Profet Isaia 4 - Buka Blahi Ka Cheke Holo

¹ Ka narane tuana, fitu gaꞌase magnahaghei te tolaghi ka kaisei mae nalhaꞌu kolho, eghume goro gaꞌase igre ginauna cheke eghu, “Ghehati tangomana te hiro ghemi gano nei pohe eghu themi. Nu ghehati thono mamaja nomi fara, naugna ghehati gne theo khetomi. Eghume ghehati magnahaghei te tolaghi nomi ka iagho.”

² Kate thoke mei narane tuana, nogna grege gaju Lord na ginauna kotu seke majaghani, eghuteuna nanghagna Lord na ginauna fnakno. Naiknodi Israel te au faleghu teu igre ginauna thofno keli tadi fara, naugna Lord ginauna fablahini glose igne mala vuragha kmana gano.

³ Naikno te karha teu Jerusalem igre Lord neke kilodi nogna naiknore, naikno blahi. Eghuteuna mana riorisohi nanghadire ka nogna buka na.

⁴ Lord ginauna fatedi goro gaꞌasedi Jerusalem nei paradi eghu rehati eidi puhi te diꞌa teke edi rehati re. Eghuteuna mana ginauna tihi fagaedi mala klino reꞌe, jateula te koko lao chara ka khaꞌaghi ra eghu.

⁵ Ka narane igne, Lord ginauna kuruni kaisei khoveo mala mei jateula gagahu eghu toku tafruni Thogele Saion baludi naikno te salofodu te tarai teu jare, eghuteuna bongiro na mana ginauna kuru mei khaꞌaghi. Mana ginauna toku soru ke klignadi nogna nolaghi na jateula kaisei suga tapuale eghu.

⁶ Nogna nolaghi biꞌo mana igne ginauna eni namono igne mala kaisei namono keli mala poru. Eghuteuna neubane naprai biꞌo, ba ne nakhete biꞌo, ba ne saeklon, glepo igre ginauna theome tangomana te mei goigonidi naiknore.