Josua 21 - Buka Blahi Ka Cheke Holo

Nodi namono vikegna Livae

^1-2 Ka narane tuare mae mala baubatu ka vikegna Livae igre mei mala filoni pris biꞌo Eliesa, balugna Josua nei keha mae mala baubatu ka vikedi Israel iheire te au teu ka namono Saelo jare kantri Kenan, eghuteuna mare ne cheke eghu, “Lord neke cheke ka Moses ka narane teke posa tahati ka vido igne, ghotilo ginauna snakre mei namono igre ka ghehati mala au ghehati tadi, baludi glose te au faligoho ka namono igre, mala lilisei ghehati nomi buluka, nei sipu nei nanigot teu igre.”

³ Aonu mae iheire te baubatu ka vikedi Israel igre ne leghuni unha te chekeni Lord igne ne snakre lao namono nei glose teu igre ka vikegna Livae mala tangomana mare te lilisei nodi buluka, nei sipu, nei nanigot teu ka vido te khotogna mare igne.

⁴ Kokholo gna Kohat kaisei thugna mae Livae, mare neke kulu snakre lao namono igre ka mare. Tharakna ka kokholo gna Eron mae ihei teke pris biꞌo tifa igne, mana teke khotodi nabotho thilo namono eghuteuna keha ka namono igre neke snakre lao ka vikegna Juda, keha ka vikegna Simion, keha ka vikegna Benjamin.

⁵ Eghuteuna keha ka kokholo gna Kohat igre khotodi nabotho namono, kehare au ka nogna vido vikegna Efrem, eghuteuna keha ka nogna vido vikegna Dan, eghuteuna keha au ka nogna vido gaga vikegna Manase te au ke mosu Khoꞌu biꞌo Jordan.

⁶ Kokhologna Geson, mae ihei keha thugna mae Livae, mae igre te khotodi nabotho thilo namono eigna kehare au ka nogna vido vikegna Isaka, eghuteuna kehare au ka nogna vido vikegna Asa, eghuteuna kehare au ka nogna vido vikegna Naftali, eghuteuna kehare au ka nogna vido gaga vikegna Manase jare Basan te au ke maghati Khoꞌu biꞌo Jordan.

⁷ Eghuteuna ka kokhologna Merari, mae ihei keha thugna mae Livae, mae igre khotodi nabotho phei namono, kehare au ka nogna vido vikegna Ruben, eghuteuna kehare ka nogna vido vikegna Gad, eghuteuna kehare au ka nogna vido vikegna Sebulun.

⁸ Tifa na, Lord neke cheke ka Moses mala chekedi mana mae iheire te mala baubatu ka vikedi Israel mala lalahu khale, mala laseni ihei ka vikegna Livae nate khotodi namono igre. Aonu mare ne leghuni nogna cheke Lord teke cheke ka Moses igne ne snakre lao namono igre baludi glose te au ligoho igre ka vikegna Livae.

^9-18 Ulu lahu na, mare vahini kokhologna Eron mae ihei teke funu ka kokhologna Kohat, aonu mare te khotodi nheva namono te au ka nodi distrik Juda ghe Simion. Namono ulu lahu na Kiriat-Aba baludi glose te au falithu igre mala lilisei buluka, sipu nei nanigot. Namono igre au ke kligna thogele ka distrik Juda, eghuteuna gaoghathogna nangha igne “Nogna Namono Aba,” leghuni nanghagna kmagna Anak tifa, nu ke leghu na mare ke kiloni Hebron. Nu Kelab te khotodi vido te mala loku nagare baludi namono ikodi te au faligohoni namono igne. Gognaro na, namono Hebron gne kaisei namono mala poru ihei te faleheni keha mae na, nu mana theome diꞌatagna nei theome au gaoghatho mala goigonini keha mae na. Nu mae igne neke lehe neku. Eghuteuna mare ne snakre lao keha namono baludi glose te au faligohodi mare mala lilisei buluka, nei sipu nei nanigot. Nanghadi namono igre: Libna, nei Jatia, nei Estemoa, nei Holo, nei Debia, nei Aen, nei Juta, nei Bet-Semes. Igre nheva namono te khotodi mare ke lamnagna nodi vido vikegna Juda nei vikegna la Simion. Eghuteuna ka nogna vido Benjamin, mare snakre lao fati namono ka mare, baludi glose te au faligoho te mala lilisei nodi buluka, nei sipu nei nanigot eghu mare. Nanghadi namono igre: Gibeon, nei Geba, nei Anatot nei Almon.

¹⁹ Pris ka vikegna Eron te khotodi nabotho thilo namono baludi glose te au faligoho mala lilisei nodi buluka, sipu nei nanigot.

²⁰ Keha ka vikegna Kohat igre khotodi fati namono ka nogna vido ka vikegna Efrem baludi glose te au faligoho mala lilisei buluka, nei sipu nei nanigot.

²¹ Namono ulu lahu na Sekem, namono igne au ka thogele ka vido tuana. Eghuteuna namono igne jaola kaisei ka namono te mala poru ihei te faleheni keha mae na. Eghuteuna keha thilo namono te khotodi mare re, Gesa,

²² nei Kibsaem, nei Bet-Horon.

²³ Ka nogna vido Dan, mare snakre lao fati namono ka mare baludi glose te au faligoho te mala lilisei buluka, nei sipu nei nanigot. Nanghadi namono igre: Elteke, nei Gibeton,

²⁴ nei Aejalon, nei Gat-Rimon.

²⁵ Eghuteuna ka nogna vido Manase ke mosu na, mare snakre lao phei namono ka mare baludi glose te au faligoho te mala lilisei buluka, nei sipu nei nanigot. Nanghadi phei namono re igre: Tanak ghe Ibleam.

²⁶ Eghume, mare khotodi nabotho namono igre baludi glose te au faligoho te mala lilisei buluka, nei sipu nei nanigot.

²⁷ Mare ka vikegna Geson te khotodi phei namono baludi glose te au faligoho te mala lilisei buluka, nei sipu nei nanigot ke maghati nogna vido Manase. Nanghadi phei namono re igre: Bestera ghe Golan. Golan gne kaisei namono kate mala poru ka namono biꞌo Basan.

²⁸ Ke lamnagna nogna vido Isaka igne, mare khotodi fati namono baludi glose te au faligoho te mala lilisei buluka, sipu nei nanigot. Nanghadi namono re igre: Kision, nei Daberat,

²⁹ nei Jamut, nei En-Ganim.

³⁰ Eghuteuna ke lamnagna nogna vido Asa, mare khotodi fati namono baludi glose te au faligoho ka mala lilisei buluka, nei sipu nei nanigot. Nanghadi namono igre: Misal, nei Abdon,

³¹ nei Helkat, nei Rehob.

³² Eghuteuna ke lamnagna nogna vido Naftali, mare khotodi thilo namono baludi glose te au faligoho ka mala lilisei buluka, nei sipu nei nanigot. Nanghadi thilo namono igre: Hamot-Doa, nei Katan, nei Kedes jare Galili. Kedes gne kaisei ka namono te mala poru igre.

³³ Mare ka vikegna Geson ne khotodi nabotho thilo namono baludi glose te au faligoho ka mala lilisei buluka, nei sipu nei nanigot.

³⁴ Eghuteuna leghu lahu ka thudi Livae gne Merari. Ka nogna vido Sebulun, mae igre khotodi fati namono baludi glose te au faligoho ka mala lilisei buluka, nei sipu nei nanigot. Nanghadi namono igre Jokneam, nei Kata,

³⁵ nei Dimna, nei Nahalal.

³⁶ Ke lamnagna nogna vido Ruben, mare khotodi fati namono baludi glose te au faligoho ka mala lilisei buluka, sipu nei nanigot. Ka namono igre, namono Bese te au ka sare biꞌo ke kligna thogele, igne kaisei ka namono te mala poru ra, baludi Jahas,

³⁷ nei Kedemot, nei Mefat.

³⁸ Eghuteuna ka nogna vido Gad, mare khotodi fati namono baludi glose te au faligoho ka mala lilisei buluka, nei sipu nei nanigot. Ulu lahu na, namono igre Ramot jare Gilead, kaisei ka namono te mala poru igre, baludi Mahanaem,

³⁹ nei Hesbon, nei Jasea.

⁴⁰ Mare khotodi nabotho phei namono.

^41-42 Eghume naikno ka vikegna Livae au phiatutu nhana namono ke lamnadi nodi vido keha vikedi Israel. Eghuteuna namono te gnafa igre mare au glose lithui mala lilisei buluka, sipu nei nanigot.

Nogna naiknoLordigre au soru ka nodi glose re

⁴³ Aonu Lord neke tusu lao glose ka vikegna Israel. Igre glose teke nhaꞌa cheke mana ka kuꞌedi mare tifa ra. Eghuteuna kate khotodi mare glose igre, mare ne ei nodi namono tadi.

⁴⁴ Lord ne tusu ranghidi pharikeli heva heva ke lamnadi glose aheva teke nhaꞌa cheke mana ranghidi kuꞌedi mare tifa ra. Eghuteuna ka narane igre, theo kaisei naoka te tangomana te uludi mare na, naugna Lord neke toghodi neke uludihi mare nodi naoka mare igre.

⁴⁵ Lord neke tajidi nogna nhaꞌa cheke te gnafa teke edi mana baludi kuꞌedi mare tifa ra. Nogna famane nhaꞌa cheke mana igre ne thoke mei tutuani fara.