Profet Emos 9 - Buka Blahi Ka Cheke Holo

Lordna au nolaghi te mala paradi naiknodi Israel

¹ Iara neke filoni kaisei mifi teke fakakhana Lord ka iara. Ka mifi igne, iara ne filoni mana te kegra teu rhegna olta ka Sugablahi na, eghuteuna mana ne cheke eghu faheta, “Tututu sagho ke klignadi phei khegra biꞌo ke ulugna Sugablahi na are, mala nghali Sugablahi igne. Koko sukha phei khegra igre mala soru ke klignadi naikno te au teu igre. Eghuteuna iheire te theome lehe ka narane igne, mare ginauna lehe kate tei ka magra na. Ginauna theo kaisei ka mare nate rikha agne na, ba nate tei poru na. Uve, mare te gnafa na mala lehe.

² Neuba mare ne fariuriu tei pari mala poru ke lamna beku neu, iara tangomana te tei teke hata haghedi kligna re. Eghuteuna neuba mare ne fariuriu rikha ne haghe ka maloa kligna, iara ginauna tangomana teke hata sukhadi pari re.

³ Neuba mare ne haghe poru tafri ke kligna Thogele Kamel, iara ginauna tei hirodi mala ke hata fapulodi. Eghuteuna neuba mare ne jufu pari ne tei poru pari ka khotogna nhorora gno, iara ginauna cheke faheta ka mogo biꞌo te au ka khotogna nhorora na mala ghamudi mare.

⁴ Neuba mae naokare ne hatadi mare ne tei ka namono te khaba fara mala nodi naikno sneka neu, iara ginauna cheke faheta ka mae naoka igre mala aknu falehedi jare. “Iara theome tangomana te toghodi re, iara na goigoni fahuidi gnafa.”

⁵ Lord God, mae ihei te au nolaghi fateote'o, mana tangomana te habo kolho ka nauthoglu nei glose teu igre mala nghali, eghuteuna naikno te gnafa re ginauna diꞌanagnafa nei tanhi eghu. Ginauna na jateula kaisei nakheu eghu na nghali tongana namono te gnafa ka kantri igne, eghuteuna glose igne ginauna haghe nei soru eghu jateula Khoꞌu biꞌo Nael te britha biꞌo ra eghu.

⁶ Lord eni nogna namono na kligna tei thoke ka maloa ro, eghuteuna eni kaisei vatara biꞌo ke kligna gna nauthoglu igne. Mana au nolaghi te mala eni khoꞌu na te mala haghe kligna ka maloa na, eghuteuna ke soru mei pari ka nauthoglu igne jateula khoꞌu eghu ke kligna glose te moja na. Uve, nanghagna mana na, Lord!

⁷ Lord ne ghusna eghu ka naiknodi Israel, “Ne ghatho tahu ghami kolho iara uludi naiknodi Kus eghu jau si ghotilo gaoghathomi na? Theo! Tutuani, kani au teku ghotilo ka kantri Ijep, iara neke hata fajifla ghami ka namono tuana. Nu filo si ghotilo! Naiknodi Filistia ra iara neke hata fajifladi Krit. Eghuteuna naiknodi Siria ra, iara neke hata fajifladi Kira.

⁸ Naiknodi Israel! Iara Lord God, iara filodi puhimi ghotilo te diꞌa re. Eghume, iara ginauna goigoni ghami ghotilo iheire te tapla jafra fabrahu ka nakhibo ra, eghuteuna roꞌe ghami ghotilo ka nauthoglu igne. Nu iara ginauna theome thofno fagnafa ghami ghotilo iheire te karha mei ka vikegna kuꞌemi ghotilo Jekop ia.” Igne nogna cheke Lord.

⁹ Lord neke cheke eghu, “Iara ginauna cheke faheta ka nomi naoka ghotilo are mala paradi naiknodi Israel, jateula mae ihei te tofa nusu te mala tei salaꞌu ka strena te mala thofa soru pari ra eghu, ginauna na theo kaisei ka naikno te diꞌa igre nate theome thokeni papara na.

¹⁰ Ghotilo nogu naikno iara te tapla jafra fabrahu ka nakhibo ra, iara ginauna cheke ka nagnafadi mae naoka re mala kafe aknu falehe ghami mare ka magra. Neuba ghotilo ne cheke eghu, ‘Theo kaisei glepo te diꞌa nate thoke ghita tahati na.’ ”

Lordginauna nake eni Israel mala ke keli fapulo

¹¹ Lord ne cheke eghu, “Ginauna nake thoke mei narane na teke toghoni iara Israel mala teke rheta fapulo na. Naiknodi Israel igre jateula kaisei suga tela grofohi ra eghu, nu iara ginauna nake babana fapulo mala ke keli jateula teke ka narane teke king mae Devet tifa ia eghu.

¹² Eghuteuna jaola ka narane tuana, naiknodi Israel igre ginauna nake uluni kantri Idom mala ke hata fapulo baludi keha kantri teke khotodi mare tifa ka nanghagu iara ra, ginauna nake nogu naikno iara.” Igne nogna cheke Lord, mae ihei nate edi te thoke mei glepo igre.

¹³ Lord neke cheke eghui, “Kaisei narane, glose igne ginauna nake keli, eghuteuna gano re ginauna kmana fara ke lamna nagare, eghuteuna naiknore ginauna theome naba nate hata fahuidi re. Jaola ka narane tuana, sisidi gaju grep re ginauna kmana fara, eghuteuna mae nalhaꞌure ginauna theome naba nate ei waen tagna na. Eghuteuna mare tangomana te ei kmana waen fara te jateula kholodi sisi igre te thofa soru ka geri thogele na te pila glose naia eghu.” Igne nogna cheke Lord.

¹⁴ Lord ne cheke eghu, “Ka narane tuana, iara ginauna nake hata fapulo naiknodi Israel ka nodi thofno namono re. Mare ginauna nake babana fapulo mala ke au ka nodi namono teke goigoni mae naoka ra. Mare ginauna nake joꞌu nagare gaju grep, mala ei waen tagna mala koꞌu. Mare ginauna nake loku ka nagare, eghuteuna ghamu gano teke joꞌu thedi re.

¹⁵ Na jateula tuana eghu iara ginauna nake lisei fapulo nogu naiknore ka kantri teke tusu lao iara ka mare tifa ra, jateula mae te joꞌu gano ka nogna thobi naia eghu, eghuteuna ginauna na theo kaisei naikno nate tangomana ni na teke hata fadelei naiknore ka namono igne.” Igne nogna cheke Lord, nomi God ghotilo.