Profet Isaia 3 - Buka Blahi Ka Cheke Holo

God ginauna paradi naiknodi Jerusalem nei Juda

¹ Fanomho mei, ghotilo naiknomi Jerusalem nei Juda! Lord mae ihei te au nolaghi fateote'o igne, ginauna atha fadelei gano nei khoꞌu eghu te magnahaghedi fara ghotilo ka nakarhami are.

^2-3 Mana ginauna jaola hata fadelei mae funeidi armi baludi mae te graju ka magra nei hatimare mae soldia, goro mae biꞌo ka gavman, mae mala fate, mae profet nei mae mala batuni king ka gaoghatho te keli, hatimare mae kastom baludi mae glalase, nei mae iheire te lase edi glepo te keli.

⁴ Lord neke cheke eghu, “Iara ginauna vahidi goro mae nalhaꞌu majaghani ra mala nomi mae funei ghotilo naiknomi Jerusalem nei Juda. Eghuteuna goro mae sitei gre ginauna funei frunini kantri igne leghuni unha te magnahagheni thedi na.”

⁵ Naiknore ginauna fari pholai fari thedi. Naiknore ginauna theome keli ranghidi kheradi fofodure, eghuteuna mae nalhaꞌu majaghani nei gaꞌase majaghani teu igre ginauna theome ghatho tahudi naikno biꞌo nei mae biꞌo teure. Eghuteuna naiknore ginauna maꞌedi kolho nomi mae funei ghotilore.

⁶ Ka narane igne, keha mae ka ghotilo ginauna vahidi vikedi thedire mala mae baubatu, mare na cheke eghu ka mana, “Nakarhada tahati gognarogna thono diꞌa fara, nu nou pohe iagho igne roi keliu. Eghume iagho ginauna na funei fruni ghita tahati!”

⁷ Nu mana ginauna kegra haghe cheke eghu, “Iara theome tangomana te togho ghami ghotilo na, naugna iara theo nogu pohe ba gano ka nogu suga na! Eghume faꞌunha eghu iara fadoglini nomi puhi biꞌo ghotilo igne? Theome keli ghotilo te vahi ghau iara te mala nomi mae mala baubatu ghotilo na.”

⁸ Puhi igne ginauna thoke mei tutuani ka naiknodi Jerusalem nei Juda, naugna nodi cheke nei nodi gloku teure faparini nei goigonini eghu Nanghagna Lord mae ihei te haghe fara. Mare edi koba puhi te diꞌa igre jateula naikno te thaviru tela ukahi pari ra eghu ka tathagna mana na.

⁹ Naikno igre theome jafra ka naiknodi Sodom tifa ra. Mare theome mamaja te eni puhi te diꞌa na ka tathadi keha naiknore. Kokhonidi fara naikno igre, naugna mare ei puhi biꞌo ranghidi thedi.

¹⁰ Ghotilo cheke ka iheire te leghuni puhi te doglo na, eigna Lord ginauna fablahidi mare, naugna mare ne edi glepo te kelire.

¹¹ Nu kokhonidi fara iheire te leghuni puhi te diꞌa na! Lord ginauna tughu fapulo ka mare glepo te diꞌa fateote'o teke edi mare ra.

¹² Lord neke cheke eghu, “Gognarona goro gaꞌase kolho nate funei fruni ghami ghotilo na, nei goro sua gre goigoni ghami ghotilo nogu naikno iara gre. Eghuteuna nomi mae mala baubatu ghotilore ginauna batu ghami ghotilo mala leghuni ghotilo puhi te theome doglo na.”

¹³ Lord gognarona tarabana mala fatedi iheire te edi glepo te theome doglore!

¹⁴ Eghuteuna gognarona Lord funu fatedi goro mae biꞌo nei mae mala baubatu ghita tahati nogna naikno manare. Eghuteuna mana ne cheke eghu ka mare, “Ghotilo mae igre goigonidi koba nogu naikno iara igre ka puhi te fafofodu nomi sugare ka glepo teke blau ka naikno te kuma re. Puhi igne ghotilo jateula te goigonini nogu nagare grep iara na eghu.

¹⁵ Theome doglo te goigonidi ghotilo nogu naikno iara igre, eghuteuna puhi te eni ghotilo igne, jateula te tapla ka phaꞌudi naikno te kuma ra eghu thofno diꞌa fara.” Igne nogna cheke Lord mae ihei te au nolaghi fateote'o.

Cheke ranghidi goro gaꞌasedi Jerusalem

¹⁶ Lord neke cheke eghu, “Gaꞌasedi Jerusalem igre thofno faghaja fara! Kate nolo tafri na, rehati filo haghe kligna balu sepe-sepe thinidire, eghuteuna kaflo gehe ka mae nalhaꞌure. Eghuteuna rehati solt sesele ka ghahedire mala taitanhi kate nolo tafri rehati re, mala filo lao mae nalhaꞌu tadi.

¹⁷ Naugna igne, iara ginauna paradi reꞌe, eghuteuna iara ginauna lisei lao thubu ka phaꞌudire, eghuteuna iara ginauna snakredi hatimare mae naoka mala koko nodi pohere, mala filo nodi naiknore kate soesole rehati na.”

^18-23 Ka narane igne, Lord ginauna atha koko nodi famane glalaoni gaꞌasedi Jerusalem. Eghuteuna mana ginauna atha koko glalaoni ka phaꞌu, ka khuli, ka nehu, ka grara, ka khame, ka geghesu nei ka ghahe teu te faghajadi fara reꞌe igre. Eghuteuna mana ginauna jaola hata koko famane pohe mala piha phaꞌu nei pohe mala piha tafru tathadi nei foflodi, nei nhugha, nei gloi, nei kastom meresin, nei botol oel ikoi te siri kelidi fara igre.

²⁴ Rehati ginauna na theome siri kelidi, nu rehati ginauna thono siri diꞌadi fara. Rehati ginauna na theome hugha ka famane nhugha te keli, nu hatimare mae naoka ginauna harudi reꞌe ka gnarho jateula naikno sneka eghu. Khakladire ginauna theome keli filodire, mae naoka ginauna ghoighori fagae phaꞌudire ka bledi. Rehati ginauna theome pipichi ka famane pohe te keli, nu reꞌe ginauna pipichi kolho ka pohe te thona. Rehati ginauna theome keli filodire jateula gognarogne eghu, naugna hatimare mae naoka ginauna goigoni thinidire jateula thinidi naikno sneka eghu.

²⁵ Ka narane igne, hatimare mae naoka ginauna falehedi mae soldiadi Jerusalem ka magra.

²⁶ Aonu naikno te gnafa ka nomi namono te theome lehe nga teura ginauna diꞌanagnafa nei tanhi eghu, naugna namono igne ginauna na jateula kaisei gaꞌase te mei naikno te hata fateo nogna gobigna lepora eghu.