Josua 13 - Buka Blahi Ka Cheke Holo

Lordne cheke ka mae Josua mala atha fahui glose igre mala tufa ka naiknore

¹ Kate kueku'ehi mae Josua na, Lord ne cheke eghu ka mana, “Iagho la kueku'ehi gognarona, nu kmana vido gloseu te theome atha nga teu ghotilo na.

^2-3 Ghotilo theome athau nodi vido glose mae Filistia nei namono biꞌo Gasa, Asdod, Askelon, Gat, Ekron eghu te funei frunidi glima mae king igre nei nodi vido glose mae Gesu igre eghu. Ghotilo theome athau nodi namono mae Kenan te funu ka khoꞌu ikoi Sihon rhegna nohi fofotagna kantri Ijep te tei posa ke raru namono biꞌo Ekron. Eghuteuna ghotilo jaola theome athau vido ke mata te nodi hatimare mae Av.

⁴ Eghuteuna phei namono biꞌo Kenan ghe Maera te au ka nohi Saedon. Vido igne tei posa ka namono Afek nohi fofotagna nodi vido mae Amor.

⁵ Eghuteuna ghotilo theome athau nodi vido glose mae Gebol keha phile ke maghati Lebanon, funu ka namono Balgad rhegna Thogele Hemon tei posa ka fofoflogna nabrou te tei posa ka namono Hamat.

⁶ “Eghuteuna ghotilo jaola theome athau nodi vido glose mae Saedon te au farihotei Thogele Lebanon nei Misrefot Maim. Nu iara ginauna khi fajifladi vike te au ka vido igne, eghuteuna ghotilo mae Israel ra ginauna atha nodi namono mare igre. Iagho tufa vido glose igre ka vike te gnafa Israel igre mala nodi mare. Iagho leghuni unha te chekeni iara ka iagho igne.

⁷ Eghume iagho tufa glose igne ka nheva vike igre, nei ka vikegna mae Manase igre eghu.”

Nodi glose mae Ruben, mae Gad nei mae Manase

⁸ Teke vikedi mae Ruben, mae Gad nei mae Manase teu igre ginauna atha vido glose ke maghati khoꞌu Jordan. Naugna mae Moses nogna mae gloku God igne neke tufahi ka mare.

⁹ Nodi glose mare igne, funu ka namono Aroa rhegna sare khoꞌu Anon nei ka namono te au farihotei glogu nei sare Medeba tei posa ka namono Dibon.

¹⁰ Eghuteuna mae igre neke atha nogna namono mae Sihon nodi king mae Amor. Tifa na mae Sihon gne neke au Hesbon neke funei frunidi namono te gnafa te au ka vido te tei posa ka fofothagna nodi nohi mae Amon.

¹¹ Mare neke jaola nake atha nodi glose mae Gilead tei posa ka nodi nohi mae Gesu nei mae Maka nei keha vido ka Thogele Hemon nei keha vido ka nohi Besan tei posa ka namono Saleka.

¹² Eghuteuna funu jare tei posa ka vido te gnafa ka nohi teke funei frunidi King Og baludi phei namono Astarot ghe Edrei teke namono biꞌo na. Mae Og gne ngala mae leghu lahu ka vikegna mae Refaem tifa na. Mae Moses baludi naiknodi Israel neke magra neke uludi naikno igre baludi nodi namono re.

¹³ Neuba, naiknodi Israel gre neke theome khi fajifladi naiknodi phei namono Gesu ghe Maka. Gognarona, naikno igre au soru baludi naiknodi Israel.

¹⁴ Lord neke chekehi ka mae Moses te vikegna mae Livae igre ginauna theo nodi glose, nu mare ginauna au ghedi gano ka unha keha vike are te hata te mei te mala taraidi nei fafara eghu ka Lord.

Nodi vido glose vikegna Ruben

¹⁵ Mae Moses neke snakre lao vido glose ka vikegna mae Ruben, mala nodi mare fabrahu.

¹⁶ Nodi glose mare igne funu ke mata namono Aroa ke demei glogu Anon tei posani namono farihotei glogu tei posadi sare biꞌo te gnafa lithuini namono Medeba.

¹⁷ Kmana namono au ka sare igne. Namono igre Hesbon, nei Dibon, nei Bamot-Baal, nei Bet-Balmeon,

¹⁸ nei Jahas, nei Kedemot, nei Maefat,

¹⁹ nei Kiriataem, nei Sibma, nei Seretsaha ka gukhu ke holo rhegna Thongna Lehe,

²⁰ nei Bet-Jesimot, nei Bet-Peo te au rhegna thogele Pisga.

²¹ Igre bukrei namono ka sare biꞌo igne ke kligna thogele baludi namono te gnafa teke funei frunidi King Sihon ka vikegna Amor balugna namono Hesbon. Mae Moses neke faleheni king igne baludi king te gnafa igre ka magra. Mae funei igre mei funudi Midian eghuteuna mana vahidi mare mala funei frunidi nohi igre. Nanghadi mae igre mae Evi, nei mae Rekem, mae Sua, mae Hua nei mae Reba.

²² Kaisei mae ka mae igre teke aknu falehe mae Moses na, mae Belam thugna mae Beo. Mae Belam gne kaisei mae mala fafara ka naitu mala laseni unha nate thoke mei ginauna.

²³ Khoꞌu biꞌo Jordan igne fofotagna glose ke mosu teke snakre lao mae Moses ka vikegna mae Ruben. Eghuteuna tuare namono biꞌo te gnafa nei namono ikodi eghu ka nohi teke snakre lao mae Moses ka mare mala nodi mare fabrahu.

Nodi vido glose vikegna mae Gad

²⁴ Mae Moses neke tufahi glose igne ka vikegna mae Gad mala nodi mare fabrahu.

²⁵ Nohi igne tei posa ka namono Jasea eghuteuna tei thoke ka namono te gnafa ke lamnagna nohi Gilead, vido glose te nogna mae Amon na doglo tei posa ka namono Aroa ke maghati Raba, au ke lamna glose igne.

²⁶ Eghuteuna vido glose igne funu ka namono Hesbon tei posa ka namono Rama Mispa nei namono Betonim. Eghuteuna funu ka namono Mahanaem mei posani fofotagna vido Lo-Deba.

²⁷ Ka glogu Jordan, glose igne tei posadi namono Bet-Haran, nei Bet-Nimra, nei Sukot, nei Safon, nei nohi te gnafa te funei frunidi King Sihon, maegna ka namono Hesbon. Eghuteuna fofotadi glose igre ke mosu na funu ka Khoꞌu biꞌo Jordan tei posa ke raru Kholo Galili.

²⁸ Igre namono te gnafa nei namono ikodi teu teke snakre lao mae Moses te mala nodi mare fabrahu na.

Nodi glose kaisei vido vikegna mae Manase

²⁹ Mae Moses neke snakre lao keha vido glose ka vido vikegna mae Manase.

³⁰ Nohi igne funu Mahanaem nei glose te gnafa Besan teu igre au ke lamnagna nohi igne, baludi namnosalei namono ikodi teke uludi mae Jaea kaisei fata ka magra tifa. Uve, tifa na King Og gna Besan teke funei frunidi vido te gnafa ka nohi tuana. Eghuteuna mae Manase neke jaola neke atha namono Salei, nogna namono mae Jai te au ka nohi Besan.

³¹ Nohi igne jaola tei thokeni keha vidogna Gilead, baludi phei namono Astarot ghe Edrei aheva teke au King Og. Igne glose aheva teke snakre lao mae Moses ka vikegna mae Makia, thugna mae Manase.

³² Igne puhi te eni mae Moses teke tufa glose ke maghati khoꞌu Jordan kani au teku ka sare biꞌo Moab.

³³ Nu mae Moses neke theome tufa lao kaisei vido glose ka vikegna mae Livae. Eigna mae Moses neke chekehi ka mare te mare ginauna tangomana te atha vido ka unha te fafara lao naiknodi Israel ka Lord, nodi God maedi Israel.