghumi ghotilo mala reireghi ghami ghotilo.

Nogna mae glokuLordna au papara fara

¹³ Lord ne cheke eghu, “Unha nate edi nogu mae gloku iara igne ginauna ari thofno horoghoto fara. Naiknore ginauna ghatho tahuni nei pala hagheni eghu nanghagna mana na kligna.

¹⁴ Tifa na naiknore neke fakokhoanani mana, eghuteuna tathagna nei foflogna teure neke thofno diꞌa fara neke theome jateula naikno neku filogna na. Eghuteuna naiknore neke jaglo nodi fara kate filoni mana na.

¹⁵ Nu gognarona naiknodi ka kantri te gnafa igre ginauna jaglo nodi fara ka mana, eghuteuna hatimare mae king ginauna iho cheke ke ulugna mana. Naugna mare neke theome nomhini eigna mae igne, eghuteuna mare ginauna nomhi fakelidi unha glepo teke theome nomhidi mare tifare.”