Profet Daniel 5 - Buka Blahi Ka Cheke Holo

King Belsasa ne eni kaisei gaghamu biꞌo

¹ Kaisei narane, kate funei fruni King Belsasa ka kantri Babilonia igre, mana ne eni kaisei gaghamu biꞌo. Aonu mana ne kilo meidi kaisei thogha mae funei mala mei ghamu ka gaghamu biꞌo igne. Ka bongi igne, king ne koꞌu waen baludi mare.

² Kate koꞌu mare na, king ne chekedi nogna mae glokure mala hata mei kapu teke horo ka gol nei silva teku teke hata mae kuꞌegna mana King Nebukadnesa ka nogna Sugablahi God ka namono Jerusalem. King Belsasa magnahaghei te hata te mei kapu igre mala koꞌu waen baludi nogna funeire. Mana ne koꞌu waen baludi khetogna nei keha khetogna teure, nei hatimare mae biꞌo balu khetodi.

³ Aonu nogna mae gloku mana igre ne leghuni nogna cheke mae king igne ne hata ne mei kapu igre.

⁴ Kate koꞌu teuna, mare ne kilo fnaknoni nodi mumuju god teke horo ka gol, silva, bras, aean, gaju nei thina.

⁵ Aonu kaisei khame naikno megei nga ne jifla mei, rioriso neu ka gringnigna nogna suga king na ka vido te agha teu juta na.

⁶ King Belsasa filoni igne ne mhaghu nogna fara. Tathagna nei foflogna teu manare ne tughu, eghuteuna mana theome tangomana te kegra haghe na. Naugna thinigna na ne glaꞌe soru.

⁷ Aonu mana ne ehadi hatimare mae biꞌo mala kilo meidi nogna mae khaekae, nogna mae kastom, nogna mae naitu nhaghe nei hatimare mae glalase. Kate mei mare na, mana ne cheke eghu ka mare, “Ihei ka ghotilo te tangomana te iu'ijuni grioriso igne, eghuteuna rurutha gaoghathogna grioriso igne teuna? Iara ginauna vahini mana mala fatilo mae funei biꞌo ke lamnagna kantri Babilonia. Eghuteuna iara ginauna fapichi lao nogna pohe king na ka mana. Eghuteuna fabaꞌo lao kaisei chen gol ka graragna mana na mala fafnaknoni mana.”

⁸ Kate mei mae glalase gre te filoni grioriso igne, theo kaisei mae ka mare te tangomana te iu'ijuni grioriso igne, ba tangomana te rurutha gaoghathogna na ranghini king.

⁹ Aonu mae King Belsasa mhaghu nogna fara, eghuteuna thinigna na ne glaꞌe soru. Eghuteuna nogna mae funei manare ne iho nodi unha nate eni na.

¹⁰ Ka vido igne, idogna mana na ne nomhini naoglagna mae king na, baludi nogna mae funei mana re. Naꞌa ne ruma mei ka chogho te ghamu teu mare na ne cheke eghu ka mae Belsasa, “King mae ihei te karha te tifa! Thosei mhaghu.

¹¹ Fanomho sagho! Iara laseni kaisei mae glalase au agne ka nou kantri iagho igne. Eghuteuna tharungadi god te blahi igre au ka mana. Ka narane teke kegra funei kuꞌemi King Nebukadnesa ia, mana laseni mae igne au tagna glalase te keli. Eghuteuna nogna gaoghatho nei glalase teure biꞌo fara jateula god eghu. Eghume, kuꞌemu iagho King Nebukadnesa neke vahini mana mala mae funeidi hatimare nogna mae kastom te gnafa nei keha mae glalase teu igre.

¹² Naugna mae igne thofno lalase fara salaꞌudi keha mae glalase igre. Mae igne au nogna glalase biꞌo te mala rurutha gaoghathodi mifi igre. Eghuteuna mana jaola filo glanidi gaoghathodi faghusna te edi naiknore. Mae igne nanghagna na, Daniel. Eghuteuna tifa na King Nebukadnesa neke kiloni mana, Beltesasa. Chekedi sagho keha mae mala tei hata meini agne mala rurutha mana gaoghathogna grioriso igne.”

Mae Daniel ne rurutha gaoghathogna grioriso igne

¹³ Aonu mare tei ne hatani mae Daniel ne mei ka king. Eghuteuna king ne cheke eghu ka mana, “Iagho si mae Daniel teke hata mae kuꞌegu iara King Nebukadnesa teke mei funu Juda na ia?” Aonu mae Daniel ne cheke eghu ka mana, “Uve, iara ngala.”

¹⁴ King ne cheke eghu, “Uve, iara nomhini te tharungadi god te blahi ra au balumu iagho, eghuteuna gaoghatho te keli nei glalase biꞌo teuna jaola au ka iagho.

¹⁵ Iara neke kilo meidi nogu mae glalase, nogu mae khaekae, nogu mae kastom tekure mala iu'iju cheke igre, eghuteuna mala rurutha ranghi ghau gaoghathodi grioriso igre neku. Nu theo kaisei mae ka mae igre te tangomana ni na.

¹⁶ Nu te nomhini iara na, iagho tangomana te rurutha gaoghathodi glepo te poru igre. Eghume, jame te iu'iju iagho grioriso igre nei rurutha gaoghathodi cheke igre teuna, iara ginauna vahi nigho iagho mala fatilo nogu mae funei ke lamnagna kantri igne. Eghuteuna iara ginauna fapipichi ari ka iagho nogna pohe king na, eghuteuna iara ginauna na fabaꞌo ari ka iagho kaisei chen gol.”

¹⁷ Aonu mae Daniel ne cheke eghu ka mana, “King, iagho thosei famei ka iara glepo igre. Iagho tathajiu glepo tuare malamu themu, ba iagho tusu lao ka keha mae are. Neuba, iara ginauna na iu'iju ranghi nigho grioriso te au ka gringni na are. Eghuteuna iara ginauna na jaola rurutha ranghi nigho gaoghathogna grioriso tuana.

¹⁸ “Fanomho sagho. God mae ihei te fnakno kligna lahu igne teke vahini mae kuꞌemu iagho, King Nebukadnesa ia mala funei frunini kantri igne.

¹⁹ Mana neke kaisei mae biꞌo fara. Eghuteuna naikno ka kantri te gnafa, ka kokholo te gnafa nei ka cheke te gnafa teu igre neke mhaghuni mana. Jame te magnahaghei faleheni ihei na, mana ginauna faleheni naikno tuana. Jame te magnahaghei fakarhini ihei na, mana ginauna fakarhini naikno tuana. Mana au nogna nolaghi te mala nhaꞌa hagheni ihei, ba te mala nhaꞌa faparini ihei.

²⁰ Nu mae kuꞌemu iagho igne kaisei mae fahaehaghe fara, eghuteuna patugama fara, eghuteuna mana paradi koba naiknore. Naugna igne, God neke hata fadelei ka mana nolaghi te mala funei frunidi naiknore. Eghuteuna theo kaisei naikno te ghatho tahuni mana na.

²¹ Naiknore neke khi fajiflani mana ka nogna suga na. Aonu gaoghathogna mana na jateula gaoghathodi glepo te tautagu ka namhata are eghu. Mana neke au balu dongki neke ghamu buburu jateula buluka neku. Eghuteuna mana neke thuru fabrahu farihotei glalaba, neke soru mei nakhete bongiro na ke kligna na. Mana neke au fabrahu jateula igne neku neke ghilei thoke mei narane te filo glani mana God mae ihei te fnakno kligna na, nei mae ihei te funei frunidi naikno te gnafa ka nauthoglu igne. Eghuteuna God na tangomana te vahini mae ihei te nabagna te mala king frunidi namono igre.

²² “Iagho gragna mae Nebukadnesa, eghuteuna iagho lasedihi glepo igre. Nu neuba, iagho theome nhaꞌa fapari nigho themu.

²³ Iagho pala hagheni nanghamu themu na kligna, eghuteuna nhaꞌa soruni nanghagna God gna kligna na pari. Filo sagho! Iagho chekedi nou mae glokure mala tei hata mei kapu teke hata mae kuꞌemu ka sugagna God na igre. Eghuteuna iagho baludi khetomu nei fapea khetomu, nei hatimare mae funei balu khetodi teu mare igre mala koꞌu waen ka kapu te blahi fara igre. Eghuteuna ghotilo kilo fnaknodi mumuju god teke hohoro ka gol, silva, bras, aean, gaju nei thina teu igre. Filo sagho, god igre theome tangomana te filo na, ba te nonomho na, ba te cheke na, ba te laseni kaisei glepo na. Thono theo fara. Nu iagho theome ghatho tahuni God mae ihei te reireghini nei batuni teu nakarhamu iagho na.

²⁴ Naugna te eni iagho igne, God neke snakre meini khamegna na mala rioriso cheke igre.

²⁵ “Igre cheke teke filodi iaghore: Mene, Mene, Tekel, Parsin. Jateula te Kaha, Kaha, Skel nei Fnota.

²⁶ “Eghuteuna gaoghathogna cheke igne: “Kaha teu igne, God na la kahahi narane te mala king iagho na la gnafahi.

²⁷ “Skel teu igne gaoghathogna na, God neke nhaꞌa lao nigho iagho ka skel na iagho te theome nabamu te mala funei ka kantri igne na.

²⁸ “Fnota teu igne, nou kantri iagho igne ginauna groꞌe fnota pea. Keha vido na Media, eghuteuna keha vido na Pesia.”

²⁹ Kate nomhini cheke igne, King Belsasa ne chekedi nogna mae glokure mala hata mei nogna pohe king na mala fapichi mae Daniel. Eghuteuna fabaꞌo lao kaisei chen gol ka mana. Aonu mana ne vahini mae Daniel mala fatilo nogna mae funei biꞌo ka nogna kantri na.

³⁰ Nu ka bongi igne la, maedi Media mei ne faleheni mae Belsasa, king gna Babilonia.

³¹ Aonu mae Darius, maegna Media te king majaghani ka kantri tuana. Mana namno salei phei finogha ka narane te king mana igne.