Nonomho Te Keli Teke Risoi Mae Mak 8 - Buka Blahi Ka Cheke Holo

Mae Jisas neke faghamudi fati thogha naikno

¹ Theome raugha ke leghugna igne, kmana naikno fara ne mei ka mae Jisas. Ka vido tuana mare theo kaisei gano te mala ghamu na. Aonu, mae Jisas ne kilodi nogna mae fanomhore, ne cheke eghu ka mare,

² “Iara kokhoni nogudi fara naikno igre, naugna mare la auhi baluda tahati nabagna thilo narane, eghuteuna gognarona mare theo kaisei gano te mala ghamu na.

³ Eghuteuna jame te kuru teidi iara ka sugadire kate rofo eghu jare teu mare na, mare ginauna na tei fnuda farihotei nabrou, naugna keha naiknore namonodire thei brahu fara.”

⁴ Nogna mae fanomho mae Jisas re ne cheke eghu ka mana, “Nu tahati gne theome namo ka kaisei namono. Aheva nate hata naba gano tahati te mala kafe faghamudi naikno te kmana igre?”

⁵ Mae Jisas ne ghusna eghu ka mare, “Niha bret te au teu ka ghotilo na?” Mare ne cheke eghu ka mana, “Fitui.”

⁶ Aonu, mae Jisas ne cheke ka naiknore mala gnokro pari. Mana hata fitu bret re, ne cheke fakelidi ka God, eghuteuna mana piepike bret igre ne tusu lao ka nogna mae fanomhore. Eghuteuna mana ne cheke ka mare mala tufa ganore ka naiknore.

⁷ Mare jaola au keha sasa ikodi. Mae Jisas ne cheke fakelidi ka God, ne tusu lao ka nogna mae fanomhore mala tufa mare ka naiknore.

⁸ Mare kafe ghamu ne boho. Aonu mae fanomhore ne fafofodu fitu khara'o ka vido gano teke salaꞌui ka naiknore.

⁹ Fati thogha mae teke au jare ka narane tuana. Ke leghugna igne mae Jisas ne chekedi naiknore mala ke pulo ka namonodire.

¹⁰ Aonu, mae Jisas saghe ka mola baludi nogna mae fanomhore ne tei ka nohi Dalmanuta.

Mae Farasire ne toreni mae Jisas mala eni kaisei kofubobhoi

¹¹ Keha mae Farasire mei ka mae Jisas ne toutonu balugna mana, naugna mare magnahaghei te saosagroni mana. Aonu mare toreni mana mala eni kaisei fagaglana mala laseni mana teke mei funugna kligna ka God na.

¹² Mae Jisas ne phanga fabiꞌo ne cheke eghu, “Naugna unha si ghotilo te magnahaghei fagaglana gnea? Nu te chekeni iara ka ghotilo na, iara ginauna na theome eni kaisei fagaglana mala filoni ghotilo.”

¹³ Mae Jisas jifla kokodi mae Farasire, ne saghe ka mola na neke kasa ka keha phile kholo na.

Mae Jisas theome magnahaghedi nodi farirhiu mae biꞌodi mae Jiure

¹⁴ Ka narane tuana mae fanomhore ne ghatho iho ne theome hata naba gano, kaisei bret ngala te hata mare baludi ka mola na.

¹⁵ Mae Jisas ne kulu cheke faheta eghu ranghidi nogna mae fanomhore, “Fiofilo ghami ghotilo ia ka nodi isi hatimare mae Farasi nei nogna isi mae King Herod ana eghu.”

¹⁶ Hatimare ne nomhini cheke mana igne ne cheke eghu fari thedi, “Mana chekeni igne naugna tahati ne theome hata keha bret.”

¹⁷ Mae Jisas ne laseni unha te ghathoni mare na ne cheke eghu ka mare, “Naugna unha site nanga nomi fara ghotilo gnea, ba te theome hata gano gne? Ba theome filoni nei laseni eghu ngala si ghotilo gnea? Ba theome glolau ngala ka nagnafami ghotilo re signea?

¹⁸ Ghotilo au tathami, nu ghotilo theome raꞌe filoni. Ghotilo au khulimi nu ghotilo theome raꞌe nomhini. Ghathoni ghotilo teke eni iara tifa ia, kate ke theome naba gano ia?

¹⁹ Ghathoni ka narane teke faꞌimadi iara glima thogha naikno ra? Niha khara'o teke fafofodu ghotilo ka vido gano teke salaꞌui ra?” Mare ne cheke eghu ka mana, “Nabotho phei khara'o.”

²⁰ Mae Jisas ne cheke eghu ka mare, “Ka narane teke faꞌimadi iara fati thogha naikno ka fitu bret ra, ghathodi niha khara'o teke fafofodu ghotilo ka vido gano teke salaꞌui ra?” Mare ne cheke cheke eghu ka mana, “Fitu khara'o.”

²¹ Mae Jisas ne cheke eghu ka mare, “Ghotilo ghathodi glepo teke edi iara igre, nu ghotilo theome lasedi kolho eghu?”

Mae Jisas ne fakelini tathagna kaisei mae gna Betsaeda

²² Kate mei thoke mare ka namono Betsaeda na, keha naiknore hata ne mei kaisei mae te dofu ka mae Jisas, ne toreni mana mala haboni mala fakelini mae te dofu na.

²³ Mae Jisas ne loku ka khamegna mae te dofu na, ne tathalei ne tei ke kosigna namono na. Aonu mana ne kmisu ka tathagna mae te dofu na. Mana ne habo lao ka mae te dofu na ne cheke eghu ka mana, “Ba, iagho tangomana teke fifilo gognaro na?”

²⁴ Mana filo haghe ne cheke eghu, “Uve! Iara filodi naiknore, nu mare jateula gaju te nonolo tafri teura eghu.”

²⁵ Mae Jisas neke fapea habo laoi ka tathagna mana re. Aonu gognarona mana feferha fabiꞌo tathagnare neke fifilo fakeli, neke filo glanidi gobigna lepore.

²⁶ Mae Jisas ne cheke faheta eghu ka mana, “Doglo ke pulo ka sugamu na, nu iagho thosei ke pulo lamna namono ke toutonu ka naiknore teke fakarhi nigho iara na eghu.”

Mae Pita ne cheke thakleni mae Jisas na mae Kraes

²⁷ Mae Jisas baludi nogna mae fanomhore jifla ne tei ka namono te au faligohoni namono biꞌo Sisaria Filipae. Kate tei mare kau nabrou na, mae Jisas ne ghusna eghu ka mare, “Ba, naiknore ne mae ihei eghu ghau iara?”

²⁸ Mare ne cheke eghu ka mana, “Keha naiknore te chekei na, iagho mae Jone Apublahi, keha naiknore te chekei na, iagho mae profet Elija, eghuteuna keha naiknore te chekei na iagho kaisei mae profet ka mae tifa ra.”

²⁹ Aonu mae Jisas ne ghusna eghu ka mare, “Nu ghotilo ba? Mae ihei eghu ghau iara ghotilo?” Mae Pita ne cheke eghu ka mana, “Iagho mae Kraes.”

³⁰ Mae Jisas ne cheke faheta ka mare, “Thosei cheke eigu iara ka ihei nga.”

Mae Jisas ne kulu cheke ka mare u glehegna na

³¹ Aonu mae Jisas ne funu farirhiudi nogna mae fanomhore ne cheke eghu ka mare, “Iara mae teke mei funu ka God na, mare ginauna na para ghau fara iara. Ginauna hatimare mae pris ulu, nei hatimare mae velepuhigna vetula nogna mae Moses, nei mae biꞌodi hatimare mae Jiu langau eghu na tirodi ghau iara. Mare ginauna na eꞌei puhi mala falehe ghau iara. Nu ka fatilo narane na God nake fakarha fapulo ghau iara kau glehe.”

³² Unha te chekeni mae Jisas na ne thono glola fara ka mare. Aonu mae Pita ne hata fadeleini mae Jisas ne cheke eghu ka mana, “Thosei eni iagho nafnata cheke tuana!”

³³ Mae Jisas ne figri lao ka nogna mae fanomhore ne cheke eghu ka mae Pita, “Iagho mae Satan, tei nou! Iara kilo nigho iagho mae Satan naugna iagho magnahaghei fanagra ghau iara te mala eni unha te magnahagheni God na. Unha te chekeni iagho igne theome mei funu ka God, nu nogna gaoghatho naikno kolho.”

Mae ihei te magnahaghei mei ke leghugna mae Jisas

³⁴ Ke leghugna igne mae Jisas ne kilodi naiknore baludi nogna mae fanomhore ne cheke eghu ka mare, “Mae ihei te magnahaghei mei ke leghugu iara na, mana thosei ghathoni kolho thegna, nu mana sasaꞌa leghu ghau iara mala lehe ka gaju fafatha.

³⁵ Naugna ihei te magnahaghei tathaji nakarhagna thegna na, mana ginauna na jojokei thofno nakarhagna na. Nu ihei te lisa lao nakarhagna na malagu iara nei Nonomho te Keli gne teuna, mana ginauna na hatini karha na.

³⁶ Jame kaisei naikno snori nogna fara ka gobigna lepo gna nauthoglu igne, eghuteuna nakarha na jifla kokoni mana, ba, glepo tuare na toghoni mana? Theo fara!

³⁷ Theo kaisei glepo naba te mala tusu lao mana teke mala foli fapulo nakarhagna na.

³⁸ Eghume iheire te tirodi ghau iara nei tirodini chekegu iara na ke uludi naikno te diꞌa kau nauthoglu igne, iara ginauna na tirogudi naikno te tirodi ghau iara tuare ka narane na teke pulo mei iara balu nogna nolaghi biꞌo mae Mama nei balu engel te blahi.”