Profet Emos 2 - Buka Blahi Ka Cheke Holo

God ginauna fatedi naiknogna kantri Moab

¹ Lord ne cheke eghu, “Kmana fata naiknogna kantri Moab tapla jafra ka nakhibo. Mare theome gnafa katha vido ikoi ka puhi igne. Thono theo fara. Mare theome ghatho tahuni king gna Idom. Aonu mare hata fajifla nhubragnare ka bekugna na ne gnubra ka khaꞌaghi ne ghilei vuhai nakrofu. Eghume, iara ginauna roꞌeni kantri Moab.

² Iara ginauna koko soru khaꞌaghi ka kantri Moab mala nhako fahui suga te rheta ka namono biꞌo Keriot. Eghuteuna kaisei magra biꞌo ginauna posa mei. Hatimare mae soldia ginauna eha nei kufli eghu. Ka narane igne hatimare mae Moab ginauna lehe.

³ Iara ginauna faleheni king gna Moab balugna nogna tothoghei funei na.” Igne chekegna Lord.

God ginauna fatedi naiknogna kantri Juda

⁴ Lord ne cheke eghu, “Kmana fata naiknogna kantri Juda tapla jafra ka nakhibo. Mare theome gnafa katha vido ikoi ka puhi igne. Thono theo fara. Mare tirodi fanomho ka nogu cheke iara na, eghuteuna mare jaola huhughuni nogu vetula iara na. Naikno igre thofno fagoigoli fara la theome leghu ghau iara. Mare leghuni mumuju god jateula teke edi mae kuꞌedi tifa ra eghu. Eghume, te chekeni iara na, iara ginauna roꞌeni Juda.

⁵ Iara ginauna koko soru khaꞌaghi ka kantri Juda mala nhako suga te rheta ka namono biꞌo Jerusalem.” Igne chekegna Lord.

God ginauna fatedi naiknogna kantri Israel

⁶ Lord ne cheke eghu, “Kmana fata naiknogna kantri Israel tapla jafra ka nakhibo. Mare theome gnafa katha vido ikoi ka puhi igne. Thono theo fara. Eghume, iara ginauna thofno paradi naikno igre. Naugna mare ne sabiri naikno te theome tangomana teke tughu fapulo nodi kaonire mala jateula naikno sneka eghu. Eghuteuna mare jaola theome kokhonidi naikno te kumare. Naugna naikno te kuma igre ne theome tangomana teke tughu fapulo sileni teke foli sadol na.

⁷ Mare tapla faparidi nei theome toghodi neu iheire te nigra ba iheire te kuma. Jaola mae kmagna ghe mae thugnare kafe tapla jafra ka kaisei gaꞌase kolho. Puhi igre thofno diꞌa fara, nei famamajani eghu nanghagu iara te blahi na.

⁸ Ka nodi narane biꞌo te khapru te mala tarai na, mare kifra thuru rhegna olta na ka pohe teke hata ka naikno te kumare. Eghuteuna ghotilo hata tathaji malami themi pohe teke kaoni ka naikno te kumare, mala thuru ka pohe tuana rhegna olta na. Eghuteuna ghotilo hata sileni teke faen naikno te kuma re igne mala foli waen mala koꞌu ghilei thaviru ka sugagna nomi god na.

⁹ “Ghotilo nogu naikno iara ra, iara neke togho ghami ghotilo neke falehedi vikegna mae Amo. Vikegna mae Amo igne brahu nei rheta eghu jateula gaju sida ba gaju ok eghu, nu iara neke kafe falehedi gnafa.

¹⁰ Iara neke hata fajifla ghami ghotilo Ijep. Eghuteuna batu ghami ke lamna namono nagou nabagna phiatutu finogha. Eghuteuna tufa ka ghotilo nodi vido glose vikegna mae Amo.”

¹¹ Lord ne cheke eghu, “Iara neke vavahi keha mae majaghani ka ghotilo mala mae profet nei keha mala nogu mae gloku iara, iara kilodi mae igre, Nasaraet. Ba? Ghotilo maemi Israel ra, glepo te chekedi iara igre tutuani ba theo? Uve, te ghathoni iara na igne thofno tutuani fara.

¹² Nu neubane tabu te koꞌu waen na, ghotilo ne huhurudi mae Nasaraet igre ne koꞌu waen mare. Uve, ghotilo jaola theome snakredi nogu mae profet iara igre mala toutonuni chekegu iara na.

¹³ “Eghume, iara ginauna tusu ari kaisei papara biꞌo ka ghotilo. Papara igne ginauna tahu fara jateula thoklo te fodu ka gano te theome feo ra eghu.

¹⁴ Ka narane igne, mae te lase chari ra, ginauna theome tangomana te rikha na. Mae te nhetara ginauna nigra theome tangomana te fakarhidi thedi na.

¹⁵ Mae soldia te lase magra ka phaloho nei jata teura ginauna theome tangomana te kegra heta ka magra na. Mae te lase chari ra ginauna theome tangomana te rikha na. Eghuteuna mae te lase magra ka hose ra ginauna jaola theome tangomana te rikha na. Theo. Mae naokare ginauna faleheni mana.

¹⁶ Ka narane igne, mae soldia te theome mhaghu nei frane teura ginauna lisa faleghu nodi glepo mala magrare na rikha kolho.” Igne chekegna Lord.