Josua 11 - Buka Blahi Ka Cheke Holo

Mae Israel ne uluni King Jabin

¹ Mae Jabin, mae ihei te king ka namono Haso, mana ne nomhidi unha te edi mae Josua nei nogna armi teu igre. Aonu mana ne fatei cheke ka mae Jobab mae king gna namono biꞌo Madon, nei mae king gna Simron, nei mae king gna Aksap.

² Eghuteuna mana jaola ne fatei cheke ka hatimare mae king te au ka thogele ke raru. Mana jaola fatei cheke ka hatimare mae king te au ka sare khoꞌu Jordan ke mata nei ka thogele ikoi ke mosu thogele Kholo Galili, nei ka mae king gna ke mosu te au ka namono Nafot Dor.

³ Mana jaola fatei cheke ka hatimare mae king te au ke maghati nei ke mosu Kenan. Mana ne fatei cheke igre ka hatimare mae Amo, mae Hit, mae Peres nei mae Jebu te au ka thogele ke holo. Mae Jabin jaola ne fatei cheke igre ka hatimare mae Hivi te au ka pesi Thogele Hemon ka nohi Mispa.

⁴ Hatimare mae king igre nomhini nogna cheke mana igne ne mei balu nodi mae nheta. Nodi armi mae igre kmana fara jateula nusu ka gratha na are eghu mei balu nodi hose nei chariot.

⁵ Mae king igre tei ne au ka khoꞌu Merom. Mare salo fodu jare mala tei magra ka mae Israel.

⁶ Aonu Lord ne cheke eghu ka mae Josua, “Iagho thosei mhaghudi, naugna iara Lord ginauna togho nigho iagho. Nathuꞌu jateula narane gognarogne teuna mae te kmana tuare ginauna kafe lehe hui. Eghuteuna ke leghugna magra igne, nodi hose mala magra mare are ginauna kafe blughu, eghuteuna nodi chariot mala magra mare are ginauna kafe ghamu khaꞌaghi hui.”

⁷ Mae Josua nei hatimare nogna mae soldia, mare tei ne posa Merom kate iho te theome tarabana teu mae naokare ne magra ka mare jare.

⁸ Eghuteuna Lord ne toghodi mae Israel ne uluni mare magra igne. Aonu mare ne ngolhi leghudi mae naoka igre ne ghilei tei posa ka glogu Mispa ke mosudi phei namono biꞌo Saedon ghe Misrefot Maim. Nogna soldia mae Josua igre magra heta ne ghilei lehe fahui hatimare mae naokare.

⁹ Aonu mae Josua ne leghuni nogna cheke Lord igne ne lolhopa gahedi nodi hose nei faghamu khaꞌaghi nodi chariot teu mae naoka igre.

¹⁰ Ke leghugna igne, mae Josua neke figri neke tei atha namono biꞌo Haso ne faleheni mae king gna namono igne. Ka narane tuare namono Haso igne neke kaisei namono ulu ka kantri igne.

¹¹ Mare falelehe ne gnafa naikno te gnafa te au ka namono Haso. Theo kaisei mae ka mare te karha na. Eghuteuna leghu lahu na mae Israel gre ne gnubra namono na.

¹² Mae Josua uludi ne gnafa namono igre eghuteuna mana jaola ne atha mae king teke funei frunidi namono igre. Eghuteuna mana ne falelehe ne hui mae king igre leghuni unha teke chekeni mae Moses nogna mae gloku God.

¹³ Nu mae Israel neke theome gnubra namono teke horo mare ke kligna thogele igre. Neuba, mae Josua ne chekedi nogna mae nhetare neke gnubra kaisei namono Haso igne ngala.

¹⁴ Mare ne atha maladi thedi gobigna lepo te keli nei buluka eghu te magnahaghedi mare ka namono igne. Eghuteuna mare ne kafe falelehe ne gnafa naikno te gnafa te au ka namono igre.

¹⁵ Tifa na Lord neke cheke ka mae Moses nogna mae gloku na. Eghuteuna mae Moses neke tusu lao nogna cheke Lord igre ka mae Josua. Eghume mae Josua ne leghudi nogna cheke mana igre ne edi gobigna lepore jateula teke chekedi Lord ka mae Moses igre neu.

Mae Josua ne atha namono te gnafa ka kantri igne

¹⁶ Mae Josua tei balu nogna armi ne atha namono te gnafa funu ke raru tei posa ke mata. Mare atha thogele ke holo nei fanukhu ke raru nei vido te gnafa Gosen, nei namono nagou ke mata nei sare khoꞌu Jordan.

^17-18 Nohigna vido igne funu ka thogele Halak ke mata Idom tei posa ka namono Balgad ka sare Lebanon ke raru Thogele Hemon. Mae Josua gne kmana fata tei magra ka mae king te funei ka namono igre ne kafe falehedi mae king igre.

¹⁹ Hatimare mae Hivi te au ka Gibeon igre ne nhaꞌa cheke ka mae Israel ne au soru baludi mare. Nu keha mae ka keha namono igre mare theome jateula te eni mare igne eghu. Eghuteuna mae Israel ne thofno goigonidi fara mae vike igre.

²⁰ Lord thegna neke huhurudi mare mala magra mare ka mae Israel gre, eghume mae Israel theome kokhonidi mae igre. Thono theo fara. Eigna mae Israel gre mare leghuni cheke teke tusu lao thegna Lord ka mae Moses tifa igne ne falehedi ne gnafa vike igre.

²¹ Mae Josua jaola ne roꞌedi vike te kilodi mae Anakim, mae igre mae nheta tulao. Eghuteuna mae igre au ka namono Hebron, Deba, Anab nei ka thogele te gnafa te au ka kantri Juda ghe Israel. Mae Josua ne thofno fahuidi nei goigonidi neu nodi namono mae igre.

²² Theo kaisei ka vikegna Anak te au teu Israel. Nu theome kmana kolho te au teu ka namono Gasa nei Gat nei Asdod.

²³ Mae Josua ne kafe atha tongana namono igre ne tufa fari hoteidi vike te gnafa Israel. Eghuteuna kate atha te gnafa mae Israel namono igre, mare ne gnafa magra na ne au soru ka pharikeli.