Profet Daniel 8 - Buka Blahi Ka Cheke Holo

Ka mifi igne mae Daniel ne filoni kaisei sipu nei kaisei nanigot

¹ Ka fatilo finogha te funei fruni King Belsasa igne, iara ne filoni fapea mifi na.

² Ka mifi igne, iara kegra neu ke lamna bara ka namono biꞌo Susa ka provins Elam, eghuteuna iara kegra neu rhegna khoꞌu Ulai.

³ Ka geri khoꞌu igne, iara ne filoni kaisei sipu nalhaꞌugna te au phei hona brahu. Nu hona te kegra haghe ke leghu na brahu fara tei salaꞌuni keha na.

⁴ Sipu nalhaꞌugna igne tei ne magra ke mosu, ke raru, nei ke mata. Theo kaisei glepo te tangomana te kegra fothini, ba te rikhani na, naugna naꞌa thono heta fara. Mana eni kolho unha te magnahagheni thegna na.

⁵ Kate ghathoni teu iara igne, iara ne filo teini kaisei nanigot nalhaꞌugna ne jifla mei funugna ke mosu. Nanigot igne chari ne mei, nu ghahegna na theome tangomana te tapla togha pari ka glose na. Naꞌa au kaisei hona biꞌo kolho te kegra fari hoteidi phei tathagnare.

⁶ Nanigot igne ne diꞌatagna fara ka sipu te au phei honagna igne ne chari doglo ne mei mala koko soruni pari ka glose na.

⁷ Eghuteuna iara ne filoni nanigot igne ne thono diꞌatagna fara ne tei magrini sipu nalhaꞌugna igne ne klopa phei honagna re. Sipu igne theo kaisei nogna nolaghi te mala magra te mala tapla faparini nanigot igne. Aonu nanigot igne ne koko soruni sipu igne pari ne tapla ke kligna gna. Theo kaisei mae te tangomana te toghoni sipu igne na.

⁸ Aonu nanigot igne ne faheaheta fara. Nu kate biꞌo te biꞌo puhi faheaheta na, hona biꞌo igne ne klopa. Keha fati hona majaghani neke kegra haghe ka vido teke augna na. Fati hona igre ne filo tei ka soasopaigna vido, kaisei ke raru, kaisei ke mata, kaisei ke maghati nei kaisei ke mosu.

⁹ Kaisei ka mare neke kegra haghe keha hona ikoi na. Nu nogna nolaghi hona majaghani igne rheta fara ke klignadi naikno te gnafa te au ke mata nei ke maghati, nei ka famane namono Israel.

¹⁰ Hona ikoi tuana thono nheta fara, eghuteuna mana ne magra ka armigna kligna na. Nathunu ba ka maloa klignare mana ne koko sorudi kolho pari ka nauthoglu igne ne tapla kolho ke klignadi.

¹¹ Hona ikoi igne ne fafnaknoni thegna, eghuteuna mana ne cheke faparini God mae ihei te funei ka armi gna kligna na. Mana jaola lhotidi naiknore te fafara leghu narane ka God na. Eghuteuna mana goigonini nogna Sugablahi mana na.

¹² Puhi te diꞌa te eni hona igne mana neke hata kasa nodi fafara naiknore, eghuteuna mana neke koko cheke te tutuani na, mala theo nafugna kolho. Eghuteuna mana neke gleale'a ka gobigna lepo te edi leghuni gaoghathogna thegna na.

¹³ Iara ne nomhini kaisei engel ne ghusna eghu ka keha engel na, “Niha nau gnafadire gobigna lepo te fakakhana God ka mifi na igre? Niha nau gnafadire puhi te diꞌa te tughu fabrahu nodi fafara nogna naikno God igre? Niha fata tapla fabrahu ke klignadi nogna naikno God igre balugna Sugablahi igne si hona ikoi ignea?”

¹⁴ Eghuteuna iara nomhini keha engel na ne cheke eghu, “Glepo te diꞌa igre na au nabagna kaisei thogha kaisei gobi glimafulu narane. Ka narane igre nogna naikno God re ginauna na theome fafara hamerane nei grafi jateula teke tifa ra teuna. Eghuteuna ke leghudi narane igre, mare ginauna nake eni nogna Sugablahi God igne mala blahi fara.”

Engel Gabriel ne rurutha gaoghathogna mifi igne

¹⁵ Iara magnahaghei te laseni gaoghathogna mifi igne, aonu kaisei engel megei nga ne mei kegra neu ke ulugu iara.

¹⁶ Aonu iara ne nomhini kaisei mae ne eha ka keha phile Khoꞌu Ulae, mana ne eha eghu mei, “Gabriel, chekeni sagho gaoghathogna mifi igne.”

¹⁷ Aonu, mae Gabriel ne mei kegra rhegu iara. Kate filoni mana na, iara ne khoko soru pari, naugna iara ne mhaghu nogu fara. Mana ne cheke eghu ka iara, “Iagho maemu ka nauthoglu igne. Iagho mala laseni gaoghathogna mifi igne. Mifi te filoni iagho igne thotoghale eigna narane leghu lahu na.”

¹⁸ Kate cheke teu mana ka iara na, iara ne iho phaꞌugu na ne thuru pari ka vido tuana ne thuru iho fara. Nu mana loku ka iara ne korho haghe ghau iara.

¹⁹ Eghuteuna mana ne cheke eghu ka iara, “Iara ginauna falalase ka iagho unha nate thoke mei ginauna, naugna God na diꞌatagna fara. Mifi te filoni iagho igne thotoghale eidi gobigna lepo fateote'o igre ginauna hui ka narane leghu lahu na. Gobigna lepo igre ginauna thoke mei jateula teke filodi iagho ka mifi na igne eghu.

²⁰ Uve, sipu nalhaꞌugna te filoni iagho te au phei honagna igne, tuana eidi phei king di Media ghe Pesia.

²¹ Eghuteuna nanigot nalhaꞌugna te filoni iagho igne, tuana eigna kantri Gris nate funei fruni ke leghu na. Eghuteuna hona biꞌo te kegra farihoteidi phei tathagnare igne, tuana king biꞌo ululahu gna Gris.

²² Eghuteuna fati hona te kegra tughuni hona ululahu te klopa igne, tuana eigna kantri Gris igne ginauna fnota ka fati vido. Eghuteuna fati king igre ginauna funei fruni ka fati vido ke lamnagna kantri igne, nu mae igre ginauna na theome rheta jateula mae king teke kulu funei ke uludi mae igre eghu.

²³ “Kate namo gnafa nodi narane te mala funei fruni na, fati king igre ginauna thofno diꞌa fara. Kaisei king majaghani nate funei fruni ka narane tuana ginauna thono patugama fara. Mana theome kokhoni ni ihei, eghuteuna mana lase chaghidi naiknore ka puhi te diꞌa.

²⁴ King igne ginauna kaisei mae rheta fara, nu theome rheta ka nogna nolaghi thegna. Mana ginauna gleale'a fara ka unha te magnahaghedi thegnare. Mana ginauna goigonidi kmana glepo nei kmana mae nheta. Mana ginauna jaola goigonidi nogna naikno God re.

²⁵ Naugna mana laseni fara te chaichaghi na, gobigna lepo te edi manare ginauna keli fara leghuni nogna puhi chaichaghi na. Mana ginauna fahaehagheni thegna, eghuteuna kate iho teu naiknore, mana au nogna nabrou te mala goigonidi naiknore. King igne ginauna cheke faparini God mae ihei te fnakno ke klignadi king te gnafa ka nauthoglu igne. Theo kaisei mae tangomana te tapla faparini mana na, nu God ginauna goigonini mana.

²⁶ “Unha te filodi iagho ka mifi igne king te theome snakredi naiknore te fafara bongi narane teu igne thofno tutuani fara. Nu iagho thosei toutonu ka keha naiknore eigna mifi igne, naugna glepo igre ginauna theome faghose thakle mei.”

²⁷ Iara ne diꞌanagnafagu fara ne fogra keha narane kate nomhini igne, eghuteuna ke leghudi phei ba thilo narane ke leghugna igne, iara neke keli fapulo. Kate ke ghaota fapulo na, iara kegra haghe neke figri ka gloku teke tusu ranghi ghau king. Neuba, kate loku na iara ghathoni fabrahu mifi igne, nu iara theome raꞌe lase fakelini kolho gaoghathogna na.