Profet Daniel 11 - Buka Blahi Ka Cheke Holo

Naiknodi Ijep ne magra ka naiknodi Siria

¹ Mae igne ne cheke eghu ka iara, “Ka finogha ululahu King Darius gna Pesia te funei Babilonia igne, iara neke reireghini nei toghoni neku mana mala kegra rheta mana.

² “Eghuteuna gognarona iara ginauna toutonuni glepo te tutuani igne. Thilo mae king ginauna funei frunini kantri Pesia. Eghuteuna ke leghu na, fafati king na ginauna kegra haghe. Mae igne kaisei mae dedei fara uludi keha thilo mae king ululahu igre. Eghuteuna kate haghe te thono nheta fara naugna te dedei fara na, mana ginauna tei magra ka king gna Gris.

³ Ke leghu, kaisei mae king gna Gris te nheta fara ginauna kegra haghe. Mana ginauna funei frunidi kmana kantri, eghuteuna mana ginauna na edi gobigna lepo te magnahagheni thegna re.

⁴ Nu kate nheta te salaꞌui na, nogna kantri na ginauna fnota ka fati vido. Keha fati mae king delei ngau nate funei frunidi fati vido igre, nu mae igre theome mei ka vikegna mana, eghuteuna mae igre theo nodi nolaghi jateula mana eghu.

⁵ “King gna Ijep ke mata igne ginauna rheta fara. Nu kaisei nogna mae biꞌo mana ka nogna armi na ginauna nheta salaꞌuni mana, eghuteuna mana ginauna funei frunini kantri Siria, aheva te biꞌo salaꞌuni nogna kantri mana na.

⁶ Keha finogha salaꞌu ke leghudi igre, king gna Ijep ke mata eghuteuna king gna Siria ke raru, phiamare ginauna nhaꞌa cheke mala loku fodu. King gna Ijep ginauna snakreni thugna gaꞌase na mala tolaghi ka king gna Siria mala tangomana phei kantri igre te loku fodu na. Nu loku fodu igne na theome au raugha, naugna mae naokare ginauna aknu falehe gaꞌase igne baludi khetogna, thugna nei nogna naikno gloku eghu teke tei balugnare.

⁷ “Theome raugha ke leghugna igne, kaisei mae ka vikegna gaꞌase igne ginauna kegra king ka kantri Ijep. Mae igne ginauna kegra haghe tei magra ka nogna armi mae king gna Siria. Mana ginauna tei ruma lamna ka nodi vido mala poru mare na, eghuteuna mae igne ginauna uluni magra igne.

⁸ Mana ginauna hata nodi mumuju god mare re, baludi keha glepo teke horo mare ka gol nei silva eghu teke fafara mare ka mumuju god igre, ne hata ne tei Ijep. Keha finogha, phei kantri igre ginauna na theome magra.

⁹ Ke leghugna igne, king gna Siria ginauna tei magra Ijep. Nu mana ginauna nake pulo ka nogna kantri na.

¹⁰ Thugna mae king gna Siria igre, mare ginauna kilo fodu kmana mae soldia tarabana mala magra. Kaisei mae ka thugna king igre balugna nogna armi na ginauna mei jateula nabritha biꞌo eghu na roꞌeni nodi vido mala poru mae naokare.

¹¹ “King gna Ijep igne ginauna diꞌatagna fara na tei magra ka king gna Siria. Eghuteuna mana na uluni magra igne.

¹² Mana ginauna na fahaehagheni fara. Kate uluni magra igne, mana ne aknu falehe kmana thogha soldia. Nu mana ginauna na theome tangomana nate ulu fabrahu na.

¹³ King gna Siria igne ginauna nake figri mala tarabana kaisei armi biꞌo te heta fara uluni teke tifa na. Eghuteuna mana ginauna nake pulo mei Ijep balu nogna armi biꞌo nei kmana glepo mala magra.

¹⁴ “Ka narane tuare, kmana naikno ginauna kegra haghe mala magra ka King Ijep. Eghuteuna keha mae mala ei puhi biꞌo ginauna mei funudi ka nou naikno iagho are mala magra ka king, leghuni kaisei mifi teke filoni mare na. Nu mare ginauna theome tangomana te uluni magra igne.

¹⁵ King gna Siria igne ginauna mei balu nogna soldia mala bara ligohoni kaisei nogna namono rheta king gna Ijep. Eghuteuna mare ginauna lilisei thina balu glose ka pesigna baragna namono na mala tangomana mare te apla te tei lamna te mala hata namono igne. Neuba, mae Ijep igre ne au nodi armi te keli, mare ginauna theome naba te magra ka mare na.

¹⁶ King gna Siria balu nogna armi ginauna eni kolho unha te magnahagheni thedi na, eghuteuna theome tangomana kaisei naikno te fanogradi mare na. Mana ginauna mei ruma haghe lamna namono Israel, eghuteuna mana ginauna au nogna nolaghi te mala goigonini namono igne.

¹⁷ King gna Siria igne ginauna mei balu nogna armi biꞌo mala eni kaisei nhaꞌa cheke te mala loku fodu balugna king gna Ijep. Te mala loku fodu phei kantri igre, king gna Siria igne jaola ne snakreni thugna gaꞌase na mala tolaghi ka king gna Ijep. Mana eni igne mala tangomana mana te au nogna nolaghi biꞌo balugna thugna gaꞌase nate kuin frunini Ijep. Nu nogna gaoghatho mana igne ne theome loku kolho.

¹⁸ Ke leghudi narane igre, king gna Siria ginauna tei magra ka kantri te au ka geri thongna, eghuteuna mana ginauna hata kmana namono biꞌo ka mare. Nu kaisei nodi mae mala baubatu keha kantri are ginauna uluni mana, eghuteuna nogna fahaehaghe mana na ginauna gnafa. Mae mala baubatu igne ginauna tapla faparini nogna nolaghi mana na, eghuteuna mana ginauna na theome tangomana nate fahaehaghe fara na.

¹⁹ King igne ginauna nake figri ka nogna vido mala poru ke lamnagna nogna kantri na. Nu nogna naoka mana na ginauna uluni mana ka magra, eghuteuna mare ne aknu faleheni mana.

²⁰ “Nu kaisei king majaghani ginauna tughuni mana. Mae igne ginauna kuruni kaisei mae funei mala huhurudi naiknore mala foli takis, mala tangomana nogna kantri na te dedei fara. Hatimare nogna naoka manare ginauna na faleheni mana, nu theome lehe ka magra.”

King diꞌagna Siria

²¹ Mae igne neke cheke eghui ka iara, “Aonu, kaisei mae ginauna kegra king ka kantri Siria. Mae igne kaisei mae thono diꞌa fara puhigna na. Eghuteuna mana jaola theo nogna nolaghi te mala funei frunidi naiknore. Nu mana ginauna edi kmana nafnata cheke chaichaghi nei fahaehaghe eghu mala kegra king ka vido narane te theome tangomana kaisei naikno te laseni.

²² Mana ginauna falehedi naikno te theome leghudi nogna chekere. Neubane nogna pris biꞌo God, mana na jaola aknu falehe.

²³ Neuba mana ne funei frunini kaisei kantri ikoi, mana fofodu fakeli baludi keha mae ka keha kantri are. Nu mana ginauna chaghidi fara mare, naugna mana magnahaghei te au nogna nolaghi biꞌo.

²⁴ Eghuteuna ka vido te faꞌioiho teu naiknore, mana ginauna hata nohi te au kmana dedei ke lamnagna. Mana ginauna edi kmana glepo te diꞌa teke theo kaisei naikno ka vikegna manare teke edi tifa re: Mana ginauna tufa ka kheragna thegnare gobigna lepo teke tei hata mana ka magra re. Eghuteuna mana ginauna au nogna gaoghatho te mala tei magra hatidi vido te mala poru re, nu mana ginauna na theome au raugha kolho.

²⁵ “Mae king igne ginauna kegra heta balugna kaisei armi biꞌo mala magra ka king gna Ijep. Nu king gna Ijep igne ginauna tarabana kaisei armi biꞌo te rheta tulao mala magra ka king gna Siria.

²⁶ Nu nogna mae funei mae king gna Ijep igre ginauna chaghini nei na goigoni ni eghu mana mala theome tangomana mae king igne te uluni magra na. Armi biꞌo gna Siria ginauna mei goigoni nogna armi biꞌo mae king gna Ijep, eghuteuna kmana mae soldia ginauna lehe.

²⁷ Neuba phei king igre ne gnokro fodu ne ghamu ka kaisei tevo kolho, nu gaoghathodi phei mae igre ginauna theome keli kolho. Phei mae igre ginauna chaichaghi fari thedi kolho. Eghuteuna phei mae igre ginauna na theome thokeni unha teke magnahagheni phia mare na, naugna theome thokeniu narane teke vahini God na.

²⁸ King gna Siria ginauna hata gobigna lepo teke uludi ka magra na. Eghuteuna ka puhi igne, mana jaola magnahaghei te goigoni nodi puhi te mala pogho soruni God naiknore. Mana ginauna edi kolho unha te ghathodi thegnare, eghuteuna gnafa teuna mana ke figri ka nogna kantri na.

²⁹ “Ka narane teke vavahi God igne, king gna Siria ginauna nake tei magra Ijep. Nu ka narane tuana mana ginauna na theome uluni magra na jateula teke ululahu ia teuna.

³⁰ Naugna soldiadi Rom ginauna mei ka vaka mala magra ka mana ginauna thono mhaghu nogna fara ne figri neke pulo. Naugna igne, mana ginauna na thono diꞌatagna fara. Eghume, mana nake pulo magridi nogna naikno God re, eghuteuna fariu riu goigoni ni puhi te mala pogho soruni God na. Eghuteuna mana ghatho tahudi naikno te diꞌa tela kokohi puhi te keli te mala tufru soruni God na.

³¹ “Nogna soldia manare ginauna ruma ka nogna Sugablahi God na, eghuteuna Sugablahi igne ginauna thona ka tathagna God na. Mare ginauna na theome snakredi naiknore te mala fafara leuleghu narane na, eghuteuna mare ginauna lilisei haghe kaisei glepo te thono diꞌa fara ke lamnagna nogna suga God na.

³² King ginauna famaemahedi iheire te theome thofno fatutuani mala figri tagruni God. Nu naikno te leghuni puhigna God te doglo na ginauna kegra heta na theome leghuni nogna cheke mana na.

³³ “Mae mala baubatu ka nogna naikno God te au tadi gaoghatho te kelire ginauna farirhiudi nodi naiknore mala jaola au tadi gaoghatho te keli na. Nu king ginauna aknu falehe keha mae mala baubatu igre ka magra, eghuteuna gahu kehare ka khaꞌaghi. Eghuteuna mana ginauna blau nodi gobigna lepo naiknore, eghuteuna lilisei kehare ka sosolo.

³⁴ Nu kate aknu falehedi koba king nogna naikno God igre na, katha vido thotogho kolho nate mei ka mare na. Neubane kmana naikno te ruma mei ka nogna naikno God igre na, nu kehare chaichaghi kolho.

³⁵ King ginauna aknu falehe keha ka mae mala baubatu igre, nu God ginauna toghodi naikno te karha teu igre mala koko mare puhi te diꞌare mala doglo ka tathagna mana na. Nafnata puhi igne ginauna na theo ka huigna ghilei thoke mei narane leghu lahu teke vavahi God na.

³⁶ “King gna Siria ginauna leghuni unha te ghathoni thegna na. Mana ginauna cheke fahaehaghe nei fafnaknoni eghu thegna salaꞌuni God mae ihei te fnakno ke klignadi god fateote'o. Mana ginauna eni fabrahu puhi igne ghilei thoke mei narane teke vahini God te mala parani mana na. Eghuteuna God ginauna eni unha teke ghathoni mana na.

³⁷ King igne ginauna theome ghathodi keha god teke pogho sorudi mae kuꞌegna tifa ra, ba god teke namhadi fara goro gaꞌase ra. Mana ginauna na theome ghatho tahuni kaisei god delei, naugna te ghathoni mana na, mana thegna ngala te fnakno kligna lahu ka keha god te gnafa igre.

³⁸ Mana ginauna na ghatho tahuni kolho kaisei god te chaichaghi mala reireghini ka vido te rheta te mala poru igne. Nu mana ginauna tusu lao gol nei silva nei famane thina, nei keha namha eghu ka god teke theome laseni kuꞌegna tifa ra.

³⁹ Mana ginauna toredi naikno te tarai ka keha god delei igre mala reireghini vido mala poru te bara te maku ka thina igne. Mana ginauna fafnaknodi iheire te magnahagheni mana te mala nodi king. Eghuteuna mana ginauna na vahidi mare mala nogna mae funei, nei tusu ranghidi nodi vido glose jateula nogna namha eghu ka mare, eigna mare ne toghoni mana.

⁴⁰ “Kate namo gnafa narane leghu lahu tuare, king gna Ijep ginauna tei magra ka king gna Siria. Nu king gna Siria igne ginauna magra heta fara ka king gna Ijep balu nogna hose, chariot nei kmana vaka. King gna Siria igne ginauna goigonidi kmana kantri jateula saeklon biꞌo eghu.

⁴¹ Mana ginauna ruma mei ke lamnagna namono Israel, eghuteuna mana ginauna aknu falehe kmana thogha naikno. Nu mana ginauna na theome tangomana te uludi phei kantri Idom ghe Moab, nei kaisei vidogna kantri Amon.

⁴² Kate magra mare te uludi keha kantri igre, mana ginauna jaola uluni Ijep.

⁴³ Mana ginauna hata kmana silva nei gol nei keha glepo te keli fara eghu ka kantri Ijep. Eghuteuna maedi ka phei kantri Libia ghe Etiopia ginauna toghoni mana.

⁴⁴ Nu ke leghugna igne, kaisei nonomho ginauna mei funugna ke maghati nei ke raru. Eghuteuna mana ginauna mhaghu nogna fara kate nomhini igne. Nu naugna te diꞌatagna te salaꞌui na, mana ginauna magra heta fara na aknu falehe kmana naikno.

⁴⁵ Eghuteuna king ginauna babana haghe nogna suga tapuale biꞌo na farihotei Thongna Mediterenian ghe Thogele blahi Saion. Nu mana ginauna lehe jare, eghuteuna ginauna na theo kaisei naikno nate au teu te toghoni mana na.”