Josua 22 - Buka Blahi Ka Cheke Holo

Vike teke au ka keha phile Khoꞌu biꞌo Jordan igne neke figri ka namono

¹ Aonu Josua ne kilodi soldia ka vikegna Ruben, nei ka vikegna Gad, nei vido gaga ka vikegna Manase te khotogna glose ka keha phile Khoꞌu biꞌo Jordan, mala kafe mei mare ka mana.

² Mana ne cheke eghu ka mare, “Gognarona, ghotilo thofno leghudi gobigna lepo Moses nogna mae gloku Lord, teke chekedi mala edi ghotilo teku mana ra. Eghuteuna ghotilo jaola leghudi nogu cheke iara ra.

³ Ka finogha tela salaꞌu ra, tahati neke kaisei au fodu nu ghotilo neke theome thodo te toghodi kherami re te mala hata nodi glose mare. Leuleghu fata na, ghotilo leghudi fabrahu nogna cheke Lord, noda God.

⁴ Eghuteuna gognarona Lord nomi God ghotilo na ginau tusu ranghidi vikemi ghotilo re pharikeli mala au fakeli ka nomi glose ghotilo re, jateula teke nhaꞌa cheke mana tifa ia. Eghuteuna thofno keli fara ghotilo teke figri ka nomi namonore, ka nomi glose teu te khotodi ghotilo ka keha phile Khoꞌu biꞌo Jordan, aheva Moses teke tusu arihi ka ghotilo tifa ra.

⁵ Kate ke figri ghotilo na, ghotilo theome mala ghatho ihodi te mala leghudi nogna famane farirhiu Moses nogna mae gloku Lord, teke tusu arihi ka ghotilo ra. Mana neke chekehi ka ghotilo te mala namhani Lord noda God, tapla leghudi puhigna mana re, leghudi nogna cheke mana re, loku famaku ka mana, eghuteuna loku ranghini mana ka nagnafami fateote'o, nei ka gaoghathomi fateote'o.”

^6-8 Aonu Josua ne fablahidi, ne cheke eghu ranghidi, “Ghotilo tangomana te tei ka namono na. Eigna gognarona ghotilo dedei nomi fara, ghotilo au kmana nomi buluka, sipu, nanigot, nei silva, nei gol, nei bras, nei aean, nei jaola kmana nomi pohe. Ghotilo hata glepo teke uludi ghotilo ka magra ka nomi naoka ra, eghuteuna tufa ka vikemi ghotilo are.” Eghuteuna kate cheke te gnafa ka mare na, mare neke pulo ka namono. Tifa na, Moses neke snakre tei glose ka vido gaga vikegna Manase, eghuteuna glose igne te au ka rijon Basan ke maghati ka keha phile Khoꞌu biꞌo Jordan. Nu ke leghu na, Josua neke tusu lao glose ka keha vido gaga vike igne, ka keha phile ke mosu Khoꞌu biꞌo Jordan, ka namono aheva teke aula keha vikere.

⁹ Soldia ka vikegna Ruben, nei ka vikegna Gad, nei ka vikegna Manase teu igre neke pulo ka nodi namonore. Mare jifla kokodi kheradire mala au faleghu ka namono Saelo jare Kenan, mala ke figri ka namono biꞌo Gilead aheva te thofno khotogna mare na, leghuni unha teke chekeni Lord ka Moses tifa.

Iheire teke tei ka namono igre ne eni kaisei olta tuthuana

¹⁰ Kate tei posa nogna soldia Ruben, nei nogna soldia Gad, nei nogna soldia vido gaga vikegna Manase teu igre Gelilot ka nohi Kenan rhegna Khoꞌu biꞌo Jordan, mare ne horo haghe kaisei olta te famane filogna na ke mosu gna khoꞌu igne.

¹¹ Kate nomhini eigna unha te eni mare igne,

¹² naiknodi Israel ne kafe haghe Saelo mala tei magra ka mae iheire te eni olta igne.

¹³ Nu mare ne kuruni Pris Finehas mala tei Gilead mala kulu tei filodi mae kheradi te eni olta igne. Eliesa kmagna Finehas igne te pris biꞌo ka narane tuare.

¹⁴ Nabotho lida ka vikedi mare te au ke mosu Khoꞌu biꞌo Jordan te tei baludi mare na. Mae igre te phaꞌu mae ka vikedi mare igre.

¹⁵ Kate posa lao mare ka namono Gilead, mare ne cheke baludi vikegna Ruben, nei vikegna Gad, nei vido gaga ka vikegna Manase te au ke maghatigna namono igne.

¹⁶ Mare ne cheke eghu ka nanghagna Lord, “Naugna unha site eni ghotilo glepo ignea? Tahati te gnafa na vikegna Israel kolho, eghuteuna Lord na noda God tahati, nu ghotilo eni kaisei glepo te thono diꞌa fara ka tathagna mana. Olta te eni ghotilo igne, falaseni ghotilo te tapla jafra ranghini mana. Gognarona ghotilo theome leghuni mana!

¹⁷ Ba, ghotilo kela ghatho ihodihi narane kani teke au tahati Peo teke para ghita mana eidi nakhiboda tahati ra? Tahati nogna naikno mana, nu mana para ghita ka kaisei fogra te thono diꞌa fara teke kafe thoke ghita tahati gnafa. Eghuteuna tahati theome gnafa te au papara fara eigna glepo igne.

¹⁸ Ba, ghotilo ginauna leghuni mana ba theo? “Jame te tei kokoni mana ghotilo gognarogne, nathuꞌu na mana ginauna para ghita gnafa.

¹⁹ Jame te ghathoni ghotilo nomi glose na theome gae ka tathagna Lord teuna, te keli na ghotilo mei ka nogna glose Lord aheva te au nogna Suga Tapuale te Blahi tela auhi mana tagna na. Ghotilo tangomana te hata keha glose agne balumi. Nogna olta Lord na la auhi agne na! Nu kate eni ghotilo keha olta na, unha te eni ghotilo igne filogna na jateula ngau tahati te gnafa na kafe figri tagruni mana.

²⁰ Ghotilo mala ke ghathoni puhigna Akan te diꞌa mae ihei teke karha ka vikegna mae Sera. Lord neke cheke ka tahati mala gnhubra fahui gobigna lepo re ke lamna namono Jeriko, mala fafara ka mana, nu mae igne neke theome leghuni Lord. Naugna igne Lord neke para ghita tahati hui eigna puhi igne. Eghuteuna theome thegna mana kolho teke lehe eigna nakhibo igne, nu kmana naikno jaola neke lehe.”

²¹ Nu mare ka vikegna Ruben, nei ka vikegna Gad, nei ka vido gaga vikegna Manase eghu neke cheke eghu,

²² “Lord kolho te thofno God na! Lord, God mae ihei te au nolaghi fateote'o igne, mana tangomana te lasedi unha te edi ghehati re! Eghuteuna ghotilo tangomana te laseni jame te huhughuni ghehati Lord, nei theome fatutuani ni mana teuna, jame te keli na ghotilo falehe ghami ghehati kolho!

²³ Eghuteuna jame te theome leghuni ghehati nogna cheke mana na, ghehati eni olta te mala tarai igne ka gaoghathomi themi kolho, eghuteuna ghehati gahu buluka ka olta igne, ba gahu gano teke hata mei ka nagare ka mana, ba ghehati aknu falehe buluka te gahu ghehati katha vido mala fafara ka mana, aonu ghehati ghamu katha vido tagna te mala laseni ghehati te kheragna mana teuna, jame te keli na Lord para ghami ghehati.

²⁴ “Nu theo eghu! Ghehati eni igne naugna ghehati mhaghu glahu ke leghu na, vikemi ghotilo igre ginauna cheke eghu ka vikemi ghehati re, ‘Ghotilo theome nabami te tarai lao ka Lord mae ihei te noda God tahati na. Naugna ghotilo theo nomi nolaghi te mala eni jateula tuana teuna!

²⁵ Lord neke lilisei Khoꞌu biꞌo Jordan jateu te mala fofotagna teu nohi farihoteida tahati, eghuteuna ghotilo theo nomi nolaghi te mala tarai ka Lord na.’ Jame keha narane ke leghure iheire te karha mei ka vikemi ghotilo igre ginauna theome snakredi iheire te karha mei ka vikemi ghehati igre te mala tarai ka Lord.

²⁶ “Naugna igne te ghathoni ghehati te babana olta igne, theome mala gahu buluka ba sipu mala fafara ka Lord, ba mala gahu keha nafnata fafara te mala tusu lao te mala kelitagna Lord.

²⁷ Olta igne mala falase ghita tahati te gnafa nei phagusu te gnafa teu igre tangomana te tei ka nogna Suga Tapuale te Blahi Lord te mala edi soasopai nafnata fafara igre. Ka puhi teu igre iheire nate karha mei ginau ka vikemi ghotilo re ginauna na theome cheke eghu ka iheire nate karha mei ka thilo vikemi ghehati igre, ‘Ghotilo theome tangomana te tarai ka Lord.’

²⁸ “Gaoghathomi ghehati re igne, jame vikemi ghotilo re cheke eghu, ‘Filoni igne si ghotilo! Kuꞌemi ghehati tifa ra neke eni nogna olta Lord igne. Nu igne kaisei tuthuana kolho mala jaola laseni ghehati nogna naikno Lord ra te olta igne theome mala gahu fafara tagna.’ Uve, ghotilo tangomana te chekeni tuana na.

²⁹ “Ghehati theome magnahagheni te cheke faparini Lord. Ghehati thofno magnahagheni fara te leghuni mana. Ghehati theome magnahagheni olta igne te fafara tagna. Eghuteuna ghehati theome magnahaghei te babana olta igne mala ke tughuni olta ke ulugna nogna Suga Tapuale Lord igne naugna mana ngala noda God tahati na!”

^30-31 Kate nomhini pris Finehas baludi nabotho lida igre unha te chekeni kheradi mare igre, mare ne kelitadi fara. Eghuteuna mare ne cheke eghu ka mare, “Gognarona ghehati laseni Lord te au baluda tahati. Unha te eni ghotilo igne falaseni ghotilo te theome fariuriu te mala eni kaisei glepo te mala huhughuni mana. Ghehati laseni Lord te au baluda eghuteuna mana ginauna na theome para ghita gnafa.”

³² Gnafa teuna mae Finehas baludi keha mae lida igre neke jifla kokoni Gilead neke pulo jare ka nohi Kenan. Eghuteuna mare ei ripot eigna glepo igne.

³³ Josua nei mae iheire te baubatu ka naiknodi Israel nomhini igne ne thofno kelitadi fara ne cheke fakelini God. Eghuteuna mare ne theome cheke eigna te mala magra ka vikedi Ruben ghe Gad.

³⁴ Vikedi Ruben ghe Gad igre ne cheke eghu, “Olta igne kaisei tuthuana ka tahati hui eigna Lord na noda God tahati.” Aonu mare ne kiloni olta igne “Tuthuana.”