Josua 10 - Buka Blahi Ka Cheke Holo

Mae Josua ne uludi vikegna mae Amo ka magra

¹ King gna Jerusalem Adonisedek, mana ne mhaghu nogna fara kate nomhini thoutonu eigna mae Josua te hata namono biꞌo Ai, eghuteuna goigonihi namono igne. Mana jateula teke eni ka naiknodi Jeriko balugna nodi king na ia neu ne aknu falehe nodi king mare na. Mana jaola ne nomhidi naiknodi Gibeon te mei au ke parigna mae Josua nei naiknodi Israel.

² Mae king igne baludi nogna naiknore ne mhaghu nodi fara, naugna mare laseni namono Gibeon igne kaisei namono biꞌo fara jateula keha namono biꞌo te au nodi king are eghu. Eghuteuna naiknogna namono igne kmana fara salaꞌudi naiknodi Ai, eghuteuna mare jaola thono nheta fara ka magra.

³ Aonu king Adonisedek ne fatei cheke ka mae Hoham king gna Hebron, nei ka mae Piram king gna Jamut, nei ka mae Jafia king gna Lakis, nei ka mae Deba king gna Eklon.

⁴ Mana ne cheke eghu tei ka mare, “Ghotilo mei togho ghau iara, mala tei magra tahati ka maedi Gibeon igre, naugna gognarona mare la teihi mala au fodu mare kau pharikeli balugna mae Josua nei hatimare mae Israel.”

⁵ Aonu glima mae king vikegna mae Amo igre ne loku fodu, king gna Jerusalem, Hebron, Jamut, Lakis nei Eklon. Mare tei ne kegra ligohoni namono Gibeon ne funu magra ka mare.

⁶ Mae gna namono Gibeon igne ne fatei cheke ka mae Josua Gilgal, ne cheke eghu ka mana, “Ghosei mei togho ghami! Thosei lisa lao ghami, nu mei fakarhi ghami! Gognarona mae king te gnafa ka vikegna mae Amo te au ka thogele ke holo igre, mare loku foduhi mala mei magra ka ghehati agne.”

⁷ Aonu mae Josua nomhini igne ne hata nogna armi na baludi nogna mae komandare ne jifla Gilgal ne tei toghodi naikno gna namono Gibeon.

⁸ Lord ne cheke eghu ka mae Josua, “Thosei mhaghudi mae tuare. Iara ginauna togho ghami ghotilo, eghuteuna ghotilo ginauna uluni magra igne. Eghuteuna theo kaisei ka mare nate ulu ghami ghotilo ka magra na.”

⁹ Bongi thongana igne, mae Josua balu nogna armi jifla Gilgal ne tei Gibeon. Mare ne posa lao hamerane boibongi kate theome tarabana teu nodi soldia mae Amo igre.

¹⁰ Eghuteuna kate filoni armi gna Israel igne, nodi soldia mae Amo igre mhaghu nodi fara ne rikha tafri, naugna Lord ne faromno nagnafadire. Mae Josua balu nogna armi ne aknu falehe kmana mae ka mare ka namono igne, eghuteuna ngolhidi kehare leghu nabrou ne tei posa ka thogele te mala haghe ka namono Bet-horon. Mare ngolhi leghudi ne tei aknu falehedi ne ghilei tei posa ke matadi phei namono biꞌo Aseka ghe Makeda.

¹¹ Eghuteuna kate rikhani armi gna Israel igne te sukha ka thogele na, nodi soldia mae Amo igre, Lord ne koko soru aes funu kligna jateula thina neu fabrahu ke klignadi ne ghilei tei posa Aseka. Mae te lehe ka aes igre kmana fara salaꞌudi mae teke lehe ka mae Israel.

¹² Ka narane igne, Lord ne toghoni mae Josua balu armi gna Israel ne uluni vikegna mae Amo. Eghume, mae Josua ne tarai eghu ka Lord ke uludi naiknore, “Naprai, iagho kegra snoto mala agha soru ke kligna Gibeon. Glaba, iagho kegra snoto mala agha soru ke kligna glogu Aijalon.”

¹³ Aonu naprai na leghuni cheke igne ne kegra snoto ka kaisei vido, eghuteuna glaba na jaola ne kegra snoto ka kaisei vido ne ghilei thokeni vido te uluni mare magra igne. Mare ne rioriso soru thoutonu igne baludi nogna cheke mae Josua gre ka buka te kiloni mare “Nogna Buka mae Jasa.” Ka narane igne, naprai na ne kegra snoto ka kaisei vido farihotei naublatha, namo kaisei narane thongana.

¹⁴ Funu tifa te ghilei mei posa ka narane gognarogne, theo kaisei narane te jateula narane tuana teuna. Glepo igne neke eghu, naugna Lord neke nomhini nogna cheke naikno na neke toghodi maedi Israel ka magra.

¹⁵ Ke leghugna igne, mae Josua neke pulo Gilgal.

Mae Josua neke falehedi glima king ka vikegna mae Amo

¹⁶ Nu glima mae king igre rikha ne tei poru ka kaisei gluma rhegna namono Makeda.

¹⁷ Eghuteuna keha mae ne filodi glima mae king igre ne tei cheke ka mae Josua ka vido aheva te poru teu mare na.

¹⁸ Aonu mae Josua ne cheke eghu ka nogna armi na, “Ghotilo hata keha thina biꞌo mala tei fofotho foflogna gluma na, eghuteuna lilisei keha mae soldia mala reireghi gluma tuana.

¹⁹ Nu ghotilo thosei fiti au ka vido igne. Ghotilo tei ke leghudi, thosei lisa laodi mala karha ke pulo mare ka namonodire. Naugna God, noda Lord tahati na la lisa meihi ka khameda tahati. Mana la chekehi te mala uluni tahati u magra na.”

²⁰ Aonu mae Josua baludi maedi Israel igre ne ngolhi leghudi mae naokare ne tei aknu falehedi. Nu keha ghu kolho te rikha te tei poru ke lamna namono.

²¹ Eghuteuna nogna soldia mae Josua re neke pulo Makeda. Theo kaisei mae ka mare te ghoreho na. Eghuteuna theo kaisei mae ka namono Kenan te frane te cheke faparidi mae Israel.

²² Aonu mae Josua ne cheke eghu, “Tothora foflogna khora tuana mala hata mei glima mae king tuare ka iara.”

²³ Aonu mare hata ne mei mae king di Jerusalem, Hebron, Jamut, Lakis nei Eglon teu igre ka mae Josua.

²⁴ Eghuteuna mae Josua ne cheke eghu ka ofisa te gnafa nogna armi na, “Ghotilo kafe mei agne mala tapla ka graradi mae king igre.” Aonu mare kafe mei ne tapla ka graradi glima mae king igre ke uludi naikno gna Israel.

²⁵ Eghuteuna mae Josua ne cheke eghu ka naikno te gnafa Israel igre, “Thosei mhaghu nei bobolo eghu, nu kegra heta, naugna Lord ginauna togho ghami ghotilo jateula teke eni mana ka ghotilo ia eghu.”

²⁶ Aonu mana ne aknu falehe glima mae king igre ne fagefe haghe thinidire kligna. Thinidi glima mae king igre gefe neu jare ne ghilei figri naprai na.

²⁷ Aonu mae Josua ne cheke ka mare ne hata soru thinidi glima mae king igre ne koko soru ka khora teke poru mare igne. Gnafa teuna, mare ne fofotho khora igne ka thina biꞌo. Thina biꞌo igre au ngala gognarona.

Mae Israel jaola ne hata keha namonore

²⁸ Ka narane tuanala mae Josua ne hata namono biꞌo Makeda. Mana aknu falehe ne gnafa naikno gna namono igne. Mana ne eni nafnata puhi igne ka mae king gna namono Makeda jateula teke eni mana ka mae king gna Jeriko ia neu.

²⁹ Ke leghugna igne mare ne tei ka namono igne, mae Josua hata nogna armi na ne jifla Makeda ne tei magra ka namono Libna.

³⁰ Lord ne toghodi mare ne uluni magra igne. Aonu mare ne hata king na, eghuteuna mare ne aknu falehe ne gnafa naiknore ne theo kaisei te karha na. Mana ne eni nafnata puhi igne ka mae king gna Libna jateula teke eni mana ka mae king gna Jeriko ia neu.

³¹ Ke leghugna igne, mae Josua balugna nogna armi na jifla Libna ne tei Lakis. Mare bara faligohoni namono igne ne magri hati namono igne.

³² Eghuteuna ka fapea narane na, Lord toghodi mare ne uluni magra igne. Mae Josua ne theome magnahagheni kaisei naikno te karha na, mana aknu falehe ne gnafa mae nalhaꞌure jateula teke eni mana ka namono Libna ia neu.

³³ Ke leghu, King Horam jifla Gasa ne tei toghodi maedi Lakis. Nu mae Josua ne uluni mae king igne nei mae iheire teke toghoni manare. Eghuteuna mae Josua ne falehedi ne gnafa naiknore ne theo kaisei te karha na.

³⁴ Kate magra te hatahi mare namono Lakis igne, mae Josua balugna nogna armi na, jifla ne tei Eglon. Mare bara ligohoni namono igne.

³⁵ Mare ne hata namono Eglon ka narane tuanala. Eghuteuna mae Josua ne aknu falehe ne hui mae nalhaꞌugna namono igne jateula teke eni mana ka namono Lakis ia neu.

³⁶ Ke leghugna igne, mae Josua balugna nogna armi na jifla Eglon ne tei Hebron. Mare magra jare,

³⁷ ne hata namono igne. Mare ne aknu falehe ne hui naiknogna namono Hebron balugna nodi mae king na. Mae Josua ne thofno goigonini fara namono Hebron jateula teke eni mana ka namono Eglon ia neu. Theo kaisei naikno te karha na ka namono igne.

³⁸ Ke leghugna igne, mae Josua hata nogna armi na ne tei Deba ne magra jare.

³⁹ Mare ne hata namono Deba baludi keha namono te au namo teu ka namono tuana ne aknu falehe ne hui naiknodi namono igre. Mae Josua ne eni nafnata puhi igne ka mae king gna namono Deba jateula teke eni mana ka phei namono Hebron ghe Libna nei hatimare mae king.

⁴⁰ Mae Josua ne magra heta fara ne uludi namono biꞌo te gnafa te au ka vido igne. Mana tapla faparidi ne gnafa hatimare mae king te au ka thogele ke holo, ka nohi ke mata Negev, ka fanukhu ke mosu, nei ka vido rhegna ke maghati khoꞌu Jordan. Mana aknu falehedi ne gnafa mae king te gnafa nei naikno te gnafa teu te au ka vido te gnafa igre. Mae Josua ne theome magnahaghei te karha kaisei na, naugna God nodi Lord maedi Israel igre neke chekehi ka mare.

⁴¹ Mae Josua kafe uludi ne gnafa namono te gnafa funu ke mata Kades Banea tei posa ka gratha Gasa, eghuteuna ke funu Gosen tei posa ke raru namono Gibeon.

⁴² Ka narane tuare, Lord, nodi God maedi Israel igne ne toghodi mare mala uludi nei hata eghu nodi namono mae naoka igre.

⁴³ Aonu mae Josua balu nogna armi na neke kafe figri Gilgal.