Profet Emos 3 - Buka Blahi Ka Cheke Holo

¹ Eghume, ghotilo maemi Israel ra, Lord neke hata fajifla kuꞌemi ghotilo Ijep tifa ra. Ghotilo fanomho mei ka nogna cheke mana eidi puhimi ghotilo te diꞌa igre.

² Lord ne cheke eghu, “Kmana vike fara ka nauthoglu igne, nu iara neke vahi ghami ghotilo kolho mala nogu naikno iara. Eghuteuna iara tangomana te reireghi fakeli ghami ghotilo na. Nu kate filoni iara te theome keli ghotilo ranghi ghau iara na, iara ginauna para ghami ghotilo eidi nakhibo te edi ghotilo ra.”

Nogna gloku mae profet

³ Faꞌunha eghu jame te tei fodu phei mae, nu theome kulu roghe phia mare teuna?

⁴ Lion te au teu mata na ginauna eha fabiꞌo kate hata ghegna gano na. Jame kaisei lion majaghani au lamna khora thina, ba, naꞌa na eha kate rofo na? Uve!

⁵ Jame kaisei phighoro theo kaisei vido gano te mala chaghini khokorako na, na faꞌunha eghu ruma lamna khokorako na? Na faꞌunha eghu prasa phighoro na jame te theome ruma kaisei nanghaji tagna na?

⁶ Jame te kufli kate posa mei magra ka namono na, ba, naiknore na theome mhaghu? Jame kaisei namono thoke mei tagna kaisei hoholo biꞌo, unha eghu te ghathoni ghotilo na? Lord neke theome kuru meini hoholo igne? Uve, cheke igre thofno tutuani fara!

⁷ Tutuani fara, ame eni nga Lord unha te magnahagheni na teuna, mana ginauna kulu cheke ka nogna mae profet.

⁸ Kate eha fabiꞌo lion na, mae te nomhini igne ginauna mhaghu nogna fara. Eghuteuna kate cheke fabiꞌo Lord na, mae te nomhi chekegna mana igne ginauna cheke fajiflani chekegna mana na.

Mae Emos ne cheke ranghini namono biꞌo Samaria

⁹ Ghotilo ehadi mae biꞌo te au ka nodi suga biꞌo ka namono Asdod, nei Ijep. Cheke eghu ka mare, “Ghotilo kafe tei khapru ka thogele Samaria mala filodi nafnata puhi te diꞌa te edi naiknodi namono tuare.”

¹⁰ Uve, Lord na ne cheke eghu, “Ghotilo naiknomi Samaria ra, ghotilo dedei fara ka glepo teke blau, nei ka magra teura. Eghume, te chekeni iara na, ghotilo theome laseni puhi te doglo na. Thono theo fara.

¹¹ Naugna igne, kaisei thara ginauna ruma mei ke lamnagna namono igne. Mare ginauna mei goigoni baradi namono biꞌo te rheta igre mala ruma hata glepo te keli te au ke lamnadi suga tuare.”

¹² Lord jaola ne cheke eghu, “Jame kaisei lion ghamu kaisei sipu, eghuteuna mae te reireghigna sipu igne ginauna fariuriu mala ke hata fapulo. Mana ginauna filodi kolho keha vido guli nei phei nhubra ghahe eghu kolho. God ginauna jaola eni nafnata puhi igne ka naikno te au Samaria, kaisei namono biꞌo ka kantri Israel. Naikno teke au gleale'a igre ginauna au diꞌanagnafa. Eghume ginauna na jateula igne eghu theome kmana kolho nate karha na agne Israel.”

¹³ God mae ihei te au nolaghi fateote'o igne ne cheke eghu, “Ghotilo te gnafa na, ghotilo fanomho fakeli ka nogu cheke iara igre. Ghotilo mala cheke faheta nei kulu fanomhidi eghu vikegna mae ku'eda Jekop.

¹⁴ Ka narane igne, iara ginauna paradi mae Israel eidi nakhibo teke edi mare ra. Iara ginauna jaola roꞌe fahui olta te au ka namono Betel. Eghuteuna iara ginauna lolhopa koko soru pari fati glepo te au ka fati khukrudi olta are. Uve, iara ginauna goigonidi gnafa vido mala poru ghotilo are.

¹⁵ Iara ginauna paꞌe soru nodi famane suga teke babana mae te dedei maladi nhigra te reka, nei nodi famane suga te mala fajeujemnu ka narane te prai, nei suga biꞌo te lalaoni ka khe'i elefant teu igre mala vuhai chara kolho.” Igne chekegna Lord.